.jpg)
ກອງປະຊຸມຄັ້ງທີ 31 ກ່ຽວກັບການຄຸ້ມຄອງວຽກງານດ້ານຢາພື້ນເມືອງ ແລະ ຜະລິດຕະພັນເສີມສຸຂະພາບ ແລະ ບັນດາກອງປະຊຸມທີ່ກ່ຽວຂ້ອງ (The 31th Meeting of the Traditional Medicines and Health Supplements Product Working Group (TMHS PWG) and itsrelated Meetings, ທີ່ ສປປ ລາວເປັນເຈົ້າພາບໄດ້ເປີດຂຶ້ນໃນວັນທີ 2 ພຶດສະພາ 2019 ທີ່ໂຮງແຮມ ລາວພລາຊາ ນະຄອນຫຼວງວຽງຈັນ, ຊຶ່ງໃຫ້ກຽດເປັນປະທານ ກ່າວເປີດພິທີກອງປະຊຸມໂດຍ ທ່ານ ຮສ ດຣ. ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ. ກອງປະຊຸມດັ່ງກ່າວແມ່ນດໍາເນີນໄປເປັນເວລາ 5 ວັນແຕ່ວັນທີ່ 29 ເມສາ ເຖິງ 3 ພຶດສະພາ 2019 ໂດຍມີແຂກເຂົ້າຮ່ວມຈາກ 10 ປະເທດສະມາຊິກອາຊຽນລວມທັງ ສປປ ລາວ, ນອກນັ້ນຍັງມີ ກອງເລຂາອາຊຽນ, ສະມາຄົມເຄືອຄ່າຍຜູ້ປະກອບການຜະລິດຕະພັນເສີມສຸຂະພາບອາຊຽນ (ASEAN Alliance of Health Supplements Associations (AAHSA) ແລະ ສະມາຄົມເຄືອຄ່າຍ ອຸດສາຫະກໍາຢາພື້ນເມືອງອາຊຽນ(ASEAN Alliance of Traditional Medicine Industries (AATMI) ແລະ ຜູ້ສັງເກດການຈາກພາກສ່ວນອຸດສາຫະກໍາຂອງບັນດາປະເທດອາຊຽນ ທັງໝົດ 117 ທ່ານ ເພື່ຶອຈັດຕັ້ງປະຕິບັດນະໂຍບາຍການຄ້າເສລີໃນຂົງເຂດອາຊຽນ ແລະ ຫຼຸດຜ່ອນສີ່ງກິດຂວາງທາງການຄ້າ ສະນັ້ນການໃສ່ໃຈດ້ານຄຸນນະພາບ, ປະສິດທິຜົນ ແລະ ຄວາມປອດໄພບົນຫຼັກການຂອງມາດຕະຖານທີ່ຮັບຮອງໄດ້ແມ່ນມີຄວາມສຳຄັນ. ສະນັ້ນເພື່ອເຮັດໃຫ້ມີຄວາມເຊື່ອມສານທາງດ້ານການຈັດຕັ້ງປະຕິບັດ, ການໃຊ້ລະບຽບການໃນຂົງເຂດອາຊຽນຈື່ງເປັນວຽກບຸລິມະສິດຈື່ງໄດ້ມອບໝາຍເປັນວຽກຂອງໜ່ວຍງານວິຊາການໃນແຕ່ລະດ້ານຊື່ງລວມທັງວຽກງານດ້ານຢາພື້ນເມືອງ ແລະ ຜະລິດຕະພັນເສີມສຸຂະພາບໂດຍໄດ້ຈັດກອງປະຊຸມວິຊາການນີ້ຂື້ນມາຫຼາຍຄັ້ງນັບແຕ່ປີ 2004 ເປັນຕົ້ນມາ. ກອງປະຊຸມຄັ້ງນີ້ເປັນຄັ້ງທີ 31 ຊື່ງມີຈຸດປະສົງສະເພາະດັ່ງນີ້:
1. ລາຍງານກ່ຽວກັບຜົນຂອງກອງປະຊຸມອາຊຽນຄັັ້ງທີ 30 ທີ່ຜ່ານມາຂອງໜ່ວຍງານວິຊາການດ້ານຢາພື້ນເມືອງ ແລະ
ຜະລິດຕະພັນເສີມສຸຂະພາບທີ່ໄດ້ຈັດຂຶ້ນລະຫວ່າງວັນທີ 29 ຕຸລາ-03 ພະຈິກ 2018 ທີ່ປະເທດ ອີນໂດເນເຊຍ.
2. ປຶກສາຫາລື ແລະ ເພື່ອສືບຕໍ່ປຶກສາຫາລືຄວາມເປັນເອກະພາບໃນການສ້າງເອກະສານລະບຽບການອາຊຽນ, ສ້າງຄວາມເຊື່ອມສານດ້ານການຄຸ້ມຄອງວຽກງານດ້ານຢາພື້ນເມືອງ ແລະ ຜະລິດຕະພັນເສີມສຸຂະພາບໃນຂົງເຂດ ແລະ ຜັນຂະຫຍາຍການຈັດຕັ້ງປະຕິບັດທິດນຳອາຊຽນຢ່າງມີປະສິດທິຜົນ.
3. ປຶກສາຫາລື ແລະ ແລກປ່ຽນຄຳຄິດຄຳເຫັນກ່ຽວກັບຄໍາສັບທີ່ໃຊ້ໃນເອກະສານສໍາຄັນ ເຊັ່ນ ສັນຍາອາຊຽນກ່ຽວກັບຂອບການຄຸ້ມຄອງຢາພື້ນເມືອງ ແລະ ຜະລິດຕະພັນເສີມສຸຂະພາບ; ປຶກສາຫາລືກ່ຽວກັບການຈັດຕັ້ງປະຕິບັດສັນຍາດັ່ງກ່າວໃນອະນາຄົດ ເມື່ອສັນຍາດັ່ງກ່າວໄດ້ຖືກເຊັນຮັບຮອງເອົາປະເທດສະມາຊິກທັງໝົດພ້ອມທັງໄລຍະເວລາທີ່ສັນຍາດັ່ງກ່າວຈະໄດ້ຮັບການຈັດຕັ້ງປະຕິບັດຢ່າງເຕັມສ່ວນຈາກທຸກປະເທດສະມາຊິກ.
4. ລາຍງານກ່ຽວກັບພາລະບົດບາດສະບັບປັງປຸງຂອງ ACCSQ ແມ່ນໄດ້ຖືກຮັບຮອງຈາກກອງປະຊຸມ SEOM
ແລ້ວຊຶ່ງສອດຄ່ອງກັບຍຸດທະສາດການເຊື່ອມໂຍງປະຊາຄົມເສດຖະກິດອາຊຽນ ຮອດປີ 2025 (AEC
Blueprint) ແລະ ແຜນຍຸດທະສາດ2025 -2026 ຂອງ ACCSQ.
5. ປຶກສາຫາລືກ່ຽວກັບການສ້າງຕັ້ງຄະນະວິຊາການໃໝ່ທີ່ຈະມາເຮັດໜ້າທີ່ແທນຄະນະວິຊາການທີ່ຈະໝົດໜ້າທີ່ພາຍຫຼັງທີ່ໄດ້ມີການເຊັນສັນຍາ.
6. ລາຍງານການດໍາເນີນການຝຶກອົບຮົມຂອງແຕ່ລະປະເທດກ່ຽວກັບຄູ່ມືຫຼັກການການຜະລິດທີ່ດີສໍາລັບຢາພື້ນເມືອງ ແລະ ຜະລິດຕະພັນເສີມສຸຂະພາບອາຊຽນສໍາລັບສະໄໝທີ 2 ວາລະ 5 (Phase 2 Session 5).
ໃນວາລະກ່າວເປີດກອງປະຊຸມດັ່ງກ່າວ ທ່ານ ຮສ ດຣ. ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ທ່ານໄດ້ສະແດງຄວາມຊົມເຊີຍຕໍ່ກອງປະຊຸມຄັ້ງນີ້, ຊຶ່ງ ສປປ ລາວໄດ້ຮັບກຽດໃຫ້ເປັນເຈົ້າພາບຈັດກອງປະຊຸມຄະນະກຳມະການຄຸ້ມຄອງວຽກງານດ້ານຢາພື້ນເມືອງ ແລະ ຜະລິດຕະພັນເສີມສຸຂະພາບອາຊຽນຄັ້ງນີ້ເປັນຄັ້ງທີ 31 ແລ້ວ ແລະ ສະແດງຄວາມຊົມເຊີຍ ຕໍ່ຜົນສຳເລັດຂອງກອງປະຊຸມຄັ້ງທີ 30 ທີ່ຜ່ານມາທີ່ໄດ້ຈັດຂຶ້ນຢູ່ Yokyakarta ປະເທດອິນໂດເນເຊຍ, ທ່ານຍັງໄດ້ກ່າວຕື່ມວ່າ: ວຽກງານຄຸ້ມຄອງ ດ້ານຢາພື້ນເມືອງ ແລະ ຜະລິດຕະພັນເສີມສຸຂະພາບເປັນໜ້າທີ່ ແລະ ຄວາມຮັບຜິດຊອບຂອງຂະແໜງສາທາລະນະສຸກ ເຊິ່ງໄດ້ມີຫຼາຍໜ້າວຽກເປັນສິ່ງທີ່ທ້າທາຍ ແລະ ຮີບຮ້ອນໃຫ້ມີລະບົບການຄຸ້ມຄອງດ້ານນີ້ເພື່ອເຮັດໃຫ້ການຈັດຕັ້ງປະຕິບັດເປັນເອກະພາບກັນ. ປະຈຸບັນໃນປະເທດສະມາຊິກອາຊຽນໄດ້ມີການຜະລິດຢາພື້ນເມືອງ ແລະ ຜະລິດຕະພັນເສີມສຸຂະພາບແມ່ນມີທ່າອ່ຽງຂະຫຍາຍນັບມື້ຫຼາຍຂຶ້ນ. ສະນັ້ນ ຈຶ່ງຈຳເປັນຕ້ອງມີມາດຕະຖານເພື່ອຄວບຄຸມດ້ານຄຸນນະພາບໃຫ້ສອດຄ່ອງກັບພາກພື້ນ ແລະ ສາກົນ ໂດຍຜ່ານຄະນະກຳມະການວິທະຍາສາດດ້ານຢາພື້ນເມືອງ ແລະ ຜະລິດຕະພັນເສີມສຸຂະພາບເພື່ອຮັບປະກັນຄວາມປອດໄພແກ່ຜູ້ຊົມໃຊ້.
ກອງປະຊຸມກ່ຽວກັບວຽກງານຢາພື້ນເມືອງ ແລະ ຜະລິດຕະພັນເສີມສຸຂະພາບນີ້ແມ່ນໄດ້ຈັດຂື້ນຜ່ານມາແລ້ວ 30ຄັ້ງ ຊື່ງ ສປປ ລາວໄດ້ຮັບກຽດເປັນເຈົ້າພາບມາໄດ້ 2 ຄັ້ງແລ້ວເຊັ່ນ: ຄັ້ງທີ I ວັນທີ 21-25 ພະຈິກ 2010(The 14th ACCSQ-TMHSPWG), ຄັ້ງທີ II ວັນທີ 10-14/11/2014(The 22th ACCSQ-TMHSPWG) . ຄັ້ງນີ້ເປັນຄັ້ງທີ III ທີ່ ສປປ ລາວເປັນເຈົ້າພາບແມ່ນກອງປະຊຸມ ກ່ຽວກັບການຄຸ້ມຄອງວຽກງານດ້ານຢາພື້ນເມືອງ ແລະ ຜະລິດຕະພັນເສີມສຸຂະພາບຄັ້ງທີ 31. ໃນວາລະຂອງກອງປະຊຸມດັ່ງກ່າວຍັງປະກອບມີກອງປະຊຸມກ່ຽວຂ້ອງອີກຈຳນວນໜຶ່ງ ເຊິ່ງຈັດຂຶ້ນກ່ອນໜ້າ 3 ວັນທີ່ກອງປະຊຸມໃຫຍ່ຂອງຄະນະກໍາມະການສະເພາະກິດກ່ຽວກັບວຽກງານຄຸ້ມຄອງຢາພື້ນເມືອງ ແລະ ຜະລິດຕະພັນເສີມສຸຂະພາບອາຊຽນຈະຈັດຂຶ້ນເຊັ່ນ:
1. ກອງປະຊຸມຄັ້ງທີ່ 28 ຂອງກໍາມະການສະເພາະກິດກ່ຽວກັບຂອບຄຸ້ມຄອງຢາພື້ນເມືອງ ແລະ ຜະລິດຕະພັນເສີມສຸຂະພາບ (The 28th Task Force on ASEAN Regulatory Framework for TMHS (TFRF).
2. ກອງປະຊຸມຄັ້ງທີ 28 ຂອງກໍາມະການສະເພາະກິດກ່ຽວກັບຫຼັກການການຜະລິດທີ່ດີ (The 28th TMHS Good Manufacturing Practice (GMP) Task Force).
3. ກອງປະຊຸມຄັ້ງທີ 35 ຂອງຄະນະກໍາການດ້ານວິທະຍາສາດອາຊຽນກ່ຽວກັບຢາພື້ນເມືອງ ແລະ ຜະລິດຕະພັນເສີມສູຂະພາບ (The 35th ASEAN TMHS Scientific Committee (ATSC) Meeting).
4. ກອງປະຊຸມຂອງຫົວໜ້າຄະນະຜູ້ແທນ (The TMHS PWG HOD Meeting).
ຄາດຄະເນຜົນທີ່ຈະໄດ້ຮັບຈາກກອງປະຊຸມຄັ້ງນີ້ຈະໄດ້:
ຄວາມຄືບໜ້າຂອງການຈັດຕັ້ງປະຕິບັດແຜນວຽກງານໜ່ວຍງານສະເພາະກິດຂອງອາຊຽນດ້ານຢາພື້ນເມືອງທີ່ໄດ້ຮ່ວມກັນຈັດຕັ້ງປະຕິບັດ ໃນໄລຍະຜ່ານມາ ແລະ ສົນທະນາແລກປ່ຽນ ຄວາມຄືບໜ້າເຊັ່ນ: ແຜນການອໍານວຍຄວາມສະດວກໃຫ້ແກ່ ພາກພື້ນ ໃນການສົ່ງເສີມ ແລະ ເຊື່ອມໂຍງ ຜະລິດຕະພັນຢາພື້ນເມືອງທີ່ປອດໄພ, ປະສິດທິພາບ ແລະ ຄຸນນະພາບ ເຂົ້າໃນລະບົບຮັກສາສຸຂະພາບຂອງຊາດ; ແຜນງານສົ່ງເສີມການນໍາໃຊ້ຢາພື້ນເມືອງ ເຂົ້າໃນຕາໜ່າງຮັກສາສຸຂະພາບຂັ້ນຕົ້ນ; ແຜນງານສ້າງຄວາມເຂັ້ມແຂງກ່ຽວກັບຄວາມຮູ້ດ້ານຢາພື້ນເມືອງຜູ້ສະໜອງການບໍລິການ ຫລື ແພດໝໍໂດຍຜ່ານການອົບຮົມ ດ້ານການນໍາໃຊ້ຢາພື້ນເມືອງ; ແຜນງານການສ້າງຄວາມອາດສາມາດຂອງປະເທດສະມາຊິກກ່ຽວກັບ ການຄົ້ນຄວ້າດ້ານປະສິດທິພາບ ຄວາມປອດໄພ ແລະ ຄຸນນະພາບຂອງຢາພື້ນເມືອງ ເຊິ່ງບັນດາກິດຈະກໍາຕ່າງໆ ລະອຽດ ຂອງແຜນງານເຫລົ່ານີ້ ໄດ້ຍົກຂຶ້ນມາສະເຫນີໂດຍບັນດາປະເທດນໍາພາ ແລະ ເອກະສານອື່ນໆ ທີ່ໄດ້ກໍາລັງພັດທະນາໂດຍປະເທດທີ່ໄດ້ຮັບມອບໝາຍ ເພື່ອຄວາມເປັນເອກະພາບ.
ສໍາລັບ ວຽກງານພັດທະນາດ້ານຢາພື້ນເມືອງ ຢູ່ ສປປ ລາວ ແມ່ນໄດ້ຮັບຄວາມເອົາໃຈໃສ່ຈາກ ລັດຖະບານ ເປັນຕົ້ນມາ ໂດຍສະເພາະວຽກງານຢາພື້ນເມືອງ ແມ່ນໄດ້ເປັນອົງປະກອບໜຶ່ງທີໄດ້ລະບຸຢູ່ໃນນະໂຍບາຍແຫ່ງຊາດດ້ານຢາ. ກະຊວງສາທາລະນະສຸກ ໄດ້ກໍານົດຍຸດທະສາດຍາວນານກ່ຽວກັບວຽກງານຢາພື້ນເມືອງໂດຍສະເພາະ ການພັດທະນາຜະລິດຕະພັນຢາພື້ນເມືຶຶອງ ໃຫ້ມີຄຸນນະພາບ ປະກອບສ່ວນເຂົ້າໃນຕາໜ່າງການບໍໍລິການສາທາລະນະສຸກແຕ່ລະຂັ້ນ.
| 
