ບົດ​ຂ່າວ: ນາງ ວົງ​ວຽງ​ສາ ສິດ​ທິ​ເດດ

ໃນລະຫວ່າງ ວັນທີ່ 9-10 ສິງຫາ 2021 ກົມອາຫານ ແລະ ຢາ ໄດ້ເປີດກອງປະຊຸມເປີດກວ້າງ ຜ່ານຮ່າງຂໍ້ຕົກລົງວ່າດ້ວຍວ່າດ້ວຍການຈົດທະບຽນຢາພື້ິນເມືອງ ສະບັບສ້າງໃໝ່ ໂດຍການເປັນປະທານຂອງ ທ່ານ ປອ. ດຣ. ບຸນຊູ ແກ້ວຫາວົງ ຫົວໜ້າກົມອາຫານ ແລະ ຢາ ແລະ ມີຜູ້ເຂົ້າຮ່ວມຈາກສາຍແຜນງານອາຫານ ແລະ ຢາ ເຊິ່ງປະກອບ ສະຖາບັນການແພດ ການຢາພື້ນເມືອງ, ກອງກວດກາອາຫານ ແລະ ຢາ, ສູນວິໄຈ ອາຫານ ແລະ ຢາແຫ່ງຊາດ, ໂຮງງານຜະລິດຢາ ເລກ 2 ແລະ ໂຮງງານຜະລິດຢາ ເລກ 3. ນອກ​ຈາກ​ນີ້​ຍັງ​ມີ ຄະນະເພສັດສາດ ມະຫາວິທະຍາໄລວິທະຍາສາດສຸະຂະພາບ, ຂະແໜງອາຫານ ແລະ ຢາ ພະແນກສາທາລະນະສຸກນະຄອນຫຼວງ ແລະ ຜູ້ດຳເນີນທຸລະກິດດ້ານຢາພື້ນເມືອງ ລວມທັງໝົດ 40 ທ່ານ. ຈຸດປະສົງແມ່ນເພື່ອຈັດປະຊຸມເປີດກ້ວາງ ເພື່ອຂໍຄໍາຄິດຄໍາເຫັນຕໍ່ ຮ່າງຂໍ້ຕົກລົງວ່າດ້ວຍການຈົດທະບຽນຢາພື້ນເມືອງ ເພື່ອຄວາມເປັນເອກະພາບທາງດ້ານຫຼັກການ, ສອດຄ່ອງກັບສະພາບການຈັດຕັ້ງປະຕິບັດຕົວຈິງພາຍໃນ ແລະ ສາກົນ,  ເພື່ອຮັບປະກັນຄຸນນະພາບ ແລະ ຄວາມປອດໄພຂອງຜະລິດຕະພັນຢາພື້ນເມືອງ ທີ່ຜະລິດພາຍໃນ, ນໍາເຂົ້າ ກ່ອນອະນຸຍາດວາງຈໍາໜ່າຍຢາພື້ນເມືອງ ຢູ່ ສປປ ລາວ, ເພື່ອອໍານວຍຄວາມສະດວກທາງດ້ານການຄ້າກ່ຽວກັບຜະລິດຕະພັນດັ່ງກ່າວ.  

ກອງປະຊຸມຄັ້ງນີ້ແມ່ນມີຄວາມໝາຍ ແລະ ສໍາຄັນຫຼາຍ ເຊິ່ງ ໄດ້ຮັບການປະກອບຄຳຄິດເຫັນຂອງຜູ້ແທນຈາກແຕ່ລະພາກສ່ວນທັງໝົດທີ່ກ່ຽວຂ້ອງໂດຍສະເພາະ ຜູ້ປະກອບການດ້ານການຜະລິດ, ນໍາເຂົ້າຢາພື້ນເມືອງ ເຊິ່ງແມ່ນຜູ້ທີ່ກ່ຽວຂ້ອງ ແລະ ໄດ້ຮັບຜົນກະທົບໂດຍກົງໃນການຈັດຕັ້ງປະຕິບັດລະບຽບການ ແລະ ມາດຕະການດັ່ງກ່າວ. ຫຼາຍໆ ມາດຕາ ໄດ້ຮັບການປັບປຸງ ເຮັດໃຫ້ມີຄວາມສົມບູນຍິ່ງຂຶ້ນ. ການສ້າງ ຂໍ້ຕົກລົງວ່າດ້ວຍການຈົດທະບຽນຢາພື້ນເມືອງ ແມ່ນ ໜຶ່ງໃນ ຫຼາຍໆ ນິຕິກໍາ ທີ່ນອນຢູ່ໃນແຜນສ້າງ ແລະ ປັບປຸງກົດໝາຍ, ນິຕິກໍາລຸ່ມກົດໝາຍ ທີ່ກົມອາຫານ ແລະ ຢາ ຈະໄດ້ສົມທົບກັບທຸກພາກສ່ວນທີ່ກ່ຽວຂ້ອງສູ້ຊົນຈັດຕັ້ງປະຕິບັດໃຫ້ສໍາເລັດພາຍໃນປີ 2021. ພາຍຫຼັງສໍາເລັດການປັບປຸງຮ່າງຂໍ້ຕົກລົງດັ່ງກ່າວ ຕາມຄໍາຄິດຄໍາເຫັນຂອງກອງປະຊຸມຄັ້ງນີ້ແລ້ວ ຈະໄດ້ນໍາສະເໜີ ລັດຖະມົນຕີກະຊວງສາທາລະສຸກ ເພື່ອຮັບຮອງນໍາໃຊ້ ແລະ ເຜີຍແຜ່ໃນຂອບເຂດທົ່ວປະເທດ.