ດຣ. ບຸນຊູ ແກ້ວຫາວົງ ຫົວໜ້າພະແນກຄຸ້ມຄອງຢາຫຼວງ

          ເພື່ອສືບຕໍ່ຈັດຕັັ້ງຜັນຂະຫຍາຍແຜນຍຸດທະສາດຂອງວຽກງານອາຫານ ແລະ ຢາ ແລະ ຜັນຂະຫຍາຍເນື້ອໃນ ແລະ ມາດຕາ  41 ຂອງ ກົດໝາຍວ່າດ້ວຍຢາ ແລະ ຜະລິດຕະພັນແພດ ສະບັບເລກທີ 07/ສພຊ, ລົງວັນທີ 21 ທັນວາ 2011 ກ່ຽວກັບ ໃຫ້ປະ

ກົດຜົນເປັນຈິງ.   ດັ່ງນັ້ນ, ກົມອາຫານ ແລະ ຢາ ກະຊວງສາທາລະນະສຸກ ໄດ້ຈັດກອງປະຊຸມ ປຶກສາຫາລືການສ້າງຕັ້ງກຸ່ມທະລະກິດດ້ານຢາ ແລະ ຜະລິດຕະພັນການແພດ ຂອງ ສປປ ລາວ ໄດ້ຈັດຂຶ້ນ ໃນວັນທີ 21 ທັນວາ 2016.  ຈຸດປະສົງເພື່ອປຶກສາຫາລືກ່ຽວກັບຄວາມເປັນໄປໄດ້ໃນການການສ້າງຕັ້ງກຸ່ມທຸລະກິດດ້ານຢາ ແລະ ຜະລິດຕະພັນການແພດ ໂດຍການເປັນປະທານຂອງທ່ານ ດຣ. ສົມທະວີ ຈາງວິສົມມິດ, ຄະນະປະຈໍາພັກກະຊວງ, ປະທານ​ກວດກາ​ພັກ​ກະຊວງ​ສາທາລະນະ​ສຸກ, ຫົວໜ້າກົມອາຫານ ແລະ ຢາ, ການເຂົ້າຮ່ວມຂອງ ທ່ານ ນາງ ວາລີ ເວດສະພົງ ຮອງປະທານສະພາອຸດສາຫະກໍາ ​ແລະ ການ​ຄ້າແຫ່ງຊາດ, ມີ​ຄະນະສະ​ຖາ​ບັນ, ກອງ ສູນ ພາຍ​ໃນສາຍອາຫານ ແລະ ຢາ, ຄະນະອໍານວຍການໂຮງງານຜະລິດ​ຢາ, ຄະນະອໍານວຍການ ແລະ ຜູ້ຕາງໜ້າ ຈາກບໍລິສັດຂາອອກ-ຂາເຂົ້າດ້ານຢາ ແລະ ຜະລິດຕະພັນການແພດ ແລະ  ພະນັກງານພະແນກການທີ່ກ່ຽວຂ້ອງຂອງກົມອາຫານ ແລະ ຢາ.   

          ໃນວາລະຂອງກອງປະຊຸມ ທ່ານ ດຣ. ບຸນຊູ ແກ້ວຫາວົງ ຫົວໜ້າພະແນກຄຸ້ມ​ຄອງ​ຢາ​ຫຼວງ, ກົມ​ອາຫານ ​ແລະ ຢາ ໄດ້ສະເຫນີແນວຄວາມຄິດ, ຄວາມໝາຍຄວາມສໍາຄັນ ແລະ ຄວາມຈໍາເປັນໃນການສ້າງຕັ້ງສະມາຄົມທຸລະກິດດ້ານຢາ ແລະ ຜະລິດຕະພັນການແພດ ໂດຍໄດ້ສະເຫນີບາງບົດຮຽນຂອງບາງປະເທດ ໃນຂົງເຂດ ອາຊຽນທີ່ໄດ້ມີການສ້າງຕັ້ງສະມາຄົມທີ່ເຂັ້ມແຂງ ແລະ ປະຈຸບັນອາຊຽນກໍ່ມີສະມາຄົມທຸລະກິດດ້ານຢາຂອງອາຊຽນ ເຊິ່ງໄດ້​ເປັນຄູ່ຮ່ວມພັດທະນາອັນໜຶ່ງຂອງວຽກງານດ້ານຢາ.

          ສໍາລັບ ສປປ ລາວ ໃນໄລຍະຜ່ານມາ ກໍ່ໄດ້ສ້າງຕັ້ງສະມາຄົມຕ່າງໆ ຂອງຂະແໜງສາທາລະນະສຸກ ເປັນຕົ້ນ ສະມາຄົມ ການແພດຫົວໃຈ, ສະມາຄົມສຸຂະພາບຕາ, ສະມາຄົມ ທັນຕະແພດ, ສະມະຄົມວາງຢາສະຫຼົບ ແລະ ອື່ນໆ. ສໍາລັບສະພາທຸລະກິດດ້ານຢາ ໄດ້ມີການສ້າງຕັ້ງຂຶ້ນໃນໄລຍະຜ່ານ ແຕ່ການຈັດຕັ້ງປະຕິບັດຕົວຈິງ ບໍ່ທັນປົກກະຕິເທົ່າທີ່ຄວນ ເນື່ອງຈາກຫລາຍໆ ປັດໃຈ. 

ໃນກອງປະຊຸມ ທ່ານ ນາງ ວາລີ ເວດສະພົງ ໄດ້ແລກປ່ຽນຄໍາເຫັນ ບາງບັນຫາກ່ຽວກັບການເຕົ້າໂຮມທຸລະກິດແມ່ນບັນຫາທີມີຄວາມສໍາຄັນ ເຊິ່ງກຸ່ມ ຫລື ສະມາຄົມ ໄດ້ເປັນຄູ່ຮ່ວມພັດທະນາຂອງພາກລັດ. ການສ້າງກຸ່ມທຸລະກິດແມ່ນກໍ່ມີຄວາມທ້າທາຍ ແຕ່ສິ່ງ​ສໍາຄັນ​ແມ່ນຂຶ້ນກັບການຕັດສິນໃຈຂອງບັນດາທຸລະກິດ​ເອງ. ທ່ານຍັງໄດ້ຍົກໃຫ້ເຫັນເຖິງ ດໍາລັດ 155/ນຍ ທີ່​ສ້າງ​ຂຶ້ນ​ໂດຍ ທະບວງ​ການ​ປົກຄອງ ​ແລະ ຄຸ້ມ​ຄອງ​ລັດຖະກອນ ກ່ຽວກັບການສ້າງສະມາຄົມ ປະຈຸບັນ ແມ່ນຍັງຢູ່ໃນໄລຍະການປັບປຸງ ເຊິ່ງຄາດວ່າຈະໄດ້ຮັບການຮັບຮອງໃນໝໍ່ໆນີ້. ນອກ​ນັ້ນ​ຍັງໄດ້ແລກປ່ຽນວິທີການຂອງການສ້າງຕັ້ງສະມາ​ຄົມ ​ເຊິ່ງ​ເຫັນ​ວ່າ​ໃນ​ຂົງ​ເຂດ​ທຸລະ​ກິດ​ດ້ານ​ຢາ ​ແລະ ຜະລິດ​ຕະພັນ​ການ​ແພດ​ຂອງ ສປປ ລາວ ​ແມ່ນ​ມີ​ຄວາມ​ພ້ອມ​ທາງ​ດ້ານ​ກໍາລັງ​ແຮງ ​ແລະ ​ເງື່ອນ​ໄຂ​ຫຼາຍ​ຢ່າງ ຈິ່ງ​ເຫັນ​ຄວນ​ຊຸກຍູ້​ໃຫ້​ມີ​ການ​ສ້າງ​ຕັ້ງ​ຂຶ້ນ ​ແລະ ​ເຄື່ອນ​ໄຫວ​ໃຫ້​ມີ​ຮູບ​ປະ​ທໍາ.

          ກອງປະຊຸມ ໄດ້ດໍາເນີນເປັນເວລາເຄິ່ງມື້ ເຊິ່ງໄດ້ຮັບການຮ່ວມມື ແລະ ປະກອບຄໍາຄິດຄໍາເຫັນຢ່າງອຸດົມສົມບູນຂອງ​ຜູ້​ເຂົ້າ​ຮ່ວມ, ກອງປະຊຸມເຫັນໄດ້ເຖິງຄວາມສໍາຄັນ ແລະ ຄວາມຈໍາເປັນຂອງການສ້າງຕັ້ງກຸ່ມສະມາຄົມ ແລະ ໄດ້ເຫັນດີເປັນເອກະພາບ ແລະ ສະໜັບສະໜູນ ໃຫ້ມີການສ້າງສະມາຄົມການຢາ ແລະ ຜະລິດຕະພັນການແພດຂຶ້ນ ຊຶ່ງໃນເບື້ອງຕົ້ນ ໃຫ້ມີການແຕ່ງຕັ້ງຄະນະສະເພາະກິດຂຶ້ນ ເຊິ່ງຄະນະກໍາມະການນີ້ ຄວນປະກອບມີຫຼາຍໆພາກສ່ວນເຂົ້າຮ່ວມ ເພື່ອໃຫ້ມີລັກສະນະເປັນກາງ ເພື່ອຄົ້ນຄ້ວາບັນດານິຕິກໍາ, ລະບຽບການຄຸ້ມຄອງ ແລະ ອື່ນໆ. ສໍາລັບ ຊື່່ຂອງສະມາຄົມ ຈະໄດ້ສືບຕໍ່ປຶກສາຫາລື ໂດຍອີງໃສ່ນິຕິກໍາທີ່ມີ ​ໃຫ້​ມີ​ຄວາມ​ສອດ​ຄ່ອງ ​ແລະ ​ເໝາະ​ສົມ​ກັບ​ຕົວ​ຈິງ​ຂອງ​ຫົວໜ່ວຍ​ທຸ​ລະ​ກິດ. ການ​ເລີ້ມ​ຕົ້ນ​ການ​ສ້າງ​ຕັ້ງ​ດັ່ງກ່າວ ​ແມ່ນ​ໃຫ້​ມີ​ພາກ​ລັດ​ເປັນ​ໃຈກາງ​ໃນ​ການ​ປະສານ​ງານ ​ແລະ ​ເຕົ້າ​ໂຮມ​ໃຫ້​ມີ​ຄວາມ​ເປັນ​ເອກະ​ພາບ.

          ສ່ວນວິທີການຈັດຕັ້ງສະເຫນີຕໍ່ໄປ ກອງປະຊຸມໄດ້ສະເຫນີໃຫ້ກົມອາຫານ ແລະ ຢາ ຈະໄດ້ພິຈາລະນາຕາມຄວາມເໝາະສົມ ໂດຍສົມທົບກັບສະພາອຸດສາຫະກໍາການຄ້າ, ການເຕົ້າໂຮມທຸລະກິດການຢາ ແມ່ນເລີ່ມຈາກຄວາມສະມັກ​ໃຈ, ຄວາມເສຍສະລະຜົນປະໂຫຍດຈາກສ່ວນບຸກຄົນ, ສະຫຼະ​ເວລາ ​ແລະ ມີ​ຄວາມ​ມຸ້ງ​ໝັ້ນ ເພື່ອພັດທະນາສະມາຄົມໃຫ້ທັນກັບຍຸກສະໄໝປະຈຸບັນ ​ແລະ ມີ​ຄວາມເຂັ້ມແຂງ. ເຊິ່ງລາຍລະອຽດຈະໄດ້ນໍາເອົາເນື້ອໃນຂອງກອງ ປະຊຸມຄັ້ງ​ນີ້ລາຍງານຕໍ່ການນໍາຂອງກະຊວງສາທາລະນະ​ສຸກ ​ເພື່ອ​ຂໍ​ທິດ​ທາງ​ຊີ້​ນໍາ​ ​​ແລະ ​ເປັນ​ບ່ອນ​ອີງ​ໃຫ້​ແກ່​ການ​ເລີ້ມ​ຕົ້ນ​ໃນ​ການ​ສ້າງ​ຕັ້ງ​ສະມາຄົມ​ທຸລະ​ກິດ​ຢາ ​ແລະ ຜະລິດ​ຕະພັນ​ການ​ແພດ ຂອງ ສປປ ລາວ.