ຈຸດປະສົງຂອງກອງປະຊຸມໃນຄັ້ງນີ້ແມ່ນ ເພື່ອສ້າງຄວາມເຂັ້ມແຂງໃຫ້ແກ່ວຽກງານຄຸ້ມຄອງຢາ ແລະ ວັກຊີນ ເພື່ອຮັບປະກັນຄຸນນະພາບ, ຄວາມປອດໄພ ແລະ ປະສິດທິພາບໃນການນຳໃຊ້ຢາ ແລະ ວັກຊິນ ເຊິ່ງການປະເມີນໂດຍນຳໃຊ້ເຄື່ອງມື ແລະ ແບບຟອມຂອງອົງການອະນາໄມໂລກ.

ກອງປະຊຸມໄດ້ສະເໜີກ່ຽວກັບແບບຟອມມາດຕະຖານຂອງອົງການອະນາໄມໂລກສຳລັບການປະເມີນການຄຸ້ມຄອງດ້ານຢາ ຫຼື WHO-GBT, ລະບົບການຄຸ້ມຄອງດ້ານຢາ ແລະ ວັກຊີນ(National Regulatory System, NRS), ວຽກງານການອອກອະນຸຍາດສູ່ຕະຫຼາດ (Registration and Marketing Authorization (MA)) ແລະ ການທົດລອງດ້ານຄລີນິກ(Clinical Trials Oversight, CT), ການເຝົ້າລະວັງຄວາມປອດໄພດ້ານຢາ(Pharmacovigilance (PV)), ການຕິດຕາມການກວດກາຜະລິດຕະພັນຢູ່ທ້ອງຕະຫຼາດ (Market Surveillance and Control, MC), ການອະນຸຍາດດ້ານທະບຽນວິຊາຊີບເພສັດຊະກຳ(Licensing Establishment, LI), ການກວດກາ (Regulatory inspection, RI), ຫ້ອງທົດລອງວິໄຈ (Laboratory testing, LT) ແລະ ການປ່ອຍຊຸດຜະລິດວັກຊີນ (NRA Lot release, LR). ຈາກນັ້ນໄດ້ລົງຢ້ຽມຢາມ ແລະ ເຮັດວຽກນຳສູນສຸຂະພາບແມ່ ແລະ ເດັກ ແລະ ສູນວິໄຈອາຫານ ແລະ ຢາ ກະຊວງສາທາລະນະສຸກ ເພື່ອຮັບຮູ້ສະພາບລວມຂອງການເຮັດວຽກຂອງແຕ່ລະສະຖານທີ່ ແລະ ໄດ້ແບ່ງເປັນກຸ່ມເພື່ອປະກອບຂໍ້ມູນ ແລະ ເອກະສານອ້າງອີງຕ່າງໆໃສ່ແບບຟອມມາດຕະຖານຂອງອົງການອະນາໄມໂລກສຳລັບການປະເມີນການຄຸ້ມຄອງດ້ານຢາ ແລະ ວັກຊີນ ຫຼື WHO-GBT.

ຫຼັງຈາກນັ້ນທ່ານປະທານກອງປະຊຸມໄດ້ກ່າວມີຄຳເຫັນ ແລະ ກ່າວສະຫຼຸບກອງປະຊຸມຄັ້ງນີ້ເຊິ່ງມີຄວາມສໍາຄັນເຮັດໃຫ້ພະນັກງານມີຄວາມເຂົ້າໃຈໃນການນຳໃຊ້ ແບບຟອມຂ້າງເທິງນັ້ນ ເພື່ອສ້າງຄວາມເຂັ້ມແຂງໃຫ້ແກ່ເຈົ້າໜ້າທີ່ໃນການປະຕິບັດວຽກງານຄຸ້ມຄອງດ້ານຢາ ແລະ ວັກຊີນ ແລະ ກຽມພ້ອມເຂົ້າສູ່ການປະເມີນຢ່າງເປັນທາງການໃນຕໍ່ໜ້າ.