ບົດຂ່າວໂດຍ ດຣ. ຄໍາສຸກ ສຸວັນນາລີ ຫົວໜ້າຂະແໜງອຢ ແຂວງວຽງຈັນ
ເພື່ອເປັນການປົກປ້ອງຜູ້ບໍລິໂພກ ໃຫ້ໄດ້ຮັບຜະລິດຕະພັນອາຫານທີ່ດີ, ມີຄຸນນະພາບ, ມີຄວາມປອດໄພແກ່ຜູ້ຊົມໃຊ້ ແລະ ເພື່ອຄຸ້ມຄອງ ແລະ ສົ່ງເສີມຜູ້ດຳເນີນທຸລະກິດຈຳໜ່າຍອາຫານໃຫ້ປະຕິບັດຕາມຂໍ້ກຳນົດ, ກົດລະບຽບ, ກົດໝາຍວ່າດ້ວຍອາຫານຢ່າງຖືກຕ້ອງ, ໄດ້ມາດຕະຖານ ແລະ ຮັບປະກັນຄວາມປອດໄພ. ພະແນກສາທາລະນະສຸກແຂວງ ວຽງຈັນ (ຂະແໜງ ອາຫານ ແລະ ຢາ) ແມ່ນໄດ້ມີ ຄວາມພະຍາມໃນການເຝົ້າລະວັງ, ຕິດຕາມ, ກວດກາ ການຈໍລະຈອນ, ຈຳໜ່າຍອາຫານບໍ່ວ່າຈະເປັນອາຫານສຳເລັດຮູບ, ໂຮງງານຜະລິດອາຫານ, ວັດຖຸດິບທີ່ຈະມາປຸງແຕ່ງອາຫານ ແມ່ນໄດ້ມີການຕິດຕາມ, ກວດກາເປັນແຕ່ລະໄລຍະຕາມຮອບກວດກາປົກກະຕິ ແລະ ຕາມການສົ່ງຂ່າວ. ໃນການດໍາເນີນເນີນການຕົວຈິງຂອງແຂວງວຽງຈັນ ແມ່ນໄດ້ມີການແບ່ງ ພາລະບົດບາດ ແລະ ຄວາມຮັບຜິດຊອບໃຫ້ໜ່ວຍງານອາຫານ ແລະ ຢາເມືອງ ເປັນໜ່ວຍງານຫລັກໃນການເຝົ້າລະວັງ, ຕິດຕາມ, ກວດກາ ຕາມຮອບປົກກະຕິຢ່າງໜ້ອຍແມ່ນໃຫ້ 2ຄັ້ງຕໍ່ປີ, ຖ້າມີບັນຫາການຮ້ອງຟ້ອງແມ່ນ ຂະແໜງອາຫານ ແລະ ຢາ ແຂວງຈະລົງສົມທົບກັບໜ່ວຍງານອາຫານ ແລະ ຢາ ເມືອງລົງຈັດຕັ້ງປະຕິບັດໃຫ້ທ່ວງທັນກັບເຫດການ. ດັ່ງເຫດການທີ່ເກີດຂື້ນໃນວັນທີ 6 ພະຈິກ 2020 ໄດ້ຮັບແຈ້ງຂ່າວຈາກພົນລະເມືອງດີ ຂະແໜງອາຫານ ແລະ ຢາ ແຂວງ ໄດ້ສົມທົບກັບໜ່ວຍງານອາຫານ ແລະ ຢາ ເມືອງ ໂພນໂຮງ ລົງກວດກາສະຖານທີ່ຮ້ານຂາຍເຄື່ອງສົ່ງ ຢູ່ໃນເທດສະບານເມືອງໂພນໂຮງ ເມື່ອເຈົ້າໜ້າທີ່ ອາຫານ ແລະ ຢາ ລົງກວດກາຕົວຈິງໃນສະຖານທີ່ດັ່ງກ່າວ ກໍ່ພົບອາຫານສຳເລັດຮູບ ໝົດອາຍຸ ຈຳນວນໜຶ່ງ ຊຶ່ງເປັນອາຫານທີ່ນິຍົມສຳລັບເດັກນ້ອຍ, ໄວໜຸ່ມ, ຊາວໜຸ່ມ ເຈົ້າໜ້າທີ່ຈຶ່ງໄດ້ຢຶດ ສິນຄ້າດັ່ງກ່າວ ພ້ອມທັງເຮັດບົດບັນທຶກໂດຍຊ່ອງໜ້າກັບເຈົ້າຂອງຮ້ານຊຶ່ງລວມມີ ຈຳນວນ 5 ລາຍການໃນນັ້ນມີ:
1. ເຂົ້າໜົມແຕງໂມ ຍີ່ຫໍ້ Play ຈຳນວນ 144 ກ່ອງ(ໝົດອາຍຸ) ມູນຄ່າ 1.152.000 ກີບ.
2. ເຢວລີ່ ຈຳນວນ 16 ຖົງ(ໝົດອາຍຸ) ມູນຄ່າ 240.000 ກີບ.
3. ຊາໄຂ່ມຸກໃບເຕີຍ ຈຳນວນ 20 ຖົງ(ໝົດອາຍຸ) ມູນຄ່າ 160.000 ກີບ.
4. ເຂົ້າໜົມປັງ ຈຳນວນ 30 ຖົງ(ໝົດອາຍຸ) ມູນຄ່າ 90.000 ກີບ
5. ຄາປູຊິໂນ່ ຈຳນວນ 3 ຖົງ(ໝົດອາຍຸ) ມູນຄ່າ 24.000 ກີບ.
ລວມມູນຄ່າ: 1.666.000 ກີບ.
ສິນຄ້າທັງໝົດແມ່ນໄດ້ຢຶດ ແລະ ນຳມາເກັບຮັກສາໄວ້ໃນສາງຂອງພະແນກສາທາລະນະສຸກແຂວງ ເພື່ອດຳເນີນການປະຕິບັດຕາມລະບຽບ, ກົດໝາຍຕໍ່ໄປ
| 
