ກອງປະຊຸມອາຫານ ແລະ ຢາ ທົ່ວປະເທດຄັ້ງທີ່ VIII ໄດ້ຈັດຂຶ້ນ ລະຫວ່າງວັນທີ 21-23 ພິຈິກ 2016 ທີ່ຫໍປະຊຸມແຫ່ງຊາດ ໂດຍການເຂົ້າຮ່ວມຂອງທ່ານ ຄໍາພອນ ພຸດທະວົງ ເລຂາຄະນະພັກ, ຮອງລັດຖະມົນຕີກະຊວງສາທາລະນະສຸກ ແລະ ເປັນປະທານ ໃນວາລະພິທີເປີດກອງປະຊຸມ, ທ່ານ ດຣ. ສົມທະວີ ຈາງວິສົມມິດ ຄະນະປະຈໍາພັກກະຊວງ ຫົວໜ້າກົມອາຫານ ແລະ ຢາ ແລະ ທ່ານ ດຣ. ນາງ Monica Fong ຕາງໜ້າຈາກອົງການອະນາໄມໂລກ ແລະ ຕາງໜ້າຈາກພາກສ່ວນຕ່າງໆ ເຊັ່ນ: ກົມມະຫາພາກ, ສະຖານບັນ, ສູນ, ກອງ, ພະແນກສາທາລະນະສຸກ 17 ແຂວງ ແລະ ນະຄອນຫຼວງ, ບັນດາຂະແໜງການກ່ຽວຂ້ອງເປັນຕົ້ນ: ຂະແໜງອຸດສາຫະກໍາ ແລະ ການຄ້າ, ກະສິກໍາ ແລະ ປ່າໄມ, ກົມເສນາຮັກ ຂອງກໍາລັງປ້ອງກັນຊາດ, ປ້ອງກັນຄວາມສະຫງົບ, ອົງການຈັດຕັ້ງສາກົນ ແລະ ພະນັກງານ-ວິຊາການ ລວມທັງໝົດ 150 ທ່ານ.

 ຈຸດປະສົງຂອງກອງປະຊຸມເພື່ອສະຫຼຸບຕີລາຄາການຈັດຕັ້ງປະຕິບັດແຜນງານປົກປ້ອງຜູ້ບໍລິໂພກອາຫານ, ຢາ ແລະ ຜະລິດຕະພັນການແພດ ໃນໄລຍະຜ່ານມາ ແຕ່ປີ 2011-2015; ປະເມີນການຈັດຕັ້ງປະຕິບັດນະໂຍບາຍແຫ່ງຊາດດ້ານຢາ ແລະ ສະເຫນີຜ່ານຮ່າງເນື້ອໃນນະໂຍບາຍແຫ່ງຊາດດ້ານຢາ ສະບັບປັບປຸງ ແລະ ສ້າງແຜນຍຸດທະສາດພັດທະນາວຽກງານອາຫານ ແລະ ຢາ. ກອງປະຊຸມຈະດໍາເນີນ 3 ວັນເຕັມ ໂດຍມີການນໍາສະເຫນີບົດໃນຫຼາຍໆຫົວຂໍ້ກ່ຽວກັບຜົນສໍາເລັດຂອງວຽກງານຄຸ້ມຄອງອາຫານ ແລະ ຢາ ແລະ ວຽກງານຂອງຂະແໜງການຕ່າງໆ ທີ່ປິ່ນອ້ອມວຽກງານຄຸມຄອງ.  

        ຕະຫລອດ 5 ປີ ຜ່ານມາ (2011-2015) ກົມອາຫານ ແລະ ຢາ ໄດ້ເອົາໃຈໃສ່ຢ່າງຕັ້ງໜ້າເຂົ້າໃນການສຶກສາອົບຮົມເຜີຍແຜ່ວຽກງານການເມືອງ-ແນວຄິດ ແລະ ເພີ້ມຄວາມເຂັ້ມແຂງການຈັດຕັ້ງປະຕິບັດວຽກງານອາຫານ ແລະ ຢາ ເພື່ອເຊື່ອມໂຍງກັບສາກົນ ແລະ ພາກພື້ນຢ່າງມີປະສິດທີ່ຜົນ ພ້ອມທັງເປັນເຈົ້າການປະຕິບັດວຽກງານວິຊາສະເພາະຕົນດ້ວຍຄວາມຮັບຜິດຊອບສູງ ເຊິ່ງໄດ້ສ້າງ ແລະ ປັບປຸງບັນດາກົດໝາຍ ແລະ ນິຕິກໍາທີ່ສອດຄ່ອງ ເຊິ່ງພົ້ນເດັ່ນໃນປີ 2011 ແມ່ນກົດໝາຍວ່າດ້ວຍຢາ ແລະ ຜະລິດຕະພັນການແພດສະບັບປັບປຸງ ທີ່ປະກາດໃຊ້ໃນປີ 2000 ເປັນຕົ້ນມາ ໄດ້ຮັບການປັບປຸງຄືນເພື່ອໃຫ້ມີຄວາມຖືກຕ້ອງສອດຄ່ອງເໝາະສົມຍິ່ງຂຶ້ນ, ກົດໝາຍວ່າດ້ວຍອາຫານ ສະບັບປັບປຸງ ປີ 2013,  ນິຕິກໍາລຸ່ມກົດໝາຍ ເປັນຕົ້ນຂໍ້ຕົກລົງຂອງກະຊວງສາທາລະນະສຸກ ວ່າດ້ວຍການຄຸ້ມຄອງໂຄສະນາອາຫານ, ຢາ ແລະ ຜະລິດຕະພັນການແພດ, ຂໍ້ຕົກລົງວ່າດ້ວຍການທໍາລາຍສະສາງຢາ ແລະ ຜະລິດຕະພັນການແພດ, ຂໍ້ຕົກລົງວ່າດວຍຮ້ານຂາຍຍ່ອຍຢາ ແລະ ບັນດາຄູ່ມືຈັດຕັ້ງປະຕິບັດຕ່າງໆ. ໄດ້ເອົາໃຈໃສ່ຄຸ້ມຄອງຜະລິດຕະພັນຢ່າງເຂັ້ມງວດ ເຊິ່ງປະຈຸບັນມີຜະລິດຕະພັນຢາຂຶ້ນທະບຽນທັງໝົດ 1738 ລາຍການໂຮງງານຜະລິດຢາ ໄດ້ຮັບການຢັ້ງຢືນ ການຜະລິດທີ່ດີ GMP ຈໍານວນ 03 ໂຮງງານ ສາມາດຕອບສະໜອງຢາຮັບໃຊ້ສັງຄົມ ກວາມເອົາ 50% ຂອງຢາທັງໝົດທີ່ນໍາໃຊ້.

 ນອກຈາກນີ້ຍັງໄດ້ເອົາໃຈໃສ່ຈັດຕັ້ງປະຕິບັດວຽກງານ ຄຸ້ມຄອງຢາພື້ນເມືອງ, ຄຸມຄອງໂຄສະນາຂ່າວສານອາຫານ ແລະ ຢາ, ວຽກງານຄຸ້ມຄອງ ການຢາລັດ ໂດຍການຊຸກຍູ້ສົ່ງເສີມແພດໜໍນໍາໃຊ້ຢາຢາຢ່າງສົມເຫດສົມຜົນ, ວຽກງານຈັດຊື້ ສະໜອງ ແລະ ເກັບຮັກສາຢາ ໃຫ້ຮັບປະກັນດ້ານຄຸນນະພາບ ແລະ ລາຄາທີ່ເໝາະສົມ, ວຽກງານຄຸ້ມຄອງຢາເສບຕິດ ວັດຖຸອອກລິດຕໍ່ຈິດ-ປະສາດ ເຄມີຄວບຄຸມເຄມີທົ່ວໄປ ແລະ ເຄື່ອງສໍາອາງ. ພັດທະນາວຽກງານກວດກາວິໄຈໃຫ້ເທົ່າທຽມມາດຕະຖານສາກົນ, ວຽກງານຄຸ້ມຄອງຄວາມປອດໄພຂອງອາຫານ, ວຽກງານປະຕິບັດພັນທະສາກົນລວມ.