ທາບທາມຜ່ານຮ່າງຂໍ້ຕົກລົງວ່າດ້ວຍ

ການຄຸ້ມຄອງຜະລິດຕະພັນເຄື່ອງສຳອາງສະບັບປັບປຸງ

ກອງມະນີ ນາມມະວົງມີໄຊ

ໃນວັນທີ່ 28-29 ກໍລະກົດ 2021 ກົມອາຫານ ແລະ ຢາ ໄດ້ເປີດກອງປະຊຸມທາບທາມຜ່ານຮ່າງຂໍ້ຕົກລົງວ່າດ້ວຍການຄຸ້ມຄອງຜະລິດຕະພັນເຄື່ອງສຳອາງສະບັບປັບປຸງ ໂດຍການເປັນປະທານຂອງທ່ານ ດຣ. ນ. ວຽງໄຊ ວັນສີລາລົມ ຮອງຫົວໜ້າກົມອາຫານ ແລະ ຢາ ມີຜູ້ເຂົ້າຮ່ວມຈາກກະຊວງອຸດສາຫະກຳ ແລະ ການຄ້າ, ກະຊວງການເງິນ-ກົມພາສີ, ກົມຕຳຫຼວດສິ່ງແວດລ້ອມ, ຫ້ອງການກະຊວງສາທາລະນະສຸກ, ສະຖາບັນການແພດ ການຢາພື້ນເມືອງ, ກອງກວດກາອາຫານ ແລະ ຢາ, ສູນວິໄຈ ອາຫານ ແລະ ຢາແຫ່ງຊາດ, ຄະນະພະແນກສາທາລະນະສຸກ ແລະ ຄະນະຂະແໜງອາຫານ ແລະ ຢາແຂວງຫຼວງພະບາງ, ຄຳມ່ວນ, ສະຫວັນນະເຂດ ແລະ ຈຳປາສັກ, ບັນດາພະແນກການພາຍໃນກົມອາຫານ ແລະ ຢາ ແລະ ຜູ້ດຳເນີນທຸລະກິດດ້ານເຄື່ອງສຳອາງ ລວມທັງໝົດ 60 ທ່ານ.

ຈຸດປະສົງແມ່ນເພື່ອທາບທາມຮ່າງຂໍ້ຕົກລົງວ່າດ້ວຍການຄຸ້ມຄອງຜະລິດຕະພັນເຄື່ອງສຳອາງສະບັບປັບປຸງ ໃຫ້ສອດຄ່ອງກັບສະພາບການຈັດຕັ້ງປະຕິບັດຕົວຈິງ ເພື່ອຮັບປະກັນຄຸນນະພາບ ແລະ ຄວາມປອດໄພຂອງຜະລິດຕະພັນເຄື່ອງສຳອາງທີ່ຜະລິດ, ສົ່ງອອກ, ນຳເຂົ້າ, ສົ່ງຜ່ານ, ສົ່ງຜ່ານຊົ່ວຄາວ ແລະ ຈຳໜ່າຍຢູ່ ສປປ ລາວ ເພື່ອປ່ຽນແທນຂໍ້ກຳນົດວ່າດ້ວຍການຄຸ້ມຄອງຄຸນນະພາບຜະລິດຕະພັນເຄື່ອງສຳອາງ ສະບັບເລກທີ 2580/ກຊສ, ລົງວັນທີ 12 ພະຈິກ 2003 ທີ່ນຳໃຊ້ປະຈຸບັນ.

          ຜ່ານການຄົ້ນຄວ້າ ປະກອບຄຳຄິດເຫັນຂອງຜູ້ແທນຈາກແຕ່ລະພາກສ່ວນທັງພາກລັດ ແລະ ຜູ້ປະກອບການທຸລະກິດດ້ານເຄື່ອງສຳອາງໃສ່ຮ່າງເນື້ອໃນຂໍ້ຕົກລົງຄຸ້ມຄອງຜະລິດຕະພັນເຄື່ອງສຳອາງສະບັບປັບປຸງແມ່ນຍັງຈະຕ້ອງໄດ້ປັບປຸງເນື້ອໃນບາງມາດຕາຄືນ. ພາຍຫຼັງປັບປຸງສຳເລັດຄະນະຮັບຜິດຊອບຮ່າງຂໍ້ຕົກລົງດັ່ງກ່າວຈະໄດ້ສົ່ງໃຫ້ແຕ່ລະພາກສ່ວນມີຄຳເຫັນຕື່ມ.