ກອງປະຊຸມອົບຮົມການນໍາໃຊ້ຄູ່ມືຂອງອົງການອະນາໄມໂລກກ່ຽວກັບການເຝົ້າລະວັງການຊົມໃຊ້ຢາຕ້ານເຊື້ອໄດ້ຈັດຂຶ້ນທີ່ ໂຮງແຮມລາວພລາຊາ ໃນລະຫວ່າງວັນທີ 17-19 ກັນຍາ 2018,  ໂດຍການເປັນປະທານເປີດຂອງທ່ານ ດຣ. ສົມທະວີ ຈາງວິສົມິດ ຫົວໜ້າກົມອາຫານ ແລະ ຢາ,​ ແລະ ມີຜູ້ຕ່າງໜ້າຈາກອົງການອະນາໄມໂລກ ປະຈໍາ ສປປ ລາວ ແລະ ທີມງານຄູ່ຝຶກຈໍານວນໜຶ່ງທີ່ມາຈາກສໍານັກງານໃຫຍ່ອົງການອະນາໄມໂລກ ເຈນີວາ.​ ການອົບຮົມມີຜູ້ເຂົ້າຮ່ວມຈາກກົມຄວບຄຸມພະຍາດຕິດຕໍ່, ຫ້ອງການປະກັນສຸຂະພາບ, ບັນດາສູນ (ສູນສະໜອງຢາ, ສູນຕ້ານເອ໌ສ, ສູນໄຂ້ຍຸງແມ່ກາຝາກ ແລະ ແມງໄມ້, ສູນວັນນະໂລກ, ສູນແມ່ ແລະ ເດັກ), ກອງກວດກາອາຫານ ແລະ ຢາ, ຄະນະເພສັດສາດ, ຄະນະແພດສາດ, ຄະນະພະຍາບານສາດ, 5 ໂຮງໝໍສູນກາງ, ພາກຂະແໜງການທີ່ກ່ຽວຂ້ອງ ໃນການຈັດຕັ້ງປະຕິບັດວຽກງານນີ້ເປັນຕົ້ນ: ກົມລ້ຽງສັດ ແລະ ການປະມົງ, ກົມພາສີ, ກົມການນຳເຂົ້າ-ສົ່ງອອກ, ເສນາຮັກ ກະຊວງປ້ອງກັນປະເທດ, ເສນາຮັກ ກະຊວງປ້ອງກັນຄວາມສະຫງົບ, ໂຮງໝໍ 103, ໂຮງໝໍ 5 ເມສາ ແລະ ຄູ່ຮ່ວມງານທີ່ມາຈາກ ກອງທຶນໂລກ ແລະ FAO.

 ຈຸດປະສົງແມ່ນເພື່ອ ອົບຮົມການນໍາໃຊ້ຄູ່ມືຂອງອົງການອະນາໄມໂລກກ່ຽວກັບການເຝົ້າລະວັງການຊົມໃຊ້ຢາຕ້ານເຊື້ອ ໃຫ້ແກ່ພະນັກງານທີ່ກ່ຽວຂ້ອງ. ໃນວາລະກ່າວເປີດຊຸດອົບຮົມ, ທ່ານດຣ. ສົມທະວີ ຈາງວີສົມມີດ ໄດ້ ກ່າວຈຸດປະສົງ, ຄວາມໝາຍຄວາມສໍາຄັນຂອງຊຸດອົບຮົມຄັ້ງນີ້ ແລະ ໄດ້ຮຽກຮອງໃຫ້ທຸກພາກສ່ວນທີ່ເຂົ້າຮ່ວມຈົ່ງໄດ້ເອົາໃຈໃສ່ ແລະ ຕັ້ງໃຈ ເກັບກ່ຽວບົດຮຽນຈາກການອົບຮົມໃນຄັ້ງນີ້ ເຊິ່ງມັນເປັນພັນທະທີ່ຈະຕ້ອງໄດ້ນໍາເຂົ້າໃນພາກປະຕິບັດຕົວຈິງໃນວຽກງານ ໂດຍສະເພາະແຕ່ລະພາກສ່ວນທີ່ກ່ຽວຂ້ອງໃນການໃຫ້ການບໍລີການດ້ານສຸຂະພາບທັງພາກລັດ ແລະ ເອກະຊົນ ຈະຕ້ອງໄດ້ຮ່ວມມືກັບ ເກັບກໍາຂໍ້ມູນກ່ຽວກັບການນໍາໃຊ້ຢາຕ້ານເຊື້ອລາຍງານ ໃຫ້ແກ່ສາກົນໃນແຕ່ລະໄລຍະຕາມຂັ້ນຕອນ ແລະ ວິທີການຂອງຄູ່ມືດັ່ງກ່າວ. ທ່ານຍັງໄດ້ສະແດງຄວາມຂອບໃຈມາຍັງອົງການອະນາໄມໂລກ ເຊິ່ງແມ່ນຄູ່ຮ່ວມງານຫຼັກທີ່ໄດ້ໃຫ້ການຊ່ວຍເຫຼືອແກ່ວຽກງານສາທາລະນະສຸກ ໂດຍສະເພາະວຽກງານອາຫານ ແລະ ຢາ.

 ການຈັດຊຸດອົບຮົມຄັ້ງນີ້ ແມ່ນການສະໜອງຕອບຕໍ່ແຜນງານທີ່ໄດ້ຕົກລົງເຫັນດີໃນກອງປະຊຸມສະພາສຸຂະພາບໂລກຄັ້ງທີ່ 68 ທີ່ໄດ້ຈັດຂຶ້ນໃນເດືອນ ພຶດສະພາ ປີ 2015 ຊຶ່ງບັນດາປະເທດສະພາຊິກແມ່ນໄດ້ຮັບຮອງເອົາແຜນການຈັດຕັ້ັງປະຕິບັດວຽກງານຂອງໂລກກ່ຽວກັບການຕ້ານຂອງເຊື້ອພະຍາດດື້ຕໍ່ຢາຕ້ານເຊື້ອຮ່ວມກັນ ແລະ ກອງປະຊຸມໄດ້ຮຽກຮ້ອງໃຫ້ບັນດາປະເທດສະມາຊິກນໍາເອົາແຜນງານດັ່ງກ່າວໄປຈັດຕັ້ງປະຕິບັດຢູ່ໃນປະເທດຂອງຕົນ ເພື່ອປັບໃຫ້ກັບສະພາບການຕົວຈິງຂອງແຕ່ລະປະເທດ. ໃນແຜນປະຕິບັດງານການຕ້ານຂອງເຊື້ອພະຍາດດື້ຕໍ່ຢາຂອງໂລກນີ້ ປະກອບມີ 5 ບຸລິມະສິດອົງປະກອບຄື: 1) ເພີ້ມຄວາມຮັບຮູ້ ແລະ ເຂົ້າໃຈກ່ຽວກັບການຕ້ານຕໍ່ເຊື້ອພະຍາດຕໍ່ຢາຕ້ານເຊື້ອ; 2) ສ້າງຄວາມເຂັ້ມແຂງໃຫ້ແກ່ວຽກງານການເຝົ້າລະວັງ ແລະ ເຮັດການສຶກສາຄົ້ນຄ້ວາ; 3) ຫຼຸດຜ່ອນອັດຕາຂອງການຕິດຊື້ອ; 4) ເພີ້ມປະສິດທິພາບການໃຊ້ຢາຕ້ານເຊື້ອ ແລະ 5) ຮັບປະກັນການລົງທຶນແບບຢືນຢົງໃຫ້ແກ່ວຽກງານຕ້ານຂອງເຊື້ອພະຍາດດື້ຕໍ່ຢາຕານເຊື້ອ. ໂດຍສະເພາະອົງປະກອບທີ 4 ແມ່ນໄດ້ຮັບຮອງໃຫ້ບັນດາປະເທດສະມາຊິກມີ  “ໂຄງການຕິດຕາມກວດກາ ແລະ ສົ່ງເສີມ ການນໍາໃຊ້ຢາຕ້ານເຊື້ອຢ່າງມີປະສິີດທີິພາບໃນລະດັບຊາດ ແລະ ລະດັບທ້ອງຖິ່ນ” ຕາມມາດຕະຖານສາກົນ ເພື່ອຮັບປະກັນການຄັດເລືອກຢາທີ່ຖືກຕ້ອງເໝາະສົມໂດຍອີງໃສ່ຫຼັກຖານຕົວຈິວ.​ ດັ່ງນັ້ນ, ອົງປະກອບທີສໍາຄັນຂອງແຜນການຈັດຕັ້້ງປະຕິບັດຂອງໂລກກ່ຽວກັບການຕ້ານຕໍ່ເຊື້ອພະຍາດດື້ຕໍ່ຢານີ້ ແມ່ນການຕິດຕາມການຊົມໃຊ້ຢາຕ້ານເຊື້ອ, ເຊິ່ງທຸກປະເທດຕ້ອງໄດ້ມີຂໍ້ມູນກ່ຽວກັບການນໍາເຂົ້າ, ຈັດຊື້-ຈັດຫາ, ການແຈກຢາຍຢາ ຫຼື ການນໍາໃຊ້ຢາຕ້ານເຊື້ອເຂົ້າໃນການປິ່ນປົວໃນເຂດຊຸມຊົນ ເພື່ອຈະເປັນຂໍ້ມູນພື້ນຖານສົມທຽບການໃຊ້ໃຊ້ຢ່າງຢ່າງສົມເຫດສົມເຫດສົມຜົນຂອງບັນດາປະເທດສະມາຊິກ. ດັ່ງນັ້ນ, ຄູ່ມືຂອງອົງການອະນາໄມໂລກກ່ຽວກັບການເຝົ້າລະວັງການຊົມໃຊ້ຢາຕ້ານເຊື້ອ ຈຶ່ງໄດ້ຮັບການພັດທະນາຂຶ້ນ ຈັດຕັ້ງການອົບຮົມເຜີຍແຜ່ເພື່ອໃຫ້ກໍາຂໍ້ມູນໃນຂອດນໍາເຂົ້າ ໂດຍນໍາໃຊ້ເຄື່ອງມືທີ່ມີ ແຕ່ຂໍ້ມູນທີ່ໄດ້ຢັງບໍ່ມີຄວາມຊັນເຈນ ແລະ ຕອບສະໜອງໄດ້ຕາມຄວາມຮຽກຕ້ອງຕ້ອງການ ໂດຍສະເພາະການຊົມໃຊ້ຢາຕົວຈິງຈາກສະຖານບໍລິການທັງພາກລັດ ແລະ ເອກະຊົນ.