|
ການມາຢ້ຽມຢາມຂອງຄະນະຜູ້ແທນຈາກຫ້ອງການບໍລິຫານຂອງຄະນະກຳມະການດ້ານສາທາລະນະສຸກ ແລະ ການວາງແຜນຄອບຄົວ, ເຂດປົກຄອງຕົນເອງ ກວາງຊີ ຈວງ, ສປ ຈີນ ແຕ່ວັນທີ 27-30 ມັງກອນ 2016
ບົດຂ່າວ: ດຣ. ບຸນເລື່ອນ ດວງເດືອນ
ໂດຍຕອບສະໜອງການເຊີນຂອງທ່ານຫົວໜ້າຫ້ອງການກະຊວງສາທາລະນະສຸກ ຄະນະຜູ້ແທນຈາກຫ້ອງການບໍລິຫານຂອງຄະນະກຳມະການດ້ານ ສາທາລະນະສຸກ ແລະ ການວາງແຜນຄອບຄົວ, ເຂດປົກຄອງຕົນເອງ ກວາງຊີ ຈວງ, ສປ ຈີນ ໄດ້ນຳພາທິມງານທີ່ປະກອບດ້ວຍຫຼາຍພາກສ່ວນເຊັ່ນສວນພຶກສາສາດຕົ້ນໄມ້ເປັນຢາກວາງຊີເດີນທາງມາຢ້ຽວຢາມ ແລະ ເຮັດວຽກຮ່ວມກັບກົມອາຫານ ແລະ ຢາ, ຄະນະເພສັຊສາດ ມະຫາວິທະນາໄລວິທະຍາສາດສຸຂະພາບ ແລະ ສະຖາບັນການແພດ ແລະ ການຢາພື້ນເມືອງແຕ່ວັນທີ 27-30 ມັງກອນ 2016. ຄະນະຜູ້ແທນຈີນໄດ້ເຂົ້າຢ້ຽມຄຳນັບທ່ານຫົວໜ້າກົມອາຫານ ແລະ ຢາ ຊຶ່ງໄດ້ຮັບມອບໝາຍຈາກການນຳກະຊວງສາທາລະນະສຸກໃຫ້ເປັນຫົວໜ້າຄະນະຝ່າຍລາວເພື່ອເຮັດວຽກກັບຜູ້ແທນຈີນ ທັງນີ້ກໍ່ເພື່ອແຈ້ງຈຸດປະສົງຂອງການມາເຄື່ອນໄຫວວຽກງານໃນຄັ້ງນີ້ໃຫ້ແກ່ທ່ານຫົວໜ້າກົມອາຫານ ແລະ ຢາໄດ້ຮັບຊາບ, ຫຼັງຈາກນັ້ນຄະນະຜູ້ແທນດັ່ງກ່າວໄດ້ໄປພົບປະ ແລະ ເຮັດວຽກຮ່ວມກັບຄະນະເພສັຊສາດ ມະຫາວິທະຍາໄລວິທະຍາສາດສຸຂະພາບ, ໃນເວລາຕໍ່ມາຄະນະຜູ້ແທນຈິນ ກໍໄດ້ພົບປະເຮັດວຽກກັບຄະນະນຳຂອງສະຖາບັນການແພດ ແລະ ການຢາພື້ນເມືອງ, ໃນການພົບປະກັນລະຫວ່າງຜູ້ແທນຈີນ ກັບພາກສ່ວນທີ່ກ່ຽວຂ້ອງຕ່າງໆຂອງລາວ ທັງ
ສອງຝ່າຍໄດ້ລາຍງານກ່ຽວກັບການເຄື່ອນໄຫວວຽກງານຂອງຕົນໃຫ້ກັນຊາບ ພ້ອມທັງສະເໜີແນວຄວາມຄິດທີ່ຈະສືບຕໍ່ຮ່ວມມືກັນທາງດ້ານ
ວິຊາການໃນຂົງເຂດ ການແພດ ແລະ ການຢາພື້ນເມືອງ, ການພົບປະ ແລະ ປຶກສາຫາລືດຳເນີນໄປພາຍໃຕ້ບັນຍາກາດທີ່ດີ ມີຄວາມເຂົ້າໃຈຊຶ່ງກັນ ແລະ ກັນ ພ້ອມທັງແຈ້ງເຈດຈຳນົງໃຫ້ກັນ ຊາບກ່ຽວກັບຄວາມປາດຖະໜາດີທີ່ຈະສືບຕໍ່ຮ່ວມມືກັນໃນອະນາຄົດ.
ນອກຈາກການເຄື່ອນໄຫວຢ້ຽມຢາມ ແລະ ແລກປ່ຽນບົດຮຽນກັນແລ້ວ ຍັງໄດ້ມີພິທີເຊັນບົດບັນທຶກຊ່ວຍຈຳລະຫວ່າງຫົວໜ້າສະຖາບັນການແພດ ແລະ ການຢາພື້ນເມືອງ ກັບຫົວໜ້າສວນພຶກສາສາດຕົ້ນໄມ້ເປັນຢາ ກວາງຊີ ຊຶ່ງໃຫ້ກຽດເຂົ້າຮ່ວມຂອງທ່ານ ດຣ ສົມທະວີ ຈາງວິສົມມິດ ຫົວໜ້າກົມອາຫານ ແລະ ຢາ ພ້ອມດ້ວຍຄະນະບໍດີຄະນະເພສັດສາດ, ຜູ້ຕາງໜ້າຈາກກົມປິ່ນປົວ, ຫົວໜ້າໜ້າພະແນກຄຸ້ມຄອງຢາພື້ນເມືອງຂອງກົມອາຫານ ແລະ ຢາ ແລະ ຫົວໜ້າສູນ ແລະ ພະແນກການຕ່າງໆຂອງສະຖາບັນການແພດ ແລະ ການຢາກໍ່ໄດ້ເຂົ້າຮ່ວມ. ບົດບັນທຶກຄວາມເຂົ້າໃຈໄດ້ວາງຂອບການຮ່ວມ
ມືແບບກວ້າງໆໃນຫຼາຍຂົງເຂດເຊັ່ນ (1) ການສົ່ງເສີມການໄປມາຫາສູ່ ຢ້ຽມຢາມຊຶ່ງກັນ ແລະ ກັນ, ການຝຶກອົບຮົມ ແລະ ການແລກປ່ຽນຂໍ້ມູນຂ່າວສານດ້ານຕົ້ນໄມ້ເປັນຢາ ແລະ ຢາພື້ນເມືອງຂອງວິຊາການ ແລະ ຝ່າຍບໍລິຫານ; (2) ການແລກປ່ຽນແນວພັນພືດ; (3) ຮ່ວມມືກັນໃນການອະນຸລັກ ແລະ ການຂະຫຍາຍພັນໃນຫ້ອງທົດລອງສຳລັບຕົ້ນໄມ້ເປັນຢາທີ່ມີທ່າອ່ຽງຈະສູນພັນ; (4) ດຳເນີນການສຶກສາການກຳນົດຕົ້ນໄມ້ເປັນຢາດ້ວຍ ດີເອັນເອ; (5) ສຶກສາຫາທາດທີ່ມີປະຕິກິຣິຍາຕໍ່ເຊື້ອໄວຣັດ, ເຊື້ອບັກເຕຣີ ແລະ ເຊືອມະເຮັງ; (6) ດຳເນິນການຄົ້ນຄວ້າເພື່ອການນຳໃຊ້ແບບຍືນຍົງ ແລະ ການປົກປັກຮັກສາຕົ້ນໄມ້ເປັນຢາ; ແລະ (7) ການສ້າງຕັ້ງສາຂາຢູ່ລາວຂອງສູນການຮ່ວມມື ແລະ ແລກປ່ຽນບົດຮຽນດ້ານຢາພື້ນເມືອງຈີນ-ອາຊຽນ.ນອກນັ້ນ, ຄະນະຜູ້ແທນຈີນຍັງໄດ້ໄດ້ຢ້ຽມຊົມສວນຕົ້ນໄມ້ເປັນຢາຂອງສະຖາບັນການແພດ ແລະ ການຢາພື້ນເມືອງທີ່ຕັ້ງຢູ່ບ້ານເວີນຄຳ ແລະ ໄດ້ໄປຢ້ຽມຊົມສວນປູກຕົ້ນໝາກຍໍ ແລະ ຕົ້ນໝາກຂາມປ້ອມຂອງບໍລິສັດທິບສະຫວ່າງທີ່ຕັ້ງຢູ່ບ້ານນຳຊວງ ແລະ ທ່ຽວຊົມທຳມະຊາດທີ່ເຂດດ່ານສູງ.
ການຢ້ຽມຢາມຂອງຄະນະຜູ້ແທນຈີນໃນຄັ້ງນີ້ ເກີດຂຶ້ນໄດ້ກໍ່ຍ້ອນຜົນຂອງການເດີນທາງໄປເຮັດວຽກຂອງອະດີດການນຳ ແລະ ການນຳໃນປະຈຸ
ບັນຂອງກະຊວງສາທາລະນະສຸກ ເຊັ່ນ ທ່ານ ດຣ. ປອນເມກ ດາລາລອຍ, ທ່ານ ສຈ. ດຣ. ເອກສະຫວ່າງ ວົງວິຈິດ ແລະ ທ່ານ ຮສ. ດຣ. ບຸນກອງ ສີຫາວົງ ແລະທ່ານອື່ນໆ ທີ່ໄດ້ເອົາໃຈໃສ່ຊຸກຍູ້ໃຫ້ມີການຮ່ວມມືກັນລະຫວ່າງສອງປະເທດໃນດ້ານຢາພື້ນເມືອງ.
ການມາຢ້ຽມຢາມລາວຂອງຄະນະຜູ້ແທນຈີນໃນຄັ້ງນີ້ ໄດ້ເປັນບາດກ້າວທີ່ສຳຄັນ ໃນການສືບຕໍ່ການຮ່ວມມືກັນໃນອະນາຄົດ ດ້ານຢາພື້ນເມືອງ ຊຶ່ງຈະນໍາມາຊຶ່ງຜົນປະໂຫຍດແກ່ທັງສອງຝ່າຍໃນອານາຄົດ ໃຫ້ສົມກັບເປັນປະເທດເພື່ອນມິດທີ່ດີ ແລະ ເປັນຄູ່ຮ່ວມມືທີ່ດີ.
|
