![](/userfiles/images/3C9A9705.JPG) ![](/userfiles/images/3C9A9690.JPG)
ກອງປະຊຸມປຶກສາຫາລືກ່ຽວກັບການອອກອະນຸຍາດ ຂຸດຄົ້ນ, ເກັບຊື້, ປຸງແຕ່ງ, ຖອດຮີດ, ຜະລິດ, ສົ່ງອອກ ແລະ ການປູກທົດແທນ ຊັບພະຍາກອນທໍາມະຊາດທີ່ເປັນຢາ ໄດ້ເປີດຂຶ້ນ ໃນວັນທີ 19 ມີນາ 2019 ທີ່ຫ້ອງປະຊຸມໂຮງ ແຮມຄູນຊັບ ທ່າລາດ ແຂວງວຽງຈັນ. ພາຍໃຕ້ການເປັນປະທານຂອງທ່ານຮສ ດຣ. ບຸນກອງ ສີຫາວົງ ລັດຖະມົນຕີ ກະຊວງສາທາລະນະສຸກ ແລະ ທ່ານ ດຣ. ສົມທະວີ ຈາງວິສົມມິດ ຫົວໜ້າກົມອາຫານ ແລະ ຢາ, ມີຜູ້ແທນເຂົ້າຮ່ວມຈາກ ກົມສັງຄົມກໍາມະທິການວັດທະນະທໍາສັງຄົມ ສະພາແຫ່ງຊາດ, ກົມຄົ້ນຄ້ວາ-ສັງລວມ ຫ້ອງວ່າການສໍານັກງານນາຍົກລັດຖະມົນຕີ,ກົມຄວບຄຸມມົນລະພິດ ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ, ກົມປ່າໄມ້ ກະຊວງກະສິກໍາ ແລະ ປ່າໄມ້, ກົມການນໍາເຂົ້າ-ສົ່ງອອກ ກະຊວງອຸດສາຫະກໍາ ແລະ ການຄ້າ, ສະຖາບັນການແພດ ແລະ ການຢາພື້ນເມືອງ, ຄະນະເພສັຊສາດ ມວສ, ກອງກວດກາອາຫານ ແລະ ຢາ, ສູນວິໄຈອາຫານ ແລະ ຢາ,ພະແນກສາທາລະນະສຸກນະຄອນຫຼວງ ແລະ ພ້ອມດ້ວຍພະນັກງານກົມອາຫານ ແລະ ຢາ ລວມທັງໝົດ 30 ທ່ານ ຍິງ 11 ທ່ານ (ລາຍຊື່ຄັດຕິດມາພ້ອມນີ້).
ທ່ານ ດຣ. ສົມທະວີ ຈາງວິສົມມິດ ຫົວໜ້າກົມອາຫານ ແລະ ຢາ ກ່າວຈຸດປະສົງ ແລະ ຕ້ອນຮັບບັນດາຜູ້ແທນທີ່ເຂົ້າຮ່ວມກອງປະຊຸມຈາກນັ້ນ, ທ່ານ ຮສ ດຣ. ບຸນກອງ ສີຫາວົງ ລັດຖະມົນຕີ ກະຊວງສາທາລະນະສຸກ ໄດ້ຍົກໃຫ້ເຫັນຄວາມໝາຍຄວາມສໍາຄັນຂອງວຽກງານຄຸ້ມຄອງຊັບພະຍາກອນທໍາມະຊາດທີ່ເປັນຢາໃນໄລຍະຜ່ານມາ ໂດຍສະເພາະການອອກອະນຸຍາດຂຸດຄົ້ນ, ເກັບຊື້, ປຸງແຕ່ງ, ຖອດຮີດ, ຜະລິດ, ສົ່ງອອກ ແລະ ການປູກທົດແທນ ຊັບພະຍາກອນທໍາມະຊາດທີ່ເປັນຢາຍັງບໍ່ມີປະສິດທິຜົນເທົ່າທີຄວນ, ການປະສານງານກັນບໍ່ໄດ້ດີ ເກີດມີຊ່ອງຫວ່າງໃນການຈັດຕັ້ງປະຕິບັດນິຕິກໍາ ແລະ ມີຜົນລົບຫຼາຍກວ່າຜົນບວກ ໂດຍສະເພາະທາງດ້ານເສດຖະກິດ, ສັງຄົມ ແລະ ສິ່ງແວດລ້ອມ.
ຜົນສຳເລັດກອງປະຊຸມເທື່ອນີ້ ບັນດາຜູ້ເຂົ້າຮ່ວມກອງປະຊຸມໄດ້ສົນທະນາ, ປຶກສາຫາລື ແລະ ໄດ້ຕົກລົງເປັນເອກະພາບກັນດັ່ງລຸ່ມນີ້:
1. ເຫັນດີ ຄວນໂຈະ ຫຼື ຢຸດຕິຊົ່ວຄາວທຸກການເຄື່ອນໄຫວຂອງບັນດາຫົວໜ່ວຍທຸລະກິດທີ່ປະຕິບັດບໍ່ຖືກຕ້ອງ, ຊຶ່ງວຽກງານນີ້ ແມ່ນພົວພັນກັບຫຼາຍຂະແໜງການທີ່ຈະຕ້ອງປຶກສາຫາລື ຊອກຫາວິທີການ ແລະ ມາດຕະການທີ່ຮັດກຸມຮ່ວມກັນ ເພື່ອສະກັດກັ້ນການຂຸດຄົ້ນທີ່ບໍ່ຖືກເຕັກນິກວິຊາການ ແລະ ບໍ່ສອດຄ່ອງກັບລະບຽບຫຼັກການ;
2. ກອງປະຊຸມສະເໜີໃຫ້ເອົາ ມາດຕາ 26 (ໃໝ່) ການສ້າງ ແລະ ການອະນຸມັດແຜນການຂຸດຄົ້ນເຄື່ອງປ່າຂອງດົງທໍາມະຊາດ ໃນຮ່າງກົດໝາຍວ່າດວ້ຍປ່າໄມ້ ສະບັບປັບປຸງເຂົ້າຜ່ານກອງປະຊຸມກວດກາເນື້ອໃນຮອບດ້ານ ທີ່ຈະຈັດຂື້ນໃນວັນທີ 1-3 ເມສາ 2019, ເພື່ອພິຈາລະນາມອບໃຫ້ກະຊວງສາທາລະນະສຸກ ເປັນຜູ້ອະນຸມັດເຄື່ອງປ່າຂອງດົງທີ່ເປັນຢາທັງໝົດ;
3. ແຕ່ງຕັ້ງຄະນະກຳມະການສະເພາະກິດເພື່ອກວດກາການສ້າງນິຕິກຳ ແລະ ການຈັດຕັ້ງປະຕິບັດບັນດານິຕິກໍໍາຕ່າງໆທີ່ກ່ຽວຂ້ອງ ພ້ອມທັງການອອກອະນຸຍາດຂຸດຄົ້ນ, ເກັບຊື້, ປຸງແຕ່ງ, ຖອດຮີດ, ຜະລິດ, ສົ່ງອອກຊັບພະຍາກອນ
ທຳມະຊາດທີ່ເປັນຢາ;
4. ຂະແໜງການອຸດສາຫະກຳ ແລະ ການຄ້າ ກວດກາຄືນໂຮງງານຖອດຮີດທີ່ບໍ່ໄດ້ມາດຕະຖານ, ຜູ້ທີ່ໄດ້ຮັບອະນຸ
ຍາດ ແລະ ບໍ່ໄດ້ຮັບອະນຸຍາດມີຈັກແຫ່ງ;
5. ໃຫ້ມີການສົ່ງເສີມການປູກ, ການອະນຸລັກ, ການຄົ້ນຄ້ວາ ແລະ ນໍາໃຊ້ຊັບພະຍາກອນທໍາມະຊາດທີ່ເປັນຢາ ເພື່ອຜະລິດເປັນຢາສໍາເລັດຮູບ ນໍາໃຊ້ຢູ່ພາຍໃນ ແລະ ສົ່ງອອກໄປຕ່າງປະເທດ;
6. ກອງປະຊຸມສະເໜີໃຫ້ຈັດກອງປະຊຸມປຶກສາຫາລືສຳມະນາດ້ານວິຊາການ ກັບຂະແໜງການທີ່ກ່ຽວຂ້ອງ;
7. ກອງປະຊຸມໄດ້ຕົກລົງເຫັນດີເປັນເອກະພາບນໍາເອົາຜົນຂອງກອງປະຊຸມຄັ້ງນີ້ຮຽນນໍາສະເໜີຂັ້ນເທິງພິຈາລະນາໂດຍສະເພາະທ່ານນາຍົກລັດຖະມົນຕີ.
|