ກອງປະຊຸມໄດ້ຈັດຂື້ນ ໃນວັນທີ 30-31 ກໍລະກົດ 2020  ທີ່ຫ້ອງປະຊຸມ ນາປ່າກວາງ ຣີສອດ, ເມືອງແກ້ວອຸດົມ ແຂວງວຽງຈັນ ເຊິ່ງເປັນກອງປະຊຸມສໍາມະນໍາ ຄັ້ງທຳອິດ. ພາຍໃຕ້ການເປັນປະທານ ໂດຍ ທ່ານ ປອ ດຣ. ບຸນຊູ ແກ້ວຫາວົງ ຮອງຫົວໜ້າກົມອາຫານ ແລະ ຢາ, ຊຶ່ງມີຜູ້ເຂົ້າຮ່ວມຈາກກອງກວດກາ ອາຫານ ແລະ ຢາ, ສູນວິໃຈອາຫານ ແລະ ຢາ, ໂຮງງານຜະລິດຢາເລກ 2, ໂຮງງານຜະລິດຢາເລກ 3 ແລະ ໂຮງງານຜະລິດຢາ 104 ພອ້ມດວ້ຍ ຜູ້ເຂົ້າຮວ່ມ ຈາກພາກເອກະຊົນ ຈາກ ຫ້ອງປຸງແຕ່ງຢາພື້ນເມືອງ ແລະ ບໍລິສັດຂາອອກ-ຂາເຂົ້າແລະ ພະແນກການພາຍໃນກົມອາຫານ ແລະ ຢາ.  ພ້ອມດ້ວຍວິຊາການທີ່ກ່ຽວຂ້ອງ ລວມທັງໝົດ 45  ທ່ານ.

 

ຈຸດປະສົງຂອງກອງປະຊຸມສຳມະນາ  ແມ່ນ ໃຫ້ແກ່ບັນດາຜູ້ປະກອບການທີ່ດຳເນີນທຸລະກິດ ດ້ານຢາພື້ນເມືອງ ແລະ ຜະລິດຕະພັນເສີມສຸຂະພາບໄດ້ຮັບຮູ້ເຖີງທິດນຳຂອງອາຊຽນ ເພື່ອກະກຽມຄວາມພ້ອມພາຍຫຼັງການທີ່ຮ່ວມການເຊັນລົງນາມຂໍ້ຕົກລົງ ຮັບຮູ້ເຊີ່ງກັນ ແລະ ກັນ ໃນການຈັດຕັ້ງປະຕິບັດການຮຽກຮ້ອງການຂື້ນທະບຽນຢາພື້ນເມືອງ ແລະ ຜະລິດຕະພັນເສີມສຸຂະພາບ.

 

ເຊີ່ງໃນວາລະກອງປະຊຸມໄດ້ ນໍາສະເໜີພາບລວມຂອງວຽກງານການຂື້ນທະບຽນຢາພື້ນເມືອງ ແລະ ຜະລິດຕະພັນເສີມສຸຂະພາບ ໃນທີ່ຜ່ານມາ ແລະ ທິດທາງຂ້າງໜ້າໃນການຈັດຕັ້ງປະຕິບັດຕາມທິດທາງຂອງອາຊຽນລວມເຖີງ ບັນດາລະບຽບການ, ບັນດາຄູ່ມືໃນການຮຽກຮ້ອງການຂື້ນທະບຽນຜະລິດຕະພັນຢາພື້ນເມືອງ ແລະ ຜະລິດຕະພັນເສີມສຸຂະພາບ ລວມເອົາ 5 ຄູ່ມືການຮຽກຮ້ອງຂື້ນທະບຽນຢາ ຂອງອາຊຽນຄື: 1. ຄູ່ມືຫຼັກການການຜະລິດຢາພື້ນເມືອງທີ່ດີ (GMP), 2. ຄູ່ມື ອາຊຽນກ່ຽວກັບການຄົງຕົວ ແລະ ອາຍຸຂອງຢາພື້ນເມືອງ ແລະ ຜະລິດຕະພັນເສີມສຸຂະພາບ, 3. ຄູ່ມື ອາຊຽນກ່ຽວກັບຂອບເຂດຈຳກັດ ຂອງສານປົນເປື້ອນຂອງຜະລິດຕະພັນ, 4. ຄູ່ມື ອາຊຽນກ່ຽວກັບການກ່າວອ້າງ ແລະ ພິສູດການກ່າວອ້າງ ແລະ 5. ຄູ່ມືແນະນໍາຂໍ້ຮຽກຮ້ອງກ່ຽວກັບສະຫຼາກສໍາລັບຢາພື້ນເມືອງ ແລະ ຜະລິດຕະພັນເສີມສຸຂະພາບ, ການຮຽກຮ້ອງໃຫ້ຈັດຕັ້ງປະຕິບັດ ກໍ່ເພື່ອ ການຮັບປະກັນຄຸນນະພາບ ປະສິດທິພາບ ແລະ ຄວາມປອດໄພ ຂອງຢາພື້ນເມືອງ ແລະ ຜະລິດຕະພັນເສີມສຸຂະພາບກ່ອນການຈຳໜ່າຍ ແລະ ການຊົມໃຊ້ ຂອງຜູ້ບໍລິໂພກ.

ຜົນໄດ້ຮັບຂອງກອງປະຊຸມສຳມະນາ ໃນຄັ້ງນີ້ ແມ່ນໄດ້ຮັບໝາກຜົນເປັນຢ່າງດີ ເຊີ່ງໄດ້ເຮັດໃຫ້  ຜູ້ເຂົ້າຮວ່ມ ແມ່ນໄດ້ຮັບຮູ້ ຂໍ້ມູນພື້ນຖານກ່ຽວກັບທິດທາງການຈັດຕັ້ງປະຕິບັດວຽກງານຢາພື້ນເມືອງ ແລະ ເພີ້ມຄວາມເຂົ້າໃຈຫຍີ່ງຂື້ນຂອງຜູ້ປະກອບການຕໍ່ບັນດາຄູ່ມືຮຽກຮ້ອງຂອງອາຊຽນ ເພື່ອນໍາໄປຈັດຕັ້ງປະຕິບັດໃຫ້ສອດຄ່ອງຕາມທິດນຳຂອງອາຊຽນໃນຂ້າງໜ້າ.