ຂຽນໂດຍ: ດຣ ກອງມະນີ ນາມມະວົງມີໄຊ

ໃນວັນທີ 20\5\2022 ກົມອາຫານ ແລະ ຢາໄດ້ເປີດກອງປະຊຸມປຶກສາຫາລື ເພື່ອກະກຽມສ້າງຕັ້ງສະພາວິຊາຊີບເພສັດຊະກຳ ແລະ ສະມາຄົມເພສັດຊະກອນ ໃນ ສປປ ລາວຂຶ້ນ ໂດຍການເປັນປະທານກອງປະຊຸມຂອງ ທ່ານ ປອ. ດຣ. ບຸນຊູ ແກ້ວຫາວົງ ຫົວໜ້າກົມອາຫານ ແລະ ຢາ, ຊຶ່ງມີຜູ້ເຂົ້າຮ່ວມຈາກກົມອາຫານ ແລະ ຢາ, ສາຍອາຫານ ແລະ ຢາ ແລະ ພະນັກງານບຳນານອາວຸໂສທີ່ມີປະສົບການດ້ານຢາເຂົ້າຮ່ວມ 20 ກ່ວາທ່ານ.

ກອງປະຊຸມຄັ້ງນີ້ ແມ່ນມີຈຸດປະສົງເພື່ອປຶກສາຫາລື ແລະ ລະດົມຄວາມຄິດເຫັນ ໃນການລິເລີ້ມສ້າງຕັ້ງສະພາວິຊາຊີບເພສັດຊະກຳ ແລະ ສະມາຄົມເພສັດຊະກອນ ໃນ ສປປ ລາວ ເພື່ອສົ່ງເສີມ ແລະ ພັດທະນາວິຊາຊີບການຢາ ໃຫ້ດີຂຶ້ນ ເຊິ່ງທີ່ປະຊຸມແມ່ນເຫັນດີໃຫ້ມີການລິເລີ້ມກະກຽມສ້າງຕັ້ງ, ແຕ່ຄວນແຍກສະພາວິຊາຊີບເພສັດຊະກຳອອກ ຕ່າງ ຫາກ ໂດຍບໍ່ລວມຢູ່ໃນຄະນະສະພາວິຊາຊີບການປິ່ນປົວ. ນອກນັ້ນກໍ່ໄດ້ຄັດເລືອກບຸກຄະລາກອນ ເພື່ອປະກອບເປັນຄະນະກະກຽມ ແລະ ກອງເລຂາເພື່ອລະດົມ ຂົນຂວາຍ ແລະ ສະເໜີສ້າງຕັ້ງສະພາວິຊາຊີບເພສັດຊະກຳ ແລະສະມາຄົມເພສັດຊະກອນ ໂດຍມອບໃຫ້ກົມອາຫານ ແລະ ຢາ ແລະ ຄະນະເພສັຊສາດ, ມະຫາວິທະຍາໄລ ວິທະຍາສາດ ສາທາ ລະນະສຸກ ເປັນຫຼັກ ໂດຍປະກອບມີ ຫົວໜ້າສະຖາບັນ, ສູນ, ກອງ ແລະ ໂຮງງານຜະລິດຢາ ຕາມສາຍອາຫານ ແລະ ຢາ ແລະ ພະນັກງານບຳນານອາວຸໂສ ທີ່ມີປະສົບການດ້ານວຽກງານການຢາ ເປັນທີ່ປຶກສາ ແລະ ປະກອບເຂົ້າເປັນຄະນະໃນການກະກຽມບຸກຄະລາກອນ, ພາລະບົດບາດ ແລະ ລະບຽບການ ເພື່ອນຳສະເໜີຂໍອະນຸມັດສ້າງຕັ້ງສະພາວິຊາຊີບເພສັດຊະກຳ ແລະສະມາຄົມເພສັດຊະກອນໃຫ້ໄດ້ຮັບຮອງ ແລະ ປະກາດສ້າງຕັ້ງໃນອານາຄົດໃກ້ໆນີ້. ນອກຈາກນັ້ນ ທີ່ປະຊຸມຍັງນຳສະເໜີຄວນກະກຽມສ້າງຕັ້ງສະມາຄົມ ວິທະຍາສາດ ແລະ ເຕັກໂນໂລຊີທາງດ້ານອາຫານຕື່ມອີກເພາະບັນດາປະເທດສະມາຊິກອາຊຽນແມ່ນມີສະມາຄົມດັ່ງກ່າວໝົດ ເພື່ອພັດທະນາວຽກງານອາຫານ.