ກອງປະຊຸມເຜີຍແຜ່ດຳລັດວ່າດ້ວຍຊັບພະຍາກອນທຳມະຊາດທີ່ເປັນຢາ

ກອງປະຊຸມໄດ້ຈັດຂຶ້ນໃນລະຫວ່າງວັນທີ 14-15 ກໍລະກົດ 2016 ທີ່ຫ້ອງປະຊຸມ ຂອງພະແນກສາທາ ລະນະສຸກ; ພາຍໃຕ້ການປັນປະທານໂດຍ ທ່ານ ດຣ.ສົມທະວີ ຈາງວິສົມມິດ, ຫົວໜ້າກົມອາຫານ ແລະ ຢາ ກະຊວງສາທາລະນະສຸກ ພ້ອມດ້ວຍທ່ານ ພູສະໄໝ ກິດຕິລາດ ຮອງຫົວໜ້າຫ້ອງການ ຫ້ອງວ່າການປົກຄອງແຂວງສະຫວັນະເຂດ ແລະ ທ່ານ ດຣ. ນາງ ຈັນດອນ ມະນີພູໃສ ຮອງຫົວໜ້າພະແນກສາທາລະນະສຸກແຂວງສະຫວັນນະເຂດ ຮ່ວມເປັນຄະນະປະທານ.

ກອງປະຊຸມ ໄດ້ມີຜູ້ແທນເຂົ້າຮ່ວມມາຈາກພາກສ່ວນຂະແໜງການສາທາລະນະສຸກ ເຊຶ່ງປະກອບດ້ວຍ ທ່ານ ດຣ.ບຸນແຝງ ພຸມມະໄລສິດ ຮອງຫົວໜ້າຫ້ອງການກະຊວງສາທາລະນະສຸກ; ຮສ.ດຣ. ກອງມະນີ ສີດາລາ ຫົວໜ້າສະຖາບັນການແພດ ແລະ ການຢາພື້ນເມືອງ ຫົວໜ້າພະແນກ/ຮອງພະແນກ ສາທາລະນະສຸກພ້ອມພະນັກງານວິຊາການ ອາຫານແລະຢາແຂວງ. ນອກຈາກນັ້ນຍັງມີຂະແໜງການທີ່ກ່ຽວຂ້ອງປະກອບມີຜູ້ຕາງໜ້າ ພະແນກຊັບພະຍາ ກອນທຳມະຊາດ ແລະ ສີ່ງແວດລ້ອມ, ກະສິກຳ ແລະ ປ່າໄມ້, ພະແນກ ອຸດສະຫະກຳ ແລະ ການຄ້າ ຂອງ 5 ແຂວງພາກໃຕ້ ມີບັນດາພະນັກງານວິຊາການ ຂອງ ກົມອາຫານ ແລະ ຢາແລະ ຫ້ອງການສັງລວມຈຳນວນໜື່ງເຂົ້າຮ່ວມທັງໝົດ 48 ທ່ານ.

ຈຸດປະສົງຂອງກອງປະຊຸມ ເພື່ອເຜີຍ​ແຜ່​ບັນດາ ນະ​ໂຍບາຍ,  ນິຕິ​ກຳກ່ຽວກັບ​ວຽກງານ​ຄຸ້ມ​ຄອງ​ຊັບພະຍາກອນ​ທຳ​ມະ​ຊາດ​ທີ່​ເປັນ​ຢາ-ຢາ​ພື້ນ​ເມືອງ​ຂອງ​ລາວ, ໂດຍ​ສະ​ເພາະ​ແມ່ນດໍາລັດ​ເລກທີ 155/ນຍ ແລະ ຄຳ​ສັ່ງ​ແນະນຳ​ຈຳນວນໜຶ່ງ​ທີ່​ຂັ້ນ​ເທີ​ງ​ໄດ້​ປະກາດ​ໃຊ້ ແລະ ເພື່ອປືກສາ​ຫາລື ​ເຖິງ​ກົນ​ໄກ​ຮ່ວມມື​ປະສານ​ງານ​ເພື່ອ​ຄຸ້ມ​ຄອງ​ຊັບພະຍາກອນ​ທຳ​ມະ​ຊາດທີ່ເປັນຢາ,ໃຫ້​ມີ​ຄວາມ​ຮັດກຸມ ​ແລະ ​ເຂັ້ມ​ແຂງ​ຂຶ້ນ​ກວ່າ​ເກົ່າ.

ຜົນໄດ້ຮັບຂອງກອງປະຊຸມໃນຄັ້ງນີ້ ບັນດາເຈົ້າໜ້າທີ່ ສາທາລະນະສຸກ ແລະ ບັນດາຂະແໜງການທີ່ກ່ຽວຂ້ອງ ເຫັນດີສືບຕໍ່ ເຜີຍແຜ່ ບັນດານິຕິກຳ ເປັນດຳລັດ ເປັນຄຳສັ່ງ ກ່ຽວກັບຊັບພະຍາກອນ ທຳມະຊາດທີ່ເປັນຢາໃຫ້ ກ້ວາງຂວາງ ທົ່ວເຖີງໄປຮອດຂັ້ນເມືອງ ແລະ ບ້ານດ້ວຍວິທີທີ່ເໝາະສົມ ໃຫ້ຖືກກັບລະດັບຄວາມຮັບຮູ້; ໄດ້ເປັນເອກະພາບໃຫ້ມີການສົ່ງເສີມການປູກ ການລ້ຽງ ການປົກປັກຮັກສາ ຊັບພະຍາກອນທຳມະຊາດທີ່ເປັນຢາ ຂອງຊາດ ໃຫ້ມີປະສິດທິພາບ ແລະ ປະສິດທິຜົນ ທາງດ້ານເສດຖະກິດ ດ້ານຄຸນປະໂຫຍດ ໃຫ້ແກ່ການປີ່ນປົວ ແລະ ກັນພະຍາດ ແລະ ສຳຄັນທີ່ສຸດແມ່ນໃຫ້ມີຄວາມຍືນຍົງ ຕໍ່ເນື່ອງ ຂອງຊັບພະຍາກອນ ທຳມະຊາດທີ່ເປັນຢາ; ຄວນມີແຜນການ ແລະ ໂຄງການ ສຳຫລວດຊັບພະຍາກອນທຳມະຊາດທີ່ເປັນຢາ ຢູໃນສາມປະເພດປ່າ ຂອງກະຊວງກະສິກຳ ແລະ ປ່າໄມ້ ກໍ່ຄືຂອງກະຊວງຊັບພະຍາກອນທຳມະຊາດ ແລະ ສິງແວດລ້ອມ ໂດຍມີການສະໜັບສະໜູນ ຈາກຂະແໜງການທີ່ກ່ຽວຂ້ອງ ມີການສະໜັບສະໜູນ ຈາກການນຳຢູ່ຂັ້ນແຂວງ ແຕ່ວ່າໂຄງການ ແລະ ແຜນງານແມ່ນເຮັດໃຫ້ມີລາຍລັກອັກສອນ ຕ້ອງໃຫ້ມີບຸກຂະລາກອນຕື່ມ;

ນອກຈາກນີ້ກອງປະຊຸມຍັງໄດ້ ສະເຫນີໃຫ້ມີການທົບທວນຄືນ ຫຼື ປັບປຸງ ການສ້າງຕັ້ງ ອົງການຄະນະກຳມະການ ຄຸ້ມຄອງອາຫານ ແລະ ຢາ ຫຼື ຖ້າຈຳເປັນແມ່ນໃຫ້ຈັດຕັ້ງຄະນະກຳມະການສະເພາະກິດອັນໜື່ງເພື່ອຄຸ້ມຄອງຊັບພະຍາກອນທຳມະຊາດທີ່ເປັນຢາ ແລະ ຢາພື້ນເມືອງຂຶ້ນ, ແຕ່ຄວນມີການຄົ້ນຄ້ວາເລີກເຊີງ ດ້ານພາລະບົດບາດຕື່ມ;ສົ່ງເສີມ ຄົ້ນຄ້ວາ ການແພດ ແລະ ການຢາພື້ນເມືອງ ຖ້າມີຄວາມຈຳເປັນຈະຕ້ອງມີການສ້າງຕັ້ງສູນ ເພື່ອຄົ້ນຄ້ວາໃນການນຳໃຊ້ຢາພື້ນເມືອງເຂົ້າໃນການປີ່ນປົວຢູ່ໃນຂັ້ນແຂວງຕື່ມ, ທັງໃຫ້ສອດຄ່ອງກັບນະໂຍ ບາຍຂອງພັກ ແລະ ລັດ ວ່າໃຫ້ມີການສົມທົບຢາຫຼວງ ແລະ ຢາພື້ນເມືອງເຂົ້າໃນຕາໜາງສາທາລະນະສຸກທຸກຂັ້ນ ແລະ ບັນຫາອື່ນໆ ທີ່ກ່ຽວຂ້ອງວຽກງານພັດທະນາການແພດການຢາພື້ນເມືອງ.

ບົດຂ່າວໂດຍ: ດຣ. ບຸນເລື່ອນ ດວງເດືອນ