ກອງ​ປະຊຸມສໍາມະນາ ຄັ້ງນີ້​ໄດ້​ເປີດ​ຂຶ້ນ ​ໃນຕອນ​ເຊົ້າ​ຂອງ​ວັນ​ທີ 03 ພະຈິກ 2015 ​​ພາຍ​ໃຕ້​ການ​ເປັນ​ປະທານຮ່ວມ​ຂອງ​ທ່ານ ດຣ. ນ. ລໍາ​ພອນ ສີ​ຫາ​ຄັງ ຮອງ​ຫົວໜ້າ​ກົມ​ອາຫານ ​ແລະ ຢາ ກະຊວງສາທາລະນະສຸກ ​​​ແລະ ທ່ານ ດຣ. ນ. ​ແສງ​ເພັດ ພົງ​ພະຈັນ ຜູ້​ປະສານ​ງານດ້ານຢາ ​ຂອງ​ອົງການ​ອະນາ​ໄມ​ໂລກປະຈໍາ ລາວ. ກອງປະຊຸມໄດ້​ມີ​ວິ​ທະ​ຍາກ​ອນມາ​ຈາກ WHO WPRO ຈໍານວນ 03 ທ່ານ​ຄື: ທ່ານ Dr. Syed Shah, STC, WP/RGO/DCC/EPI, ທ່ານ Dr. Razieh OSTAD Ali DEHAGHI, Technical Officer, HQ/HIS/EMP/RHT/RS ​​ແລະ Mr. Abd RAZAK BIN ABU BAKAR.

​            ຜູ້​ເຂົ້າ​ຮ່ວມ​ອົບຮົມ​ມາ​ຈາກຕາງໜ້າ​ຄະນະຂອງ​​ແຕ່ລະພະ​ແນ​ກ ພ້ອມ​ດ້ວຍ​ວິຊາ​ການ​ຂອງ​ກົມ​ອາຫານ ​ແລະ ຢາ, ຕາງ​ໜາ​ຈາກ​ຄະນະ​ໂຄງການ​ສັກ​ຢາ​ກັນ​ພະຍາດ ສູນ​ແມ່ ​ແລະ ​ເດັກ, ຕາງໜ້າ​ຈາກ ຄະນະ​ເພສັດ​ຊາດ ມະຫາວິທະຍາ​ໄລ ວິທະຍາສາດ ສຸຂະພາບ, ຕາງໜ້າ​ຄະນະ​ພ້ອມ​ດ້ວຍ​ວິຊາ​ການ ຈາກສູນ​ວິ​ໄຈ​ອາຫານ ​ແລະ ຢາ, ຕາງໜ້າ​ຄະນະ ພ້ອມ​ດ້ວຍ ​ວິຊາ​ການ​ຈາກ ສູນ​ສະໜອງຢາ ​ແລະ ອຸປະກອນ​ການ​ແພດ, ຕາງໜ້າ​ ຈາກ​ຄະນະ​ສະ​ຖາ​ບັນ​ການ​ແພດ ​ແລະ ການ​ຢາ​ພື້ນ​ເມື​ອງ​ແລະ ຕາງໜ້າ​ວິຊາ​ການ ຈາກກອງ​ກວດກາ​ອາຫານ ​ແລະ ຢາ ລວມທັງ​ໝົດ: 19 ທ່ານ. ກອງ​ປະຊຸມ​ອົບຮົມ​ໄດ້​ດຳ​ເນີນ​ເປັນ​ເວລາ 04 ວັນ. ກອງປະຊຸມ ໄດ້ຮັບການສະໜັບສະໜູນດ້ານງົບປະມານ ຈາກອົງການ ອະນາໄມໂລກ.ຈຸດປະສົງ​ເພື່ອ ສ້າງຄວາມຮັບຮູ້ໃຫ້ແກ່ພະນັກງານ ຄຸ້ມຄອງດ້ານຢາ ຮູ້ກ່ຽວກັບການສ້າງຄວາມເຂັ້ມແຂງໃຫ້ແກ່ການຈັດຕັ້ງ, ຮູ້ໄດ້ກຳນົດຄວາມ​ຕ້ອງການ​ພື້ນຖານສຳລັບ​ການ​ສ້າງ​ຕັ້ງລະບົບ​ການ​ຄຸ້ມ​ຄອງ​ຄຸນ​ນະພາ​ບ​ໃນອົງການຄຸ້ມຄອງດ້ານຢາ​ລະດັບຊາດ; ສ້າງ​ ​ແລະ ​​ເພີ້​ມຄວາມ​ເຂັ້ມ​ແຂງລະບົບ​ການ​ຄຸ້ມ​ຄອງ​ຄຸນ​ນະພາ​ບ​ເພື່ອສາມາດບັນລຸ ​ “ການປະຕິບັດລະ​ບຽບການຄຸ້ມຄອງ​ທີ່​ດີ”. ໃນການອົບຮົມຄັ້ງນີ້ ຫລາຍຫົວຂໍ້ທີ່ສໍາຄັນທີ່ກ່ຽວຂ້ອງກັບການຈັດຕັ້ງການຄຸ້ມຄອງ ໜ່ວຍງານອົງການ ທີ່ສະໜັບສະໜູນໃຫ້ການຈັດຕັ້ງປະຕິບັດວຽກງານບັນລຸໝາກຜົນ ຢ່າງມີປະສິດທິຜົນ ໂດຍຜ່ານການຈັດຕັ້ງປະຕິບັດ ມາດຕະຖານທີ່ກ່ຽວຂ້ອງ ເຊັ່ນ: ການສະເໜີ ISO 9001:2008, ISO 9001-2015(E) ກ່ຽວກັບຄວາມຕ້ອງການພື້ນຖານກ່ຽວກັບລະບົບການບໍລິຫານດ້ານ

ຄຸນນະພາບ, ການຄຸ້ມຄອງຄວາມສ່ຽງ ແລະ ອື່ນໆ.           ພາຍຫລັງສໍາເລັດການອົບຮົມສໍາມະນາກອນສາມາດຮັບຮູ້, ເຂົ້າໃນກ່ຽວກັບລະບົບການບໍລິການຄຸ້ມຄອງດ້ານຄຸນນະພາບ, ສາມາດນໍາໃຊ້ບົດຮຽນດັ່ງກ່າວກໍານົດ ແລະ ສ້າງ​ແຜນ​ກິດງານ, ໂຄງການ ແລະ ກິດຈະ​ກໍາ​ທີ່ເປັນອັນລະອຽດ ຂອງລະບົບ​ການ​ຄຸ້ມ​ຄອງ​ຄຸນ​ນະພາ​ບສໍາລັບ​ເຈົ້າ​ໜ້າທີ່ ​ແລະ ກໍານົດ​ຂອບ​ເຂດ​ຮັບຜິດຊອບເປັນລະອຽດ ໂດຍສະເພາະ ຕິດພັນກັບ ວຽກງານການ​ອອກ​ອະນຸຍາດ ​ແລະ ການຕິດຕາມກວດກາຄຸນນະພາບ ແລະ ຄວາມປອດໄພ ກ່ອນ ແລະ ຫລັງການຈໍາໜ່າຍຢູ່ທ້ອງຕະຫລາດ.

            ປະຈຸບັນລະບົບການຄຸ້ມຄອງບໍລິຫານດ້ານຄຸນນະພາບ ໄດ້ຈັດຕັ້ງປະຕິບັດຢູ່ຫລາຍໜ່ວຍງານທັງພາກລັດ ແລະ ເອກະຊົນ ໂດຍສະເພາະພາກອົງການຄຸ້ມຄອງຂອງລັດ ໄດ້ນໍາມາປະຕິບັດ ເພື່ອສະໜັບສະໜູນຮັບປະກັນໜ້າວຽກໄດ້ຮັບປະກັນ ເປົ້າໝາຍ ແລະ ຈຸດປະສົງຂອງວຽກງານ ສາມາດບັນລຸຢ່າງມີປະສິດທິຜົນ.