ຊົມເຊີຍວັນຄູ່ແຫ່ງຊາດຢ່າງສຸດໃຈ!; ຊົມເຊີຍວັນປະກາດເອກະລາດຢ່າງສຸດໃຈ!                                                                                                                                                                                                                                                                                                                                                                                                            ເພີ້ມຄວາມເຂັ້ມແຂງ ຂອງວຽກງານຄຸ້ມຄອງອາຫານ ແລະ ຢາ, ເພື່ອຈັດຕັ້ງປະຕິບັດວຽກງານເຊື່ອມໂຍງປະຊາຄົມເສດຖະກິດອາຊຽນຢ່າງມີປະສິດທິຜົນ.!                                                                                                                                                                                                       LAO  ENG 
 

ສະຖິຕິການຢ້ຽມຊົມ
 ກໍາລັງຊົມເວັບໄຊທ໌ໃນຂະນະນີ້ 7
 ມື້ນີ້ 45
 ມື້ວານນີ້ 112
 ເດືອນນີ້ 2,398
 ເດືອນແລ້ວນີ້ 3,847
 ປີນີ້ 40,581
 ປີກາຍນີ້ 39,132
 ທັງໝົດ 90,567

 

ຂ່າວສານ ອາຫານ ແລະ ຢາ


ການຮ່ວມມືລາວ-ຈີນ ດ້ານຢາພື້ນເມືອງ
ປະກາດໂດຍ: ສຸກສົມຄວນ ຈັນທະມາດ, ວັນທີ: 06/05/2017

ການຮ່ວມມືລາວ-ຈີນ ດ້ານຢາພື້ນເມືອງ

ບົດຂ່າວໂດຍ: ສຸກສົມຄວນ ຈັນທະມາດ (ກົມອາຫານ ແລະ ຢາ) 

          ກະຊວງສາທາລະນະສຸກ ໄດ້ຈັດພິທີເຊັນບົດບັນທຶກຄວາມເຂົ້າໃຈ ໃນວັນທີ 5 ພຶດສະພາ 2017 ລະຫວ່າງ ກົມອາຫານ ແລະ ຢາ ກະຊວງສາທາລະນະສຸກແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຮ່ວມກັບ ຄະນະກໍາມະການສາທາລະນະສຸກ ແລະ ການວາງແຜນຄອບຄົວ ເຂດປົກຄອງຕົນເອງ ກວາງຊີ ຈວງຈູ ແຫ່ງສາທາລະນະລັດ ປະຊາຊົນຈີນ ກ່ຽວກັບການຮ່ວມມືດ້ານຢາພື້ນເມືອງ. ພິທີເຊັນບົດບັນທຶກຄັ້ງນີ້ ໄດ້ໃຫ້ກຽດເປັນປະທານ ແລະ ສັກຂີພິຍານ ໂດຍທ່ານ ຮອງສາດສະດາຈານ ດຣ. ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ, ມີຜູ້ຕາງໜ້າຈາກຫ້ອງການກະຊວງ, ກົມອາຫານ ແລະ ຢາ, ກົມແຜນການ ແລະ ການຮ່ວມມືສາກົນ, ສະຖານບັນການແພດ ແລະ ການຢາພື້ນເມືອງ, ມະຫາວິທະຍາໄລ ວິທະຍາສາດ-ສຸຂະພາບ (ຄະນະເພສັດສາດ), ສູນຂ່າວສານການແພດ ແລະ ພະນັກງານທີ່ກ່ຽວຂ້ອງຂອງທັງສອງຝ່າຍ.

          ໃນການລົງນາມໃນບົດບັນທຶກຄວາມເຂົ້າໃຈຄັ້ງນີ້ ຝ່າຍ ລາວ ໂດຍແມ່ນທ່ານ ດຣ. ສົມທະວີ ຈາງວິສົມມິດ ຫົວໜ້າກົມອາຫານ ແລະ ຢາ ກະຊວງສາທາລະນະສຸກ, ສ່ວນຝ່າຍ ຈີນ ລົງນາມໂດຍ ທ່ານສາດສະດາຈານ ດຣ. ລີກົວຈຽນ ຫົວໜ້າຄະນະກໍາມະການສາທາລະນະສຸກ ແລະ ການວາງແຜນຄອບຄົວ ເຂດປົກຄອງຕົນເອງ ກວາງຊີ ຈວງຈູ.

          ການລົງນາມ MOU ແມ່ນການສືບຕໍ່ປະຕິບັດມູນເຊື້ອສາຍພົວພັນອັນດີງາມລະຫວ່າງສອງຊາດເພື່ອມິດຍຸດທະສາດທີ່ມີຄວາມສາມັກຄີຊ່ວຍເຫຼືອເຊິ່ງກັນມາແຕ່ດົນນານ, ໃນດ້ານສາທາລະນະສຸກ ແມ່ນການຜັນຂະຫຍາຍເນື້ອໃນຈິດໃຈຂອງ ບົດບັນທຶກຄວາມເຂົ້າໃຈລະຫວ່າງກະຊວງສາທາລະນະສຸກ ແຫ່ງ ສປປ ລາວ ແລະ ຄະນະກໍາມະການສາທາລະນະສຸກ ແລະ ການວາງແຜນຄອບຄົວ ແຫ່ງ ສປ ຈີນ ວ່າດ້ວຍການຮ່ວມມືດ້ານສາທາລະນະສຸກທີ່ສອງຝ່າຍໄດ້ເຊັນ ທີ່ນະຄອນຫຼວງ ປັກກິ່ງ ສປຈີນ ໃນຄັ້ງວັນທີ 14 ຕຸລາ 2013 ເຊິ່ງເນື້ອໃນບົດບັນທຶກຂອງການຮ່ວມມື ແມ່ນໄດ້ລະບຸການຮ່ວມມືດ້ານການແພດ ແລະ ການຢາພື້ນເມືອງ ຂອງທັງສອງຝ່າຍ. ການຈັດຕັ້ງປະຕິບັດຜ່ານມາ ກໍ່ໄດ້ມີການເສີມຂະຫຍາຍການພົວພັນຢ່າງໃກ້ຊິດລະຫວ່າງ ກົມອາຫານ ແລະ ຢາ, ສະຖານບັນການແພດ ແລະ ການຢາພື້ນເມືອງ ກັບຄະນະກໍາມະການສາທາລະນະສຸກ ແລະ ການວາງແຜນຄອບຄົວ ເຂດປົກຄອງຕົນເອງ ກວາງຊີ ຈວງຈູ ໂດຍສະເພາະແມ່ນການຢ້ຽມຢາມທັດສະນະສຶກສາຝຶກອົບຮົມພະນັກງານ ແລະ ໄດ້ມີບົດບັນທຶກຮ່ວມມືໃນດ້ານການອະນຸລັກ ແລະ ນໍາໃຊ້ແຫຼ່ງຊັບພະຍາກອນທໍາມະຊາດທີ່ເປັນຢາ ຊຶ່ງໄດ້ລົງນາມໃນຄັ້ງວັນທີ 28 ເດືອນ 1 ປີ 2016 ທີ່ນະຄອນຫຼວງວຽງຈັນ ລະຫວ່າງ ສະຖານບັນການແພດ ແລະ ການຢາພື້ນເມືອງ ກະຊວງສາທາລະນະສຸກ ແລະ ສ່ວນພຶກສາສາດ ໂບຕານິກ ກວາງຊີ ຈວງຈຸ.

          ການເຊັນບົດບັນທຶກຄັ້ງນີ້ ຈະເປັນພື້ນຖານອັນສໍາຄັນໃຫ້ແກ່ການຮ່ວມມື ໃນສະເພາະໜ້າ ແລະ ຍາວນານ ກ່ຽວກັບການສ້າງບຸກຄະລາກອນ, ການປັບປຸງພື້ນຖານໂຄງລ່າງ, ການສ້າງຄວາມເຂັ້ມແຂງວຽກງານຄົ້ນຄ້ວາ ແລະ ວຽກງານປົກປັກຮັກຊັບພະຍາກອນທໍາມະຊາດທີ່ເປັນຢາ ແລະ ການນໍາໃຊ້ຊັບພະຍາກອນທໍາມະຊາດເພື່ອຜະລິດເປັນຜະລິດຕະພັນຮັບໃຊ້ສັງຄົມແບບຢືນຍົງ. 

ຮູບພາບພິທີເຊັນບົດບັນທຶກຄວາມເຂົ້າໃນ ເຊັນໂດຍທ່ານ ສາດສະດາຈານ ດຣ. ລີກົວຈຽນ (ຊ້າຍມື) ກັບທ່ານດຣ. ສົມທະວີ ຈາງວິສົມມິດ (ຂວາມື)