ກອງປະຊຸມສໍາມະນາ ກ່ຽວກັບບັນດາຄູ່ມືອາຊຽນກ່ຽວກັບການຂຶ້ນທະບຽນຢາ ແລະ ຜະລິດຕະພັນການແພດ ໄດ້ຈັດຂຶ້ນ ລະຫວ່າງ ວັນທີ 11-12 ມັງກອນ 2017 ໂດຍໃຫ້ກຽດເຂົ້າຮ່ວມ ແລະ ຊີ້ນໍາ ໂດຍທ່ານ ດຣ. ລໍາພອນ ສີຫາຄັງ ຮອງຫົວໜ້າກົມອາຫານ ແລະ ຢາ ແລະ ມີ ຕ່າງໜ້າຈາກໂຮງງານຜະລິດຢາ, ບໍລິສັດຂາອອກ-ຂາເຂົ້າດ້ານຢາ ແລະ ຜະລິດຕະພັນການ, ຄະນະພາກວິຊາເພສັດສາດ, ສູນສະໜອງຢາ ແລະ ອຸປະກອນການແພດ, ສູນວິໄຈອາຫານ ແລະ ຢາ, ກອງກວດກາອາຫານ ແລະ ຢາ ແລະ ພະນັກງານທີ່ກ່ຽວຂ້ອງຂອງກົມອາຫານ ແລະ ຢາ.      

ກອງປະຊຸມໄດ້ຈະໄດ້ດໍາເນີນ ເປັນເວລາ 2 ມື້ເຕັມ ເຊິ່ງຈຸດປະສົງຂອງກອງປະຊຸມແມ່ນ ເພື່ອທົບທວນຄືນບັນດາລະບຽບການ, ຄູ່ມືອາຊຽນທີ່ກ່ຽວຂ້ອງ ແລະ ຄວາມຄືບໜ້າໃນການຈັດຕັ້ງຕິບັດ ແລະ ເພື່ອສົນທະນາແລກປ່ຽນບົດຮຽນ ກ່ຽວກັບວຽກງານດັ່ງກ່າວ ສໍາລັບ ສປປ ລາວ. ໃນວາລະກອງປະຊຸມ ໄດ້ມີການລາຍງານລວມ ສະພາບຄວາມຄືບໜ້າໃນການຈັດຕັ້ງປະຕິບັດວຽກງານອາຊຽນດ້ານອາຫານ, ຢາຫຼວງ, ຢາພື້ນເມືອງ, ເຄື່ອງສໍາອາງ ໂດຍສະເພາະຜົນສໍາເລັດ ໂອກາດ ແລະ ສິ່ງທ້າທາຍ; ນອກຈາກນີ້ຍັງໄດ້ຫຼາຍໆເອກະສານ ທີ່ສະເໜີໂດຍວິທະຍາກອນຈາກພະແນກການຕ່າງໆ ຂອງກົມອາຫານ ແລະ ຢາ ເປັນຕົ້ນທິດນໍາຕ່າງໆ ທີ່ກ່ຽວຂ້ອງກັບ ການຄຸ້ມຄອງດ້ານອາຫານ, ຢາ ແລະ ຜະລິດຕະພັນການແພດ ທີ່ອາຊຽນ ໄດ້ພັດທະນາ ແລະ ລົງນາມ ເຊັ່ນ: ເອກສານເຕັກນິກດ້ານວຽກງານຢາພື້ນເມືອງ, ເຄື່ອງສໍາອາງ, ຂໍ້ຮຽກຮ້ອງທົ່ວໄປຂອງອາຊຽນ (ACTD/ACTR) ໃນການຂຶ້ນທະບຽນ, ຄວາມຄືບໜ້າກ່ຽວກັບການກະກຽມເອກະສານຕົກລົງຮັບຮູ້ເຊິ່ງກັນ ແລະ ກັນ ເພື່ອນໍາໄປສູ່ການຍອມຮັບບົດລາຍງານການສຶກສາດ້ານຊີວະເທົ່າທຽມຂອງອາຊຽນ (Mutual recognition Agreement of Bioequivalence Study Report-MRA on BE), ຄວາມຄືບໜ້າໃນການປະສານງານຄະນະກໍາມະການເຕັກນິກອຸປະກອນການແພດ ອາຊຽນ ແລະ ອື່ນໆ ເພື່ອໃຫ້ບັນດາພະນັກງານຄຸ້ມຄອງລັດ ແລະ ຜູ້ປະກອບການໄດ້ຮັບຮູ້ ແລະ ປຶກສາຫາລືແລກປ່ຽນໃນການຈັດຕັ້ງປະຕິບັດ. ໃນວາລະກອງປະຊຸມນີ້ ກົມອາຫານ ແລະ ຢາ ຍັງໄດ້ນໍາສະເຫນີໃຫ້ຜູ້ເຂົ້າຮ່ວມຮັບຮູ້ກ່ຽວກັບແຫຼ່ງຂໍ້ມູນຂ່າວສານດ້ານອາຫານ, ຢາ ແລະ ຜະລິດຕະພັນການແພດ ທີ່ສາມາດຄົ້ນຫາຂໍ້ມູນໄດ້ ເວບໄຊ໌ຂອງ ກົມອາຫານ ແລະ ຢາ ເຊິ່ງໄດ້ຮັບການພັດທະນາສໍາເລັດ ແລະ ນໍາໃຊ້ແຕ່ທ້າຍປີ 2015 ເປັນຕົົ້ນມາ.