ໃນວັນທີ 23 ຕຸລາ 2020 ກະຊວງສາທາລະນະສຸກ ໄດ້ເປີດກອງປະຊຸມ ປຶກສາຫາລືກ່ຽວກັບວຽກງານການຄຸ້ມຄອງຊັບພະຍາກອນທຳມະຊາດທີ່ເປັນຢາຂຶ້ນທີ່ ໂຮງແຮມວຽງຈັນພຣາຊາ ນະຄອນຫຼວງວຽງຈັນ ໂດຍພາຍໃຕ້ການເປັນປະທານຂອງທ່ານ ຮສ. ດຣ. ບຸນກອງ ສີຫາວົງ ລັດຖະມົນຕີ ກະຊວງສາທາລະນະສຸກ ແລະ ຕະນະປະທານຮ່ວມປະກອບມີ ທ່ານ ນ. ບຸນຄຳ ວໍລະຈິດ ຮອງລັດຖະມົນຕີ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ, ທ່ານ ສົມຈິດ ອິນທະມິດ ຮອງລັດຖະມົນຕີ ກະຊວງອຸດສາຫະກຳ ການຄ້າ ແລະ ທ່ານ ປອ. ດຣ. ບຸນແຝງ ພູມມະໄລສິດ ຮອງລັດຖະມົນຕີ ກະຊວງສາທາລະນະສຸກ ເຊິ່ງມີຜູ້ເຂົ້າຮ່ວມຈາກ ກົມຄົ້ນຄ້ວາ-ສັງລວມ (ສນຍ), ສະພາແຫ່ງຊາດ, ກະຊວງກະສີກໍາ ແລະ ຢ່າໄມ້ (ກົມປ່າໄມ້, ກົມປູກຝັງ) ກະຊວງອຸດສາຫະກໍາ ແລະ ການຄ້າ (ກົມນຳເຂົ້າ-ສົ່ງອອກ, ກົມອຸດສາຫະກຳ ແລະ ຫັດຖະກຳ, ກົມທະບຽນ) ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ (ກົມສິ່ງແວດລ້ອມ), ສະຖາບັນການແພດ ແລະ ການຢາພື້ນເມືອງ ແລະ ກົມອາຫານ ແລະ ຢາ ລວມທັງໝົດ ຈໍານວນ 31 ທ່ານ.
ກອງປະຊຸມຄັ້ງນີ້ ແມ່ນມີຈຸດປະສົງເພື່ອ ປຶກສາຫາລື ກົນໄກການປະສານງານກັບແໜງການທີ່ຂ້ອງ ໃນການຄຸ້ມຄອງຊັບພະຍາກອນທຳມະຊາດທີ່ເປັນຢາ, ທົບທວນຄືນບັນດາລະບຽບການ, ແຈ້ງການ ແລະ ນິຕິກຳ, ການກຳນົດບັນຊີລາຍການລະຫວ່າງຊັບພະຍາກອນທຳມະຊາດທີ່ເປັນຢາ ແລະ ບັນຊີເຄື່ອງປ່າຂອງດົງ, ການອອກອະນຸຍາດຂຸດຄົ້ນ, ການອອກອະນຸຍາດສ້າງຕັ້ງໂຮງງານ ຫຼື ຫ້ອງປຸງແຕ່ງ, ການນຳເຂົ້າ ແລະ ນຳໃຊ້ເຄມີທີ່ບໍ່ໄດ້ຮັບອະນຸຍາດ ທີ່ເຮັດໃຫ້ມີຜົນກະທົບຕໍ່ສິ່ງແວດລ້ອມ.
ໃນວາລະການປະຊຸມຜູ້ເຂົ້າຮ່ວມຈາກແຕ່ລະພາກສ່ວນກໍ່ໄດ້ແລກປ່ຽນຄຳຄິດເຫັນຕາມພາລະບົບບາດ ແລະ ຂອບເຂດທີ່ຂະແໜງການຕົນຮັບຜິດຊອບເພື່ອແກ້ໄຂບັນຫາທີ່ຍັງຄ້າງຄາເປັນຕົ້ນແມ່ນ: ກົນໄກການປະສານງານກັນລະຫວ່າງຂະແໜງການກ່ຽວຂ້ອງ ເຊັ່ນ: ກະສິກຳ-ປ່າໄມ້, ສາທາລະນະສຸກ, ອຸດສາຫະກຳ ການຄ້າກັບສາທາລະນະສຸກ ແລະ ຂະແໜງການອື່ນທີ່ກ່ຽວຂ້ອງ, ການສ້າງ, ປັບປຸງ ແລະ ຈັດຕັ້ງປະຕິບັດບັນດານິຕິກຳຂອງຂະແໜງການທີ່ກ່ຽວຂ້ອງ ແລະ ວາງແຜນແກ້ໄຂຮ່ວມກັນ.
ພາຍຫຼັງການປະກອບຄໍາຄິດ ຄໍາເຫັນຈາກຜູ້ເຂົ້າຮ່ວມ ກອງປະຊຸມແລ້ວ, ທ່ານ ຮສ. ດຣ. ບຸນກອງ ສີຫາວົງ
ລັດຖະມົນຕີ ກະຊວງສາທາລະນະສຸກ ໄດ້ຕີລາຄາສູງຕໍ່ກອງປະຊຸມຄັ້ງນີ້, ຊຶ່ງໄດ້ລົງເລິກຫຼາຍບັນຫາເຊັ່ນ: ການປູກ, ການລ້ຽງ, ເກັບກູ້, ຜະລິດ, ຈຳໜ່າຍ . . . ເຊິ່ງພວກເຮົາມີນິຕິກຳຫຼາຍສະບັບ ແຕ່ການປະຕິບັດຍັງບໍ່ສອດຄ່ອງ ສະນັ້ນ ຄວນປັບປຸງໃຫ້ສອດຄ່ອງເຊັ່ນ: ດຳລັດ 155/ນຍ ແລະ ນິຕິກຳອື່ນໆ. ທ່ານຍັງກ່າວວ່າກອງປະຊຸມຄັ້ງນີ້ແມ່ນບັນລຸເປົ້າໝາຍເພື່ອເຮັດໃຫ້ການຄຸ້ມຄອງຊັບພະຍາກອນທຳມະຊາດທີ່ເປັນຢາໃຫ້ດີຂຶ້ນ ແລະ ທ່ານຊີ້ນໍາຕໍ່ກອງປະຊຸມດັ່ງນີ້:
-
ຄວນປັບປຸງກົນໄກການປະສານງານໃຫ້ໄປລວງດຽວກັນໂດຍປະຕິບັດຕາມນິຕິກຳ, ຫຼີກເວັ້ນການຊ້ຳຊ້ອນກັນ ໂດຍສະເພາະແມ່ນບັນຊີລາຍການຊັບພະຍາກອນທຳມະຊາດທີ່ເປັນຢາ ແລະ ເຄື່ອງປ່າຂອງດົງ.
-
ກະຊວງສາທາລະນະສຸກຈະແຕ່ງຕັ້ງຄະນະກຳມະການຄຸ້ມຄອງຊັບພະຍາກອນທຳມະຊາດທີ່ເປັນຢາ, ຄະນະດັ່ງກ່າວມີໜ້າທີ່ເບິ່ງຄືນບັນດານິຕິກຳ, ກົນໄກການປະສານງານ ແລະ ລົງເລິກເບິ່ງຄືນບັນດາໂຮງງານ, ຫ້ອງປຸງແຕ່ງທີ່ບໍ່ໄດ້ມາດຕະຖານ ແລະ ການຈັດຕັ້ງປະຕິບັດຜ່ານມາ ເພື່ອເປັນບ່ອນອີງໃນການປັບປຸງນິຕິກຳ.
-
ສະເໜີໃຫ້ກົມອາຫານ ແລະ ຢາ, ກົມປ່າໄມ້, ກົມອຸດສາຫະກຳ, ກົມທະບຽນ ແລະ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ຄົ້ນຄ້ວາດ້ານວິຊາການກ່ອນ. ຈາກນັ້ນ ຄວນສະເໜີຕໍ່ກອງປະຊຸມນາຍົກ-ຮອງນາຍົກກ່ຽວກັບບັນຫາການຄຸ້ມຄອງຊັບພະຍາກອນທຳມະຊາດທີ່ເປັນຢາເພື່ອຂໍທິດຊີ້ນຳ.
|
