ອົບຮົມຄູຝຶກ GMP ອາຊຽນ ສໍາລັບຢາພື້ນເມືອງ ແລະ ຜະລິດຕະພັນເສີມສຸຂະພາບ

ບົດຂ່າວໂດຍ: ທ້າວ ໂສລິວັນ ແສງຈັນ  ວິຊາການສະຖານບັນການແພດການຢາພື້ນເມືອງ

          ຊຸດອົບຮົມຄູຝຶກການກວດກາການຜະລິດທີ່ດີ (Good Manufacturing Practice(GMP)) ສໍາລັບຢາພື້ນເມືອງ ແລະ ອາຫານເສີມສຸຂະພາບ ອາຊຽນ (Traditional Medicine and Health Suppliment(TMHS)) ໄດ້ຈັດຂຶ້ນໃນລະຫວ່າງວັນທີ 14-16 ກຸມພາ 2017 ທີ່ ແຂວງຫຼວງພະບາງ ສປປ ລາວ ໂດຍການເຂົ້າຮ່ວມຂອງບັນດາເຈົ້າໜ້າທີ່ກວດກາຂອງລັດ ແລະ ພາກສ່ວນຜູ້ເຂົ້າຮ່ວມຜະລິດຢາພື້ນເມືອງ ແລະ ຜະລິດຕະພັນເສີມສຸຂະພາບ ຈໍານວນໜຶ່ງຂອງ 8 ປະເທດ ຂອງປະເທດອາຊຽນ ເຊັ່ນ: ກໍາປູເຈຍ, ອິນໂດເນເຊຍ, ສປປ ລາວ, ມຽນມາ, ມາເລເຊຍ, ຟີລິບປິນ, ສິງກະໂປ, ໄທ ແລະ ສສ ຫວຽດນາມ ລວມທັງໝົດ 34 ຄົນ. ຈຸດປະສົງຂອງການອົບຮົມແມ່ນເພື່ອໃຫ້ຜູ້ເຂົ້າຮ່ວມ ໄດ້ທົດລອງນໍາສະເໜີຄູ່ມືການສອນ (GMP Training Module)  ທີ່ໄດ້ພັດທະນາຂຶ້ນ ແລະ ເພື່ອສົນທະນາປຶກສາຫາລື ແລກປ່ຽນບົດຮຽນກ່ຽວກັບວິທີການນໍາສະເຫນີ.

          ຄູ່ມືຫຼັກການການຜະລິດທີ່ດີສໍາລັບຢາພື້ນເມືອງ ແລະ ອາຫານເສີມສຸຂະພາບ ຂອງອາຊຽນ ໄດ້ຮັບການພັດທະນາຮ່ວມກັນໂດຍ ບັນດາປະເທດອາຊຽນ ເຊິ່ງພາຍຫຼັງສໍາເລັດການພັດທະນາຄູ່ມືດັ່ງກ່າວແລ້ວ, ອາຊຽນຍັງໄດ້ສືຕໍ່ພັດທະນາຄູ່ມືກ່ຽວກັບການສອນ(GMP Training Module) ຂຶ້ນມາຕື່ມເພື່ອອໍານວຍຄວາມສະດວກໃຫ້ແກ່ ທຸກພາກສ່ວນໄດ້ນໍາເອົາໄປພັດທະນາ ແລະ ຈັດຕັ້ງການຝຶກອົບຮົມຕໍ່ໄປ. ຄູ່ມືດັ່ງກ່າວ ປະກອບມີ 10 ພາກ ຄື: ພາກລະບົບການຄຸ້ມຄອງຄຸນນະພາ (Quality Management System); ບຸກຄະລາກອນ (Personel); ອາຄານ ແລະ ອຸປະກອນ (Premise and Equipments); ສຸກຂະອະນາໄມ ແລະ ຄວາມສະອາດ (Sanitation and Hygine); ລະບົບເອກະສານ (Documentation), ການຜະລິດ (Production); ການຄວບຄຸມຄຸນນະພາບ (Quality Control); ສັນຍາການະລິດ ແລະ ການວິໄຈຄຸມຄຸນນະພາບ (Contract manufacturing and Analysis); ແລະ ການກວດກາຕົນເອງ (Self inspection) ແລະ ເອກະສານແນບຄັດຫລາຍກວ່າ 20 ສະບັບ.

          ການອົບຮົມແມ່ນໄດ້ແບ່ງອອກເປັນ 3 ໄລຍະ, ໄລຍະທີ່ໜຶ່ງແມ່ນຈັດຢູ່ ແຂວງ ຫຼວງພະບາງ ສປປ ລາວ, ໄລຍະຕໍ່ໄປແມ່ນ ຈະຈັດທີ່ປະເທດມາເລເຊຍ ແລະ ຟີລິບປຶນ ພາຍໃຕ້ການສະໜັບສະໜູນງົບປະມານຂອງກອງທຶນພັດທະນາອາຊີ (ASEAN Development Fund-ADF).