ກອງປະຊຸມ ປຶກສາຫາລື ແລະ ຮັບຮອງແຜນຍຸດທະສາດແຫ່ງຊາດດ້ານການແພດ ແລະ ການຢາພື້ນເມືອງ

ສະບັບປັບປຸງ (ປີ2024-2030)

ນຳສະເໜີບົດຂ່າວໂດຍ: ກິລ່າ ບຸນປະເສີດ ພະແນກຄຸ້ມຄອງໂຄສະນາ ແລະ ຂ່າວສານ

ກອງປະຊຸມ ປຶກສາຫາລື ແລະ ຮັບຮອງແຜນຍຸດທະສາດແຫ່ງຊາດດ້ານການແພດ ແລະ ການຢາພື້ນເມືອງ ສະບັບປັບປຸງ (ປີ2024-2030)ໄດ້ຈັດຂື້ນ ໃນລະຫວ່າງວັນທີ 18-20 ມີນາ 2024 ທີ່ໂຮງແຮມ ທະວີສຸກ, ເມືອງ ວັງວຽງ, ແຂວງ ວຽງຈັນ. ໂດຍການເປັນປະທານຂອງ ທ່ານ ປະລິນຍາເອກ ດຣ. ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ. ເຂົ້າຮ່ວມກອງປະຊຸມທີ່ສຳຄັນໃນຄັ້ງນີ້ມີ ຫ້ອງການກະຊວງສາທາລະນະສຸກ, ຫ້ອງການປະກັບສຸຂະພາບ, ກົມປີ່ນປົວ ແລະ ຝື້ນຟູໜ້າທີ່ການ,  ກົມແຜນການ ແລະ ການເງິນ, ຄະນະບໍດີ ຄະນະເພສັຊສາດ,  6 ໂຮງໝໍສູນກາງ, ພະແນກສາທາລະນະສຸກ 17 ແຂວງ ແລະ 1 ນະຄອນຫຼວງ, ກອງກວດກາ ອາຫານ ແລະ ຢາ, ສະຖາບັນການແພດ-ການຢາພື້ນເມືອງ, ສູນວິໄຈອາຫານ ແລະ ຢາ, ສູນສະໜອງຢາ ແລະ ອຸປະກອນການແພດ, ອົງການອະນາໄມໂລກ ແລະ ບັນດາພະແນກການພາຍໃນກົມອາຫານ ແລະ ຢາ ເຂົ້າຮ່ວມທັງໝົດ 123 ທ່ານ

    ຈຸດປະສົງຂອງກອງປະຊຸມ ເພື່ອຄົ້ນຄ້ວາ ແລະ ປະກອບຄໍາເຫັນໃສ່ຮ່າງ ຍຸດທະສາດແຫ່ງຊາດ ດ້ານການແພດ ແລະ ການຢາພື້ນເມືອງປີ 2024-2030. ໃນກອງປະຊຸມແມ່ນໄດ້ທົບທວນຄືນການຈັດຕັ້ງປະຕິບັດຍຸດທະສາດແຫ່ງຊາດດ້ານການແພດ ແລະ ການຢາພື້ນເມືອງ (ປີ 2012-2015) ໃນໄລຍະຜ່ານມາ, ໄດ້ລາຍງານການກະກຽມການປັບປຸງຍຸດທະສາດເພື່ອໃຫ້ບັນລຸຕາມຈຸດປະສົງ ແລະ ເປົ້າໝາຍຂອງການພັດທະນາວຽກງານ ແລະ ມີການກຳນົດທິດທາງ ແລະ ແຜນການດໍາເນີນງານຂອງຍຸດທະສາດແຫ່ງຊາດດ້ານການແພດ ແລະ ການຢາພື້ນເມືອງ ປີ 2024 -2030, ຫຼັງຈາກນັ້ນໄດ້ມີການຈັດກຸ່ມຄົ້ນຄວ້າສົນທະນາແລກປ່ຽນຂໍ້ມູນເຊິ່ງກັນ ແລະ ກັນ ເພື່ອປະກອບຄຳເຫັນໃສ່ຮ່າງຍຸດທະສາດແຫ່ງຊາດທາງດ້ານການແພດ ແລະ ການຢາພື້ນເມືອງ ແລະ ໄດ້ນໍາສະເໜີຜົນການຄົ້້ນຄວ້າຂອງ 6 ກຸ່ມ, ຜູ້ແທນກອງປະຊຸມໄດ້ມີຄຳເຫັນ ປຶກສາຫາລື ແລະ ໄດ້ສົນທະນາ ປະກອບຄໍາເຫັນໃສ່ຮ່າງເອກະສານຢ່າງຝົດຟື້ນ ມີຄວາມເປັນເອກະພາບກັນພາຍໃນກອງປະຊຸມ.

ຈາກນັ້ນ, ທ່ານປະທານໄດ້ມີຄຳເຫັນ ແລະ ໄດ້ກ່າວຊົມເຊີຍຕໍ່ກອງປະຊຸມໃນຄັ້ງນີ້ ແລະ ແນະນໍາໃຫ້ຄະນະຈັດຕັ້ງກອງປະຊຸມນໍາເອົາເນື້ອໃນທີ່ຜູ້ແທນໄດ້ສະເໜີໄປປັບປຸງໃຫ້ສົມບູນ.