ປະຕິບັດໜ້າທີ່ກ່ຽວກັບການປົກປ້ອງ ແລະ ຄຸ້ມຄອງສຸຂະພາບຂອງປະຊາຊົນ ຈາກການບໍລິໂພກຜະລິດຕະພັນສຸຂະພາບ (ອາຫານ, ຢາ, ຢາພື້ນເມືອງ ແລະ ຜະລິດຕະພັນເສີມສຸຂະພາບ, ອຸປະກອນການແພດ, ເຄມີຄວບຄຸມ, ເຄມີອັນຕະລາຍທີ່ໃຊ້ໃນຄົວເຮືອນ ແລະ ຜະລິດຕະພັນການແພດ, ເຄື່ອງສໍາອາງ) ໂດຍຮັບປະກັນຜະລິດຕະພັນສຸຂະພາບເຫຼົ່ານັ້ນຕ້ອງມີຄຸນນະພາບ ແລະ ປອດໄພ, ສົ່ງເສີມພຶດທິກໍາການບໍລິໂພກທີ່ຖືກຕ້ອງ ໂດຍການໃຫ້ຂໍ້ມູນທາງດ້ານວິຊາການທີ່ມີຫຼັກຖານ ແລະ ໜ້າເສື່ອຖື ແລະ ມີຄວາມເໝາະສົມ ເພື່ອໃຫ້ປະຊາຊົນໄດ້ບໍລິໂພກຜະລິດຕະພັນສຸຂະພາບ ທີ່ປອດໄພ ແລະ ມີປະໂຫຍດ.  ກົມອາຫານ ແລະ ຢາ ມີພາລະບົດບາດໜ້າທີ່ດັ່ງລຸ່ມນີ້:

1. ຫັນ​ແນວ​ທາງ​ນະໂຍບາຍຂອງ​ພັກ-​ລັດໃຫ້​ກາຍ​ເປັນ​ແຜນ​ຍຸດ​ທະ​ສາດ ແລະ  ສ້າງ​ເປັນແຜນ​ການ, ແຜນ​ງານ, ໂຄງ​ການ ​ພັດ​ທະ​ນາ​ດ້ານ​ວຽກ​ງານ​ອາ​ຫານ, ຢາ ແລະ ຜະລິດຕະພັນການແພດໃນ​ແຕ່​ລະ​ໄລ​ຍະ;

2. ຄົ້ນ​ຄົ້ວາ, ຮ່າງ, ປັບປຸງ ແລະ ເຜີຍແຜ່​ບັນດາກົດ​ໝາຍ, ນະ​ໂຍ​ບາຍ, ດຳ​ລັດ, ມະ​ຕິ, ຂໍ້ຕົກລົງ, ກົດ​ລະ​ບຽບ, ຄໍຳ​ສັ່ງ, ຄຳແນະນຳ, ແຈ້ງ​ການ ແລະ ມາດຖານທີ່​ກ່ຽວ​ພັນ​ກັບ​ຂົງເຂດວຽກ​ງານ​ຂອງ​ກົມເພື່ອ​ນຳ​ສະ​ເໜີ​ໃຫ້​ການ​ນຳ​ກະ​ຊວງສາທາລະນະ​ສຸກ​ພິ​ຈາ​ລະ​ນາ​ຕົກ​ລົງ;

3. ພັດທະນາ ແລະ ນໍາພາຈັດຕັ້ງປະຕິບັດ ແຜນງານປົກປ້ອງຜູ້ບໍລິໂພກດ້ານອາຫານ, ຢາ ແລະ ຜະລິດຕະພັນການແພດໃນໄລຍະສັ້ນ, ໄລຍະກາງ ແລະ ໄລຍະຍາວໃນຂອບເຂດທົ່ວປະເທດ;

4. ຊີ້​ນຳ​, ຊຸກຍູ້ ແລະ ຕິດຕາມ ​ການຈັດຕັ້ງ​ປະ​ຕິ​ບັດ​ແຜນງານ​, ແຜນ​ການ, ໂຄງ​ການ ແລະ ລະ​ບຽບ​ກົດໝາຍ​ ຕ່າງໆ ໃນ​ການ​ຄຸ້ມ​ຄອງ​ອາ​ຫານ, ຢາ ແລະ ຜະລິດຕະພັນການແພດ;

5. ປະຕິບັດ​ພາລະບົດບາດກອງເລຂາ​ຄະ​ນະກຳ​ມະ​ການ​ຄຸ້ມ​ຄອງອາ​ຫານ ແລະ ຢາ, ແລະ ເປັນຈຸດປະສານງານຂອງຄະນະ​ກຳມະການກົດລະຫັດອາຫານລາວ;

6. ຄົ້ນຄວ້າ​ມາດ​ຕະ​ຖານ​-ເຕັກ​ນິກ, ກຳນົດ ຫຼື ລົບລ້າງ​ບັນ​ຊີ​ອາ​ຫານ, ຢາ, ອຸປະກອນການແພດ,  ອາ​ຫານ​ເສີມ​ການ​ແພດ, ເຄື່ອງ​ສຳ​ອາງ, ຢາ​ເສບ​ຕິດ, ວັດ​ຖຸ​ອອກ​ລິດ​ຕໍ່​ຈິດ​-ປະ​ສາດ, ເຄ​ມີ​ຄວບ​ຄຸມ, ຢາ​ເບື່ອ ແລະ ຢາ​ຕ້ອງ​ຫ້າມ ​ເພື່ອ​ນຳ​ສະ​ເໜີ​ໃຫ້ລັດຖະມົນຕີ​​ຊວງ​ສາທາລະນະ​ສຸກ​ພິຈາລະນາ​ຕົກລົງ;

7. ເກັບກຳ, ຄົ້ນຄວ້າ, ສັງລວມ ​ແລະ ວິໄຈສະພາບກ່ຽວກັບຄຸນ​ນະພາ​ບ, ມາດຕະຖານ ແລະ ຄວາມ​ປອດ​ໄພອາຫານ, ຢາ ແລະ ຜະລິດຕະພັນການແພດ ໃນຂອບເຂດທົ່ວປະເທດ;

8. ສົມທົບກັບພາກສ່ວນກ່ຽວຂ້ອງໃນການສົ່ງ​ເສີມ​ການ​ສືບ​ຄົ້ນພູມປັນຍາຂອງບັນພະບຸລຸດກ່ຽວກັບຕຳລາຢາພື້ນເມືອງ,​ ການນຳ​ໃຊ້​ຊັບ​ພະ​ຍາ​ກອນທຳ​ມະ​ຊາດ​ທີ່​ເປັນ​ຢາ, ເພື່ອສົມທົບເຂົ້າໃນການ​ກັນ​ ແລະ ປິ່ນ​ປົວ​ພະ​ຍາດໃຫ້ກ້ວາງຂວາງ;

9. ປະ​ສານ​ສົມ​ທົບ​ກັບ​ພາກສ່ວນ​ທີ່ກ່ຽວ​ຂ້ອງ​ໃນ​ການຈັດ​ຊື້, ສະໜອງ​ຢາ ແລະ ຜະ​ລິດ​ຕະ​ພັນ​ການ​ແພດ​ໃນ​ຂອບ​ເຂດ​ທົ່ວ​ປະ​ເທດ;

10. ຄຸ້ມ​ຄອງ, ຊີ້​ນຳ, ຕິດ​ຕາມ, ກວດ​ກາການສຳຫຼວດ, ຄົ້ນ​ຄ້​ວາ, ຂຸດຄົ້ນ, ປຸງແຕ່ງ, ປູກ​ລ້ຽງ, ຜະ​ລິດ, ນຳໃຊ້ແລະ ການສົ່ງອອກຊັບພະຍາກອນທຳມະຊາດທີ່ເປັນຢາ;

11. ຄຸ້ມ​ຄອງ, ຊີ້​ນຳ, ຕິດ​ຕາມ, ກວດ​ກາ ແລະ ສົ່ງ​ເສີມທຸກ​ຫົວ​ໜ່ວຍ​ການ​ຈັດ​ຕັ້ງ​ຂອງ​ລັດ, ເອ​ກະ​ຊົນ​ທີ່​ດຳ​ເນີນ​ທຸ​ລະ​ກິດ, ການບໍລິການດ້ານ​ອາ​ຫານ,  ​ຢາ ແລະ ຜະ​ລິດ​ຕະ​ພັນ​ການ​ແພດ;

12. ຊຸກຍູ້, ສົ່ງ​ເສີມ​ການ​ຜະ​ລິດ​ພາຍ​ໃນ​ດ້ານ​ອາ​ຫານ,  ຢາ ແລະ ຜະລິດຕະພັນການແພດ ບົນພື້ນຖານ​ມາດຕະ ຖານຄຸນ​ນະ​ພາບ​​ການ​ຜະ​ລິດ​ທີ່​ດີ​ເພື່ອນຳໃຊ້ພາຍໃນ ແລະ ​ເປັນ​ສິນ​ຄ້າ​ສົ່ງ​ອອກທົດ​ແທນ​ການ​ນຳ​ເຂົ້າ​ເທື່ອ​ລະ​ກ້າວ;

13. ຄົ້ນ​ຄ້​ວາ ແລະ ນໍາ​ສະເໜີຂໍອະນຸມັດ ຫຼື ລົບ​ລ້າງ​ໃບ​ອະ​ນຸ​ຍາດ​ວິຊາຊີບເພສັດຊະກຳ ແລະ ໃບອະນຸຍາດວິຊາສະເພາະທີ່ເຄື່ອນໄຫວກ່ຽວກັບ ການດໍາເນີນທຸລະກິດທີ່ມີຄວາມສ່ຽງຕໍ່ສຸຂະພາບ​ໃນ​ການດຳ​ເນີນ​ທຸ​ລະ​ກິດ​ກ່ຽວ​ກັບ​ອາ​ຫານ, ຢາຫລວງ, ຢາພື້ນເມືອງ, ຊັບພະຍາກອນທຳມະຊາດທີ່ເປັນຢາ, ຜະລິດຕະພັນເສີມສຸຂະພາບ, ອຸປະກອນການແພດ,  ຢາ​ເບື່ອ, ຢາ​ເສບ​ຕິດ, ວັດຖຸ​ອອກ​ລິດ​ຕໍ່​ຈິດ-​ປະສາດ, ​ເຄມີ​ຕົ້ນ,​ ເຄມີອັນຕະລາຍ​ທີ່​ນໍາ​ໃຊ້​ໃນ​ຄົວ​ເຮືອນ ​ແລະ ​ເຄື່ອງສຳອາງ;

14. ຄົ້ນຄ້ວາດຸ່ນ​ດ່ຽງ, ດັດ​ສົມ​ລະ​ຫວ່າງ​ຄວາມ​ຕ້ອງ​ການ​ຊົມໃຊ້​ກັບການ​ຜະ​ລິດ ແລະ ການ​ນຳ​ເຂົ້າດ້ານ​ອາຫານ, ຢາ ແລະ ຜະລິດຕະພັນການແພດ;

15. ກວດ​ກາ, ຢັ້ງຢືນຄຸນ​ນະ​ພາບຜະ​ລິດ​ຕະ​ພັນອາ​ຫານ, ຢາ ແລະ ຜະ​ລິດ​ຕະ​ພັນ​ການ​ແພດ ກ່ອນຮັບ​ເອົາ ຫຼື ນຳ​ເຂົ້າຈາກ​ການ​ບໍ​ລິ​ຈາກ ຫຼື ຊ່ວຍ​ເຫຼືອ​; ​

16. ຄົ້ນ​ຄ້ວາ​ແກ້​ໄຂ, ປະຕິບັດມາດຕະການ ຫຼື ນຳ​ສະ​ເໜີ​ການ​ນຳ​ກະຊວງ​ສາທາລະນະ​ສຸກພິຈາລະນາ​ແກ້​ໄຂ ຄຳ​ ຮ້ອງ​ຟ້ອງ, ຮ້ອງທຸກ ກ່ຽວ​ກັບວຽກ​ງານອາຫານ, ຢາ ແລະ ຜະລິດຕະພັນການແພດ ໂດຍສົມທົບກັບພາກສ່ວນກ່ຽວຂ້ອງຕາມຄວາມເໝາະສົມ;

17. ສະ​ຫຼຸບ​ຕີລາ​ຄາປະ​ເມີນ​ຜົນ, ສັງ​ລວມ ​ແລະ ​​​​​​ເຜີຍ​ແຜ່ຂໍ້​ມູນ​ສະ​ຖິ​ຕິ​ຮອບ​ດ້ານ​ກ່ຽວ​ກັບອາຫານ, ຢາ ແລະ ຜະ​ລິດ​ຕະ​ພັນ​ການ​ແພດ ໂດຍ​ການ​ຮ່ວມມືກັບ​ພາກ​ສ່ວນ​ທີ່​ກ່ຽວ​ຂ້ອງ;

ປະຕິບັດ​ໜ້າ​ທີ່​ ອື່ນ ໆ ​ຕາມ​ການ​ມອບ​ໝາຍ​ຂອງ​ລັດຖະມົນຕີ​ກະຊວງ​ສາທາລະນະ​ສຸກ