ສາທາ ມີຫຼາຍຕົວຊີ້ວັດທີ່ບໍ່ບັນລຸໄດ້ຕາມເປົ້າໝາຍ

ບົດຂ່າວຈາກໜັງສືພິມວຽງຈັນໃໝ່ສະບັບວັນທີ 27 ກຸມພາ 2019

 ກອງ​ປະ​ຊູມ​ສະ­ຫຼຸບ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ສາ­ທາ­ລະ­ນະ​ສຸກ​ປີ 2018 ແລະ ທິດ​ທາງ​ແຜນ­ການ​ປີ 2019 ຈັດ​ຂຶ້ນ​ວັນ​ທີ 26-28 ກຸມ­ພາ 2019 ທີ່​ຫໍ​ປະ­ຊຸມ​ແຫ່ງ​ຊາດ ເປັນ​ປະ­ທານ​ຂອງ​ທ່ານ ບຸນ​ກອງ ສີ​ຫາ​ວົງ ລັດ­ຖະ­ມົນ­ຕີ​ກະ­ຊວງ​ສາ­ທາ­ລະ­ນະ​ສຸກ ມີ​ບັນ­ດາ​ຮອງ​ລັດ­ຖະ­ມົນ­ຕີ ເຈົ້າ­ແຂວງ ຮອງ​ເຈົ້າ­ແຂວງ ຫົວ­ໜ້າ​ກົມ ອະ­ທິ­ການ​ບໍ­ດີ ຄະ­ນະ­ບໍ­ດີ ອຳ­ນວຍ​ການ​ໂຮງ­ໝໍ ຫົວ­ໜ້າ​ພະ​ແນກ​ສາ​ທາ​ແຂວງ ນະ­ຄອນ­ຫຼວງ ແລະ ພະ­ນັກ­ງານ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ບຸນ​ກອງ ສີ​ຫາ​ວົງ ກ່າວ​ວ່າ: ເພື່ອ​ຜັນ​ຂະ­ຫຍາຍ​ມະ­ຕິ​ກອງ​ປະ­ຊຸມ​ໃຫຍ່ ຄັ້ງ​ທີ X ຂອງ​ພັກ ທີ່​ຖື​ເອົາ​ວຽກ​ງານ​ກັນ​ພະ­ຍາດ ແລະ ສົ່ງ­ເສີມ​ສຸ­ຂະ­ພາບ​ເປັນ​ວຽກ​ງານ​ສຳ­ຄັນ ແລະ ຖື​ເອົາ​ການ​ບໍ­ລິ­ການ​ປິ່ນ­ປົວ​ທີ່​ມີ​ຄຸນ​ນະ​ພາບ​ທົ່ວ​ເຖິງ ແລະ ເປັນ​ທຳ​ເປັນ​ວຽກ​ງານ​ຕົ້ນ­ຕໍ ກໍ​ຄື ສູ້​ຊົນ​ປະ­ຕິ­ບັດ 10 ຕົວ​ຊີ້​ວັດ​ໃຫ້​ສາ­ມາດ​ບັນ­ລຸ​ໄດ້​ຕາມ​ຄາດ­ໝາຍ​ທີ່​ວາງ​ໄວ້ ແລະ ຮັບ­ປະ­ກັນ​ໃຫ້​ປະ­ຊາ­ຊົນ​ບັນ­ດາ­ເຜົ່າ ໄດ້​ເຂົ້າ​ເຖິງ​ການ​ບໍ­ລິ­ການ​ທີ່​ມີ​ຄຸນ​ນະ​ພາບ​ໄດ້​ຢ່າງ​ທົ່ວ​ເຖິງ ແລະ ຍຸ­ຕິ​ທຳ ຂະ­ແໜງ​ສາ​ທາ​ໄດ້​ຜັນ​ຂະ­ຫຍາຍ ແລະ ຈັດ​ຕັ້ງ​ປະ­ຕິ­ບັດ​ແຜນ​ພັດ­ທະ­ນາ​ສາ­ທາ­ລະ­ນະ​ສຸກ​ປີ 2018 ຕາມ 8 ແຜນ​ງານ 42 ແຜນ​ງານ​ຍ່ອຍ ແລະ 97 ໂຄງ­ການ ຕາມ​ຂອບ​ຍຸດ​ທະ​ສາດ​ປະ­ຕິ​ຮູບ​ສາ​ທາ​ໄລ­ຍະ II ທີ່​ສຸມ​ໃສ່​ປະ­ຕິ​ຮູບ​ວຽກ​ງານ​ສາ​ທາ​ໃນ 5 ດ້ານ​ຄື: ດ້ານ​ຊັບ­ພະ­ຍາ­ກອນ​ມຸດ ດ້ານ​ບໍ­ລິ­ການ​ຄຸ້ມ​ຄອງ ດ້ານ​ການ​ເງິນ​ສາ​ທາ ດ້ານ​ການ​ບໍ­ລິ­ການ​ສາ​ທາ ແລະ ດ້ານ​ຂໍ້​ມູນ​ຂ່າວ­ສານ​ສາ​ທາ ພ້ອມ​ທັງ​ປະ­ຕິ­ບັດ​ຫຼາຍ​ມາດ​ຕະ­ການ ນະ­ໂຍ­ບາຍ​ເຮັດ​ໃຫ້​ການ­ຈັດ­ຕັ້ງ​ປະ­ຕິ­ບັດ 10 ຕົວ​ຊີ້​ວັດ​ທີ່​ສະ­ພາ​ແຫ່ງ​ຊາດ ໄດ້​ຮັບ­ຮອງ​ໃຫ້​ກະ­ຊວງ​ສາ­ທາ­ລະ­ນະ​ສຸກ ຈັດ​ຕັ້ງ​ປະ­ຕິ­ບັດ ມີ​ຫຼາຍ​ຕົວ​ຊີ້​ວັດ​ມີ​ຄວາມ​ຄືບ​ໜ້າ​ເປັນ​ທີ່​ໜ້າ​ພໍ­ໃຈ​ເຊັ່ນ: ອັດ­ຕາ​ເດັກ­ນ້ອຍ​ລຸ່ມ 5 ປີ ທີ່​ມີ​ລວງ​ສູງ​ບໍ່​ໄດ້​ມາດ­ຕະ­ຖານ ອັດ­ຕາ​ການ​ຕາຍ​ຂອງ​ເດັກ­ນ້ອຍ​ລຸ່ມ 5 ປີ ອັດ­ຕາ​ສ່ວນ​ການ​ຕາຍ​ຂອງ​ແມ່ ອັດ­ຕາ​ປົກ​ຄຸມ​ປະ­ກັນ​ສຸ­ຂະ­ພາບ ພ້ອມ​ດຽວ​ກັນ​ກໍ​ມີ​ຫຼາຍ​ຕົວ​ຊີ້​ວັດ​ມີ​ແນວ​ໂນ້ມ​ທີ່​ຈະ​ບໍ່​ສາ­ມາດ​ບັນ­ລຸ​ໄດ້.

    ເຊິ່ງ​ຕົວ​ເລກ​ລາຍ​ງານ​ປົກ­ກະ­ຕິ​ຈາກ 18 ແຂວງ​ຈຳ­ນວນ​ການ​ຕາຍ​ຂອງ​ແມ່​ປີ 2017 ໄດ້​ຫຼຸດ​ລົງ 151 ຄົນ ແລະ ປີ 2018 ມີ​ພຽງ 129 ຄົນ ການ​ຊົມ­ໃຊ້​ວິດ­ຖ່າຍ​ປີ 2012 ເພີ່ມ​ຂຶ້ນ​ຈາກ 56,9% ປີ 2017 ມາ​ເປັນ 73,8% ຄາດ­ໝາຍ 2018 ແມ່ນ 73% ຖື​ວ່າ​ບັນ­ລຸ​ໄດ້ ການ​ປົກ​ຄຸມ​ການ​ປະ­ກັນ​ສຸ­ຂະ­ພາບ​ປີ 2017 ເພີ່ມ​ຂຶ້ນ 71% ປີ 2018 ມາ​ເປັນ 75% ບັນ­ລຸ​ໄດ້ ສ່ວນ​ຕົວ​ຊີ້​ວັດ​ທີ່​ຍັງ​ບໍ່​ທັນ​ສາ­ມາດ​ບັນ­ລຸ ປີ 2018 ອັດ­ຕາ​ເດັກ­ນ້ອຍ​ລຸ່ມ 5 ປີ ທີ່​ມີ​ນ້ຳ­ໜັກ​ຕ່ຳ​ກວ່າ​ມາດ­ຕະ­ຖານ​ຫຼຸດ​ລົງ​ຈາກ 27% ປີ 2012 ຍັງ​ເຫຼືອ 21,1% ປີ 2017 ຄາດ­ໝາຍ​ປີ 2018 ແມ່ນ 21% ເກືອບ​ບັນ­ລຸ ຕ້ອງ​ສືບ­ຕໍ່​ສູ້​ຊົນ ການ​ເກີດ​ລູກ​ມີ​ແພດ​ຊ່ວຍ​ຫຼຸດ​ລົງ​ຈາກ 41,5% ປີ 2012 ມາ​ເປັນ 64,4% ປີ 2017 ຄາດ­ໝາຍ​ປີ 2018 ແມ່ນ 74% ການ​ສັກ​ຢາ​ກັນ​ພະ­ຍາດ​ຂໍ້​ມູນ​ລາຍ​ງານ​ຈາກ DHIS2 ປີ 2017 DPT3 83% ຄາດ­ໝາຍ 2018 ແມ່ນ 90% ແຕ່​ການ​ລາຍ​ງານ​ໄດ້​ພຽງ​ແຕ່ 84% ການ​ຊົມ­ໃຊ້​ນ້ຳ​ສະ­ອາດ​ເພີ່ມ​ຂຶ້ມ​ຈາກ 69,9% ປີ 2012 ມາ​ເປັນ 83,9% ປີ 2017 ຄາດ­ໝາຍ​ປີ 2018 ແມ່ນ 88% ຈຶ່ງ​ຖື​ວ່າ​ຍັງ​ບໍ່​ທັນ​ບັນ­ລຸ​ເທື່ອ.