ນາຍົກ ເນັ້ນໃຫ້ສາທາສືບຕໍ່ແກ້ໄຂ 10 ຕົວຊີ້ວັດທີ່ຍັງຄ້າງ
ບົດຂ່າວໜັງສືພິມວຽງຈັນໃໝ່ສະບັບວັນທີ 1 ມີນາ 2019
ກອງປະຊຸມສະຫຼຸບການຈັດຕັ້ງປະຕິບັດວຽກງານສາທາລະນະສຸກ ທົ່ວປະເທດ ປະຈຳປີ 2018 ແລະ ທິດທາງແຜນການປີ 2019 ດຳເນີນມາເປັນເວລາ 3 ວັນ ສຳເລັດວັນທີ 28 ກຸມພາ 2019 ທີ່ຫໍປະຊຸມແຫ່ງຊາດ ເປັນປະທານຂອງທ່ານ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ເປັນກຽດເຂົ້າຮ່ວມຂອງທ່ານ ທອງລຸນ ສີສຸລິດ ນາຍົກລັດຖະມົນຕີ ມີບັນດາຮອງລັດຖະມົນຕີ ຮອງເຈົ້າແຂວງ ຮອງເຈົ້າຄອງນະຄອນຫຼວງ ຫົວໜ້າກົມ ຮອງກົມ ຫົວໜ້າພະແນກ ແຂກຖືກເຊີນທີ່ກ່ຽວຂ້ອງຈາກສູນກາງ ແລະ ທ້ອງຖິ່ນ.
ທ່ານ ບຸນກອງ ສີຫາວົງ ກ່າວວ່າ: ກອງປະຊຸມຄັ້ງນີ້ ເພື່ອເປັນການສະຫຼຸບຕີລາຜົນສຳເລັດ ສິ່ງຄົງຄ້າງ ທ້າທາຍໃນການຈັດຕັ້ງປະຕິບັດແຜນພັດທະນາສາທາລະນະສຸກ ປີ 2018 ແລະ ສະເໜີທິດທາງແຜນພັດທະນາ ປີ 2019 ທີ່ມີຈຸດປະສົງເລັ່ງໃສ່ການບັນລຸ 10 ຕົວຊີ້ວັດ ທີ່ສະພາແຫ່ງຊາດໄດ້ຮັບຮອງໃຫ້ກະຊວງສາທາລະນະສຸກ ຈັດຕັ້ງປະຕິບັດ ການປັບປຸງຄຸນນະພາບການບໍລິການ ການສ້າງຄວາມເຂັ້ມແຂງດ້ານການເງິນ ແລະ ກອງທຶນປະກັນສຸຂະພາບແຫ່ງຊາດຕາມຂອບຍຸດທະສາດປະຕິຮູບສາທາລະນະສຸກ ໄລຍະ (2016?2020) ເພື່ອແລກປ່ຽນບົດຮຽນການຈັດຕັ້ງປະຕິບັດວຽກງານສັກຢາກັນພະຍາດ ການຈັດຕັ້ງປະຕິບັດກອງທຶນປະກັນສຸຂະພາບແຫ່ງຊາດ ກ່ຽວກັບການປັບປຸງຄຸນນະພາບ ການບໍລິການປິ່ນປົວຂອງໂຮງໝໍ ແລະ ສຸກສາລາ ການຈັດຕັ້ງປະຕິບັດນະໂຍບາຍ 5 ດີ 1 ພໍໃຈ ແລະ ການປະຕິບັດດຳລັດວ່າດ້ວຍການນະໂຍບາຍຈູງໃຈແກ່ພະນັກງານແພດໝໍ ເພື່ອປຶກສາຫາລື ແລະ ແລກປ່ຽນແນວຄວາມຄິດເບື້ອງຕົ້ນໃນການຫັນໂຮງໝໍໃຫ້ກຸ້ມຕົນເອງເທື່ອລະກ້າວ ສະເໜີຮ່າງແຜນພັດທະນາສາທາ ປີ 2020 ແລະ 5 ປີຄັ້ງທີ 10 (2021?2025).
ໂອກາດນີ້ ທ່ານ ທອງລຸນ ສີສຸລິດ ໄດ້ໂອ້ລົມເພື່ອເປັນເຂັມຊີ້ທິດເຍືອງທາງຕໍ່ທີ່ປະຊຸມ ໂດຍທ່ານໄດ້ເນັ້ນໃຫ້ກະຊວງສາທາລະນະສຸກ ກ່ອນອື່ນຕ້ອງໄດ້ປັບປຸງພື້ນຖານໂຄງລ່າງ ອຸປະກອນການແພດ ແລະ ການບໍລິການຂອງໂຮງໝໍສູນກາງ ໂຮງໝໍແຂວງ ເມືອງ ແລະ ສາທາລະນະສຸກຈຳນວນໜຶ່ງໃຫ້ມີຄຸນນະພາບ ແລະ ທັນສະໄໝຂຶ້ນກວ່າເກົ່າ ເອົາໃຈໃສ່ປ້ອງກັນ ແລະ ຄວບຄຸມພະຍາດທີ່ຮ້າຍແຮງເຊັ່ນ: ໄຂ້ຍຸງລາຍ ຖອກທ້ອງ ແລະ ອັກເສບລະບົບຫາຍໃຈຮຸນແຮງ ແລະ ພະຍາດຕິດຕໍ່ອື່ນໆ ຂະຫຍາຍຕາໜ່າງການບໍລິການສາທາລະນະສຸກຮອດທ້ອງຖິ່ນຮາກຖານຊົນນະບົດ ແລະ ຫ່າງໄກສອກຫຼີກ ປະຕິບັດນະໂຍບາຍ 5 ດີ 1 ພໍໃຈ (5 ດີ ສະດວກດີ ຮັບຕ້ອນດີ ສະອາດດີ ບົ່ງມະຕິດີ ປິ່ນປົວດີ ແລະ 1 ພໍໃຈ ຜູ້ມາຮັບບໍລິການພໍໃຈ) ຢ່າງມີປະສິດທິຜົນເຮັດໃຫ້ສາມາດແກ້ໄຂບັນຫາຫາງສຽງສັງຄົມໃຫ້ຫຼຸດລົງ ເອົາໃຈໃສ່ຈັດຕັ້ງປະຕິບັດຍຸດທະສາດ ແມ່ ແລະ ເດັກແບບເສື່ອມສານ ແລະ ປະຕິບັດນະໂຍບາຍເກີດລູກ ປິ່ນປົວເດັກນ້ອຍລຸ່ມ 5 ປີບໍ່ເສຍຄ່າເຮັດໃຫ້ອັດຕາການຕາຍຂອງແມ່ ເດັກນ້ອຍລຸ່ມ 1 ປີຫຼຸດລົງ ອັດຕາການນຳໃຊ້ນ້ຳສະອາດເພີ່ມຂຶ້ນ 83,9% ແລະ ວິດຖ່າຍເພີ່ມຂຶ້ນ 73% ອັດຕາເດັກຂາດສານອາຫານຊຳເຮື້ອຫຼຸດລົງຍັງເຫຼືອ 33% ສະຫຼຸບແລ້ວ 10 ຄາດໝາຍທີ່ສະພາແຫ່ງຊາດຮັບຮອງ ກໍໄດ້ຮັບການເອົາໃຈໃສ່ຈັດຕັ້ງປະຕິບັດເປັນຢ່າງດີ ແລະ ຫຼາຍຄາດໝາຍກໍໄດ້ບັນລຸ ນີ້ເປັນພຽງສ່ວນໜຶ່ງຂອງຜົນງານທີ່ຍາດມາໄດ້ ເຊິ່ງພັກ ແລະ ລັດຖະບານ ໄດ້ຕີລາຄາສູງຕໍ່ຜົນສຳເລັດດັ່ງກ່າວ ແຕ່ຍັງມີຫຼາຍບັນຫາທ້າທາຍທີ່ຕ້ອງໄດ້ພ້ອມກັນແກ້ໄຂ ເປັນຕົ້ນ ອັດຕາການຕາຍຂອງແມ່ ແລະ ເດັກນ້ອຍຖືວ່າຫຼຸດລົງຫຼາຍຖ້າສົມທຽບໃສ່ 10 ປີຜ່ານມາ.
ຜົນສຳເລັດກອງປະຊຸມເທື່ອນີ້ ຜູ້ເຂົ້າຮ່ວມໄດ້ມາປຶກສາຫາລືກັນເພື່ອຊອກໃຫ້ເຫັນສິ່ງຄົງຄ້າງຜ່ານມາ ເພື່ອພ້ອມກັນແກ້ໄຂ 10 ຕົວຊີ້ວັດທີ່ຍັງເຫັນວ່າເຮັດບໍ່ທັນໄດ້ ຕ້ອງໄດ້ເອົາໃຈໃສ່ຕື່ມສຸຂະພາບເຂັ້ມແຂງແມ່ນຄວາມຕ້ອງການທີ່ທຸກຄົນປາຖະໜາຢາກໄດ້ຢາກມີເໜືອສິ່ງອື່ນ ສຳລັບການຂະຫຍາຍຕາໜ່າງຂອງຂະແໜງສາທາໃຫ້ເອົາມາດຕະການປ້ອງກັນໄປກ່ອນ ແລະ ເອົາການປິ່ນປົວຮັກສາໄປນຳ ຖືເປັນການຍົກລະດັບຄວາມຮູ້?ຄວາມສາມາດໃຫ້ພະນັກງານແພດໝໍ ເພື່ອເປັນການສ້າງຄົນ ສ້າງນາຍແພດ ສ້າງພະຍາບານໃຫ້ດີຂຶ້ນນີ້ແມ່ນຄວາມຈຳເປັນ ຢາກປ້ອງກັນໄດ້ອີກອັນໜຶ່ງຕ້ອງອົບຮົມຄວາມຮູ້ໃຫ້ປະຊາຊົນໃຫ້ເຂົ້າໃຈເລື່ອງສຸຂະພາບໃຫ້ເລິກເຊິ່ງກວ້າງຂວາງ ນອກນັ້ນ ພວກເຮົາຕ້ອງຍາດແຍ່ງເອົາຄວາມຮູ້?ບົດຮຽນ ເອົາການຊ່ວຍເຫຼືອຈາກຕ່າງປະເທດໃຫ້ຫຼາຍທີ່ສຸດ ແລະ ອີກບັນຫາໜຶ່ງຢາກໃຫ້ມີການກວດກາຄືນ 5 ດີວ່າສາມາດເຮັດໄດ້ຈັກຂໍ້ແລ້ວ ເຮົາຈະປັບປຸງສຸກສາລາ ໂຮງໝໍເມືອງ ແຂວງເພື່ອເຮັດໜ້າທີ່ບໍລິການປິ່ນປົວ ສ້າງຈັນຍາບັນ ຈັນຍາທຳໃຫ້ພະນັກງານແພດໝໍໃຫ້ດີຂຶ້ນ ແລະ ເປັນທີ່ຍອມຮັບຂອງປະຊາຊົນ.
| 
