ບົດຂ່າວໂດຍ: ນ. ກອງມະນີ ນາມມະວົງມີໄຊ

ກອງປະຊຸມການຮ່ວມມື 2 ຝ່າຍລະຫວ່າງລາວ-ໄທ ຄັ້ງທີ III ກ່ຽວກັບວຽກງານອາຫານ ແລະ ຢາ   ໄດ້ເປີດຂຶ້ນໃນວັນທີ 2 ສິງຫາ 2018 ທີ່ໂຮງແຮມ ລາວພລາຊາ ນະຄອນຫຼວງວຽງຈັນ, ຊຶ່ງໃຫ້ກຽດເປັນປະທານຮ່ວມ ແລະ ກ່າວເປີດພິທີກອງປະຊຸມໂດຍ ທ່ານ ດຣ. ສົມ​ທະວີ  ຈາງ​ວິ​ສົມ​ມິດ ຫົວໜ້າ​ກົມ​ອາຫານ ​ແລະ ຢາ ແລະ ທ່ານ ດຣ. ວັນໄຊ ຊັດຕະຍາວຸດທິພົງ ເລຂາທິການ ຄະນະກຳມະການອາຫານ ແລະ ຢາແຫ່ງຣາຊະອານະຈັກໄທ ໂດຍມີແຂກເຂົ້າຮ່ວມທັງໝົດ 26 ທ່ານ ຈາກກະຊວງສາທາລະນະສຸກ ສປປ ລາວ 20 ທ່ານ ແລະ ຈາກຣາຊະອານະຈັກໄທ 6 ທ່ານ. ຈຸດປະສົງຂອງກອງປະຊຸມໃນຄັ້ງນີ້ ແມ່ນເພື່ອສືບຕໍ່ທົບທວນຄືນການຈັດຕັ້ງປະຕິບັດໃນໄລຍະຜ່ານມາກ່ຽວກັບວຽກງານການຮ່ວມມືພາຍຫຼັງທີ່ກະຊວງສາທາລະນະສຸກຂອງທັງສອງຝ່າຍໄດ້ລົງນາມໃນບົດບັນທຶກຄວາມຊົງຈໍາກ່ຽວກັບການຮ່ວມມືສາທາລະນະສຸກ ແລະ ໂດຍສະເພາະບົດບັນທຶກກອງປະຊຸມການປຶກສາຫາລື ການຮ່ວມມືລາວ-ໄທຄັ້ງທີ 2ລະຫວ່າງ ກົມອາຫານ ແລະ ຢາ ແລະ ອົງການຄຸມຄອງອາຫານ ແລະ ຢາ ລາດຊະອານະຈັກໄທ ກ່ຽວກັບວຽກງານຄຸ້ມຄອງອາຫານ ແລະ ຢາ ແລະ ສືບຕໍ່ປຶກສາຫາລືແຜນວຽກກິດຈະກຳການຮ່ວມມືໃນຕໍ່ໜ້າກ່ຽວກັບວຽກງານຄຸ້ມຄອງອາຫານ, ຢາ ແລະ ຜະລິດຕະພັນການແພດ.

ຜົນໄດ້​​ຈະ​ໄດ້ຂອງ​ກອງ​ປະຊຸມຄັ້ງນີ້ ທັງສອງຝ່າຍໄດ້ຄົ້ນຄ້ວາ ແລະ ເປັນເອກພາບກໍານົດກອບແຜນງານ ແລະ ກິດຈະກໍາທີ່ຈະຮ່ວມມືປະຕິບັດໃນປີ 2018-2020 ແລະ ໄດ້ກໍານົດຜູ້ປະສານງານຂອງແຕ່ລະວຽກງານ ເພື່ອສະດວກໃຫ້ແກ່ການຮ່ວມມືປະສານງານ ເປັນຕົ້ນ: ວຽກງານຄຸ້ມຄອງອາຫານ, ຄຸ້ມຄອງຢາຫຼວງ, ຢາພື້ນເມືອງ, ເຄື່ອງສໍາອາງ, ຂໍ້ມູນຂ່າວສານອາຫານ ແລະ ຢາ ແລະ ອື່ນໆ. ນອກຈາກນີ້ ຝ່າຍໄທຍິນດີແຈ້ງໃຫ້ ສປປ ລາວ ໂດຍສະເພາະແມ່ນກົມອາຫານ ແລະ ຢາຮັບຮູ້ພິເສດຕື່ມ ກ່ຽວກັບຜະລິດຕະພັນອາຫານ, ຢາ ແລະ ຜະລິດຕະພັນການແພດທີ່ຜະລິດ ແລະ ຈຳໜ່າຍຢູ່ໄທ ທີ່ເຫັນວ່າບໍ່ປອດໄພ ຕໍ່ຜູ້ບໍລິໂພກ ເພື່ອຖອນອອກຈາກຕະຫຼາດ ເພື່ອແລກປ່ຽນຂໍ້ມູນຂ່າວສານດ້ານຄວາມປອດໄພອາຫານ ແລະ ຢາ.