ກອງປະຊຸມຄະນະກຳມະການຄຸ້ມຄອງເຄື່ອງສຳອາງອາຊຽນ ຄັ້ງທີ 28 ແລະ ບັນດາກອງປະຊຸມທີ່ກ່ຽວຂ້ອງ ທີ່ ສປປ ລາວເປັນເຈົ້າພາບ ໄດ້ເປີດຂຶ້ນໃນວັນທີ 3 ພຶດສະພາ 2018 ທີ່ໂຮງແຮມ ຄຣາວ ພລາຊາ ນະຄອນຫຼວງວຽງຈັນ, ຊຶ່ງໃຫ້ກຽດເປັນປະທານ ກ່າວເປີດພິທີກອງປະຊຸມໂດຍ ທ່ານ ດຣ. ສົມ​ທະວີ  ຈາງ​ວິ​ສົມ​ມິດ ຫົວໜ້າ​ກົມ​ອາຫານ ​ແລະ ຢາ. ກອງປະຊຸມດັ່ງກ່າວແມ່ນດຳເນີນໄປເປັນເວລາ 4 ວັນແຕ່ວັນທີ່ 1 ເຖິງ 4 ພຶດສະພາ 2018 ໂດຍມີແຂກເຂົ້າຮ່ວມຈາກ 10 ປະເທດສະມາຊິກອາຊຽນລວມທັງ ສປປ ລາວ, ນອກຈາກ​ນັ້ນ ຍັງ​ມີ​ຜູ້ຕາງໜ້າ​ຈາກ​ກອງ​ເລຂາ​ອາ​ຊຽນ ​ແລະ ສະມາຄົມ​ເຄື່ອງ​ສຳອາງ​ອາ​ຊຽນ​ເຂົ້າ​ຮ່ວມ ນັບທັງພາກລັດ ແລະ ຜູ້ປະກອບການທັງໝົດ 140 ທ່ານ. ຈຸດປະສົງຂອງກອງປະຊຸມຄັ້ງນີ້ແມ່ນ:

- ເພື່ອແລກປ່ຽນ ແລະ ຖອດຖອນບົດຮຽນ ກ່ຽວກັບການຈັດຕັ້ງປະຕິບັດ ຕາມທິດນຳໃນການຄຸ້ມຄອງຜະລິດຕະພັນເຄື່ອສຳອາງ [ASEAN Cosmetic Directives (ACD)] ​ ກັບບັນດາປະເທດສະມາຊິກອາຊຽນ, ໂດຍສະເພາະແມ່ນລະບົບການຈົດແຈ້ງຜະລິດຕະພັນເຄື່ອງສຳອາງ.

- ເພື່ອຄົ້ນຄວ້າ ແລະ ມີຄຳເຫັນໃນການສ້າງ ມາດຕະຖານເຄື່ອງສຳອາງໃຫ້ເປັນເອກະພາບກັນໂດຍອີງໃສ່ມາດຕະຖານຂອງ EU ແລະ ສາກົນ ເປັນບ່ອນອີງ.

- ເພື່ອສືບຕໍ່ປຶກສາຫາລືໃນການສ້າງເອກະສານລະບຽບການອາຊຽນ, ສ້າງຄວາມເສື່ອມສານດ້ານການຄຸ້ມຄອງເຄື່ອງສຳອາງໃນຂົງເຂດ ແລະ ຜັນຂະຫຍາຍການຈັດຕັ້ງປະຕິບັດທິດນຳອາຊຽນກ່ຽວກັບເຄື່ອງສຳອາງ[ASEAN Cosmetic Directives (ACD)] ຢ່າງມີປະສິດທິຜົນ.

ໃນວາລະກ່າວເປີດກອງປະຊຸມດັ່ງກ່າວ ທ່ານ ດຣ. ສົມ​ທະວີ ຈາງ​ວິ​ສົມ​ມິດ ຫົວໜ້າ​ກົມ​ອາຫານ ​ແລະ ຢາ ທ່ານໄດ້ສະແດງຄວາມຊົມເຊີຍຕໍ່ກອງປະຊຸມຄັ້ງນີ້, ຊຶ່ງ ສປປ ລາວໄດ້ຮັບກຽດໃຫ້ເປັນເຈົ້າພາບຈັດກອງປະຊຸມຄະນະກຳມະການຄຸ້ມຄອງເຄື່ອງສຳອາງອາຊຽນຄັ້ງນີ້ເປັນຄັ້ງທີ່ 3 ແລ້ວ ແລະ ສະແດງຄວາມຊົມ ເຊີຍ ຕໍ່ຜົນສຳ​ເລັດຂອງກອງປະຊຸມຄັ້ງທີ່ 27 ທີ່ຜ່ານມາທີ່​ໄດ້​ຈັດ​ຂຶ້ນຢູ່ບັນ​ດຸງ ປະເທດອິນໂດເນເຊຍ, ທ່ານຍັງໄດ້ກ່າວຕື່ມວ່າ: ວຽກ​ງານ​ຄຸ້ມ​ຄອງ​ເຄື່ອງ​ສຳອາງ​ເປັນໜ້າ​ທີ່ ​ແລະ ຄວາມ​ຮັບຜິດ ຊອບ​ຂອງ​ຂະ​ແໜງ​ສາທາລະ ນະ​ສຸກ ​ເຊິ່ງ​ໄດ້​ມີ​ຫຼາຍ​ໜ້າ​ວຽກ​ເປັນ​ສິ່ງ​ທີ່​ທ້າ​ທາຍ ​ແລະ ຮີບ​ຮ້ອນ​ໃຫ້​ມີ​ລະບົບ​ການ​ຄຸ້ມ​ຄອງ​ດ້ານ​ນີ້ ​ເພື່ອ​ເຮັດ​ໃຫ້ການ​ຈັດ​ຕັ້ງ​ປະຕິບັດ​ເປັນ​ເອກະ​ພາບ​ກັນ. ປະຈຸບັນ ໃນບາງປະເທດສະມາຊິກອາຊຽນມີເຄື່ອງສຳອາງຫຼາຍ ກ່ວາ 600.000 ລາຍການທີ່ໄດ້ຮັບການຈົດແຈ້ງ, ຕະຫຼາດ​ເຄື່ອງ​ສຳອາງ​​ແມ່ນ​ມີ​ທ່າ​ອ່ຽງຂະຫຍາຍນັບ​ມື້​ຫຼາຍ​ຂຶ້ນ. ສະ​ນັ້ນ ຈຶ່ງ​ຈຳ​ເປັນ​ຕ້ອງ​ມີ​ມາດຕະຖານ​ເພື່ອ​ຄວບ​ຄຸນມດ້ານ​ຄຸນ​ນະພາ​ບ ​ໃຫ້​ສອດຄ່ອງກັບ​ພາກ​ພື້ນ ​ແລະ ສາກົນ ໂດຍຜ່ານຄະນະກຳມະການວິທະຍາສາດ​ດ້ານ​ເຄື່ອງ​ສຳອາງອາ​ຊຽນ [(ASEAN Cosmetic Scientific Body) ACSB] ແລະ ຄະນະ​ກຳມະການ​ທົດ​ລອງ​ດ້ານ​ເຄື່ອງ​ສຳອາງ​ອາ​ຊຽນ [(ASEAN Cosmetic Testing Laboratory)ACTLC] ​ເພື່ອ​ຮັບປະກັນ​ຄວາມ​ປອດ​ໄພ​ແກ່​ຜູ້​ຊົມ​ໃຊ້.

ໃນວາລະກອງປະຊຸມທີ່ ສປປ ລາວ ເປັນເຈົ້າພາບກໍ່ຄືກອງປະຊຸມ ACC ຄັ້ງທີ່ 28 ນີ້ຍັງມີກອງປະຊຸມກ່ຽວຂ້ອງອີກຈຳນວນໜຶ່ງ ເຊິ່ງຈັດຂຶ້ນກ່ອນໜ້າ 2 ວັນ ທີ່ກອງປະຊຸມໃຫຍ່ຂອງຄະນະກຳມະການເຄື່ອງສຳອາງອາຊຽນຈະຈັດຂຶ້ນເຊັ່ນ: ກອງປະຊຸມຄະນະກຳມະການວິທະຍາສາດ​ດ້ານ​ເຄື່ອງ​ສຳອາງອາ​ຊຽນ [(ASEAN Cosmetic Scientific Body) ACSB] ຄັ້ງທີ່ 28 ແລະ ກອງປະຊຸມ ຄະນະ​ກຳມະການ​ທົດ​ລອງ​ດ້ານ​ເຄື່ອງ​ສຳອາງ​ອາ​ຊຽນ [(ASEAN Cosmetic Testing Laboratory)ACTLC] ຄັ້ງທີ່ 11 ແລະ ກອງປະຊຸມຫົວໜ້າຜູ້ແທນຂອງຄະນະກຳມະການເຄື່ອງສຳອາງອາຊຽນ (Head of Delegate Meeting).

ຄາດ​ຄະ​ເນ​ຜົນ​ທີ່​ຈະ​ໄດ້​ຮັບ​ຈາກ​ກອງ​ປະຊຸມ​ຄັ້ງ​ນີ້ ຈະ​ໄດ້​ຮັບ​ຟັງ​ການ​ລາຍ​ງານ​ຄວາມ​ຄືບ​ໜ້າ​ຂອງ​ແຕ່ລະ​ປະ​ເທດ​ໃນ​ການຈັດ​ຕັ້ງ​ປະຕິບັດ​ທິດ​ນຳ​ທາງ​ດ້ານ​ການ​ຄຸ້ມ​ຄອງ​ຜະລິດ​ຕະພັນ​ເຄື່ອງ​ສຳອາງ, ​ໄດ້ສືບ​ຕໍ່​ສ້າງ​ຄູ່​ມື​ດ້ານ​ຂໍ້​ມູນ​ຂ່າວສານ​ແກ່​ຜູ້​ຊົມ​ໃຊ້​ຜະລິດ​ຕະພັນ​ເຄື່ອງ​ສຳອາງ, ​ໄດ້ຮັບ​ຟັງ​ຜົນ​ຂອງ​ການ​ຕິດຕາມ​ດ້ານ​ຄຸນ​ນະພາ​ບຫຼັງ​ການຈຳໜ່າຍ, ພ້ອມ​ທັງ​ຈະ​ໄດ້ທົບ​ທວນ​ແຜນ​ວຽກ​ລວມ ​ແລະ ​ແຜນ​ວຽກ​ປະຈຳ​ປີ​ກ່ຽວ​ກັບ​ການ​ຄຸ້ມ​ຄອງ​ເຄື່ອງ​ສຳອາງ​ໃນ​ຕໍ່ໜ້າ.

ສຳລັບກອງປະຊຸມຄະນະກມະການວິທະຍາສາດດ້ານເຄື່ອງສຳອາງອາຊຽນ ຫຼື ACSB ແມ່ນຈະມີການຮັບຮອງບາງມາດຕະຖານ ແລະ ກຳນົດໝາຍຂອງຂອບເຂດອະນຸຍາດ ຫຼື ຫ້າມບາງທາດທີ່ມີຄວາມອັນຕະລາຍຕໍ່ສຸຂະພາບ ເຊິ່ງນຳໃຊ້ເຂົ້າໃນສ່ວນປະກອບຂອງຜະລິດຕະພັນເຄື່ອງສຳອາງ. ນອກນັ້ນ ຍັງໄດ້ທົບທວນຄືນບາງເອກະສານຄັດຕິດ ຫຼື ບັນຊີສ່ວນປະກອບຂອງຜະລິດຕະພັນເຄື່ອງສຳອາງທີ່ມີຜົນບັງຄັບໃຊ້ຜ່ານມາໃນທິດນຳຂອງອາຊຽນດ້ານເຄື່ອງສຳອາງ ແລະ ທົບທວນບາງວຽກທີ່ພົວພັນກັບການຄຸ້ມຄອງເຄື່ອງສຳອາງ ໂດຍອີງໃສ່ລະບຽບການຂອງສາກົນ ຫຼື EU.

ສຳລັບກອງປະຊຸມຄະນະກຳມະການທົດລອງດ້ານເຄື່ອງສຳອາງອາຊຽນ ຫຼື ACTLC ແມ່ນໄດ້ແຈ້ງກ່ຽວກັບໂຄງການຊ່ວຍເຫຼືອ ຈາກຊ່ຽວຊານດ້ານເຄື່ອງສຳອາງໃນການກວດກາວິໃຈຄຸນນະພາບ ໂດຍສະເພາະຈາກ ສ. ເກົາຫຼີ ຈະໄດ້ຮັບຮອງວິທີການໃໝ່ໃນການກວດກາຄຸນນະພາບຂອງເຄື່ອງສຳອາງ ແລະ ການພັດທະນາຄວາມສາມາດໃນການປະຕິບັດຫ້ອງທດລອງຂອງບັນດາປະເທດໃນກຸ່ມອາຊຽນ ໂດຍຜ່ານການກວດກາວິໃຈຜະລິດຕະພັນດຽວກັນ ໂດຍເໜັ້ນໃສ່ເປົ້າໝາຍຄວາມຊັດເຈນຂອງຜົນກວດກາວິໃຈຜະລິດຕະພັນເຄື່ອງສຳອາງ ( Proficiency Testing ) ໃນຜະລິດຕະພັນປ້ອງກັນແສງແດດ ແລະ Salicilic ອາຊິດ ໂດຍນໃຊ້ເຄື່ອງ HPLC ນອກນັ້ນ ຜູ້ແທນເຂົ້າຮ່ວມກອງປະຊຸມຍັງຈະໄດ້ໄປຢ້ຽມຢາມ ສູນວິໃຈຄຸນນະພາບອາຫານ ແລະ ຢາ ຂອງ ສ ປປ ລາວ.

ກອງ​ປະຊຸ​ມະ​ໄດ້​ຮັບຮອງ ​ແລະ ​ເອ​ກະພາບ​ດ້ານ​ວິຊາ​ການ​ເຄື່ອງ​ສຳອາງ​ອາ​ຊຽນ​ເພື່ອ​ໃຫ້​ມີ​ຄວາມ​ເຊື່ອມສານ ​ແລະ ​ເປັນ​ບ່ອນ​ອີງ​ໃນ​ການຈັດ​ຕັ້ງ​ປະຕິບັດ ​ໃນ​ລະບົບ​ການ​ຄຸ້ມ​ຄອງ​ເຄື່ອງ​ສຳອາງ ຂອງ​ບັນດາ​ປະ​ເທດ​ໃນ​ກຸ່ມ​ອາ​ຊຽນ.