ຂັ້ນຕອນນໍາເຂົ້າຢາ
- ວັດຖຸທີ່ເປັນເຄມີພັນທາງການຢາ ຫຼື ເຄມີພັນທາງການຢາເຄິ່ງສຳເລັດຮູບຊຶ່ງບໍ່ແມ່ນຢາສຳເລັດຮູບເຊັ່ນ: ທາດເຄມີທີ່ເປັນວັດຖຸດິບ;
- ຢາພື້ນເມືອງທີ່ບໍ່ໄດ້ຜ່ານການປຸງແຕ່ງ, ບໍ່ມີການບັນຈຸສະເພາະ ແລະ ບໍ່ໄດ້ກຳນົດສູດຕຳລາເຊັ່ນ: ຮາກໄມ້, ລຳຕົ້ນ, ເປືອກ, ເຫງົ້າ, ຫົວ, ໃບ, ດອກ, ແກ່ນ ແລະ ອື່ນໆ;
- ຢາປຸງແຕ່ງຫັດຖະກຳ ນັບທັງຢາຫຼວງ ແລະ ຢາພື້ນເມືອງທີ່ທາງການອະນຸຍາດ;
- ຢາເພື່ອນຳມາວິໄຈ, ວິເຄາະ, ຄົ້ນຄ້ວາ, ຊວ່ຍເຫລືອ ແລະ ຮັບໃຊ້ພາຍໃນສະຖານທູດ, ແຕ່ຕ້ອງແມ່ນ ຢາທີ່ໄດ້ຂື້ນທະບຽນ ແລະ ອະນຸຍາດຈຳຫນ່າຍຈາກອົງການຄຸ້ມຄອງຢາຂອງປະເທດຜູ້ຜະລິດ ຫລື ສົ່ງອອກ ແລະ ຕ້ອງໄດ້ຜ່ານການກວດກາຈາກກົມອາຫານ ແລະ ຢາ ກະຊວງສາທາລະນະສຸກ.
ຂັ້ນຕອນການ ຂໍຈົດທະບຽນຢາ
ຂັ້ນຕອນ 1: ກະກຽມເອກະສານ ເພື່ອຂໍຈົດທະບຽນຢາ
- ສຳລັບຢາທີ່ຜະລິດພາຍໃນ ຜູ້ທີ່ມີຈຸດປະສົງຢາກຜະລິດຢາຕ້ອງຍື່ນຄຳຮ້ອງຂໍຜະລິດຢາຕົວແບບ ຕາມຮ່າງຄຳຮ້ອງນີ້: ກົດ
- ສຳລັບຢາທີ່ນຳເຂົ້າຈາກຕ່າງປະເທດ ຜູ້ທີ່ມີຈຸດປະສົງຢາກນໍາຢາເຂົ້າຈາກຕ່າງປະເທດຈະຕ້ອງຍື່ນ ຄຳຮ້ອງຂໍອະນຸຍາດນຳເຂົ້າຢາຕົວແບບ ຕາມຮ່າງ ຄຳຮ້ອງນີ້: ກົດ
- ສຳລັບລາຍການຢາທີ່ຖືວ່າເປັນຢາໃຫມ່ທີ່ໄດ້ລະບຸໄວ້ໃນ ມາດຕາ 1.3 ຂອງຂໍ້ກຳນົດ ເລກທີ 1441/ກຊສ, ວັນທີ 13 ສິງຫາ 2003 ຕ້ອງປະກອບເອກະສານທີ່ຢັ້ງຢືນເຖິງຄວາມປອດໄພ ແລະ ການມີປະສິດທິຜົນ ໂດຍຄັດຕິດຂໍ້ມູນຂອງການສຶກສາຢ່າງຄົບຖ້ວນ.
- ແບບຟອມຄຳຮ້ອງຕອ້ງແມ່ນສະບັບຕົ້ນທີ່ມີກາຈ້ຳສີແດງ ແລະ ມີຈຳຫນ່າຍຢູ່ ກົມອາຫານ ແລະ ຢາ;
- ເອກະສານຢັ້ງຢືນອື່ນໆ ຖ້າແມ່ນສະບັບສຳເນົາຕອ້ງໄດ້ເຊັນຢັ້ງຢືນສຳເນົາຖືກຕ້ອງ ຕາມສະບັບເດີມຈາກບໍລິສັດ.
ການຮັບຄຳຮ້ອງຂໍຂຶ້ນທະບຽນຢາ ປະຕິບັດ ອາທິດລະ1 ວັນໃນທຸກໆ ວັນສຸກ
ຂັ້ນຕອນ 2 ຮັບ ແລະ ກວດກາເອກະສານ
- ສຳລັບຢາທີ່ຜະລິດພາຍໃນ ພາຍຫລັງໄດ້ຮັບອະນຸຍາດໃຫ້ຜະລິດຢາຕົວແບບ ໂຮງງານຜູ້ຜະລິດຈະຕ້ອງໄດ້ປະກອບຄຳຮ້ອງຂື້ນທະບຽນຢາຕາມ ແບບຟອມນີ້: ກົດ ພາຍໃນກໍານົດ 3 ເຖິງ 6 ເດືອນ;
- ສຳລັບຢາທີ່ນຳເຂົ້າຈາກຕ່າງປະເທດ ພາຍຫລັງໄດ້ຮັບອະນຸຍາດນໍາເຂົ້າຢາຕົວແບບ ບໍລິສັດກ່ຽວຂ້ອງຕ້ອງໄດ້ປະກອບຄຳຮ້ອງນີ້: ກົດ ພາຍໃນກໍານົດ 3 ເຖິງ 6 ເດືອນ.
ຂັ້ນຕອນ 3 ຄົ້ນຄວ້າ ແລະ ພິຈາລະນາເອກະສານ
ໄລຍະຂອງການພິຈາລະນາອອກໃບທະບຽນແມ່ນຢູ່ພາຍໃນກຳນົດ 180 ວັນ. ຫຼັກການພິຈາລະນາຄຳຮ້ອງຂໍຂື້ນທະບຽນຢາ ຈະໄດ້ຮັບການພິຈາລະນາກໍຕໍ່ເມື່ອ ຜູ້ປະກອບເອກະສານມີເງື່ອນໄຂຄົບດັ່ງນີ້:
- ຜູ້ທີ່ໄດ້ຮັບອະນຸຍາດຢ່າງເປັນທາງການໃນການຜະລິດ, ການນຳເຂົ້າຢາສາກົນ ຫລື ພື້ນເມືອງ ເພື່ອຈຳໜ່າຍໃນ ສປປລາວ;
- ໂຮງງານຜູ້ຜະລິດ ຫລື ບໍລິສັດແມ່ຜູ້ສົ່ງອອກທີ່ມີທະບຽນຖືກຕ້ອງຂອງປະເທດກ່ຽວຂ້ອງ ໂດຍຜ່ານຕົວແທນ ເຊິ່ງແມ່ນບໍລິສັດພາຍໃນທີ່ໄດ້ຮັບອະນຸຍາດຢ່າງເປັນທາງການ ໃນການດຳເນີນທຸລະກິດນຳເຂົ້າ (ຢາສາກົນ ຫລືພື້ນເມືອງ) ເພື່ອຈໍາຫນ່າຍ ຫຼື ຫ້ອງການຜູ້ຕາງຫນ້າຂອງບໍລິສັດແມ່ ທີ່ໄດ້ຮັບອະນຸມັດຢ່າງເປັນທາງການ ໂດຍຮູບການມອບສິດໃນການດຳເນີນງານທີ່ເປັນເອກະພາບກັນທັງສອງຝ່າຍ;
- ເຈົ້າຂອງຜະລິດຕະພັນທີ່ມີສູດຕຳລາຢາພື້ນເມືອງ ເພື່ອນຳໃຊ້ເຂົ້າໃນການກັນ ແລະ ປິ່ນປົວພະຍາດ ຊຶ່ງມີຂໍ້ມູນທີ່ສະແດງເຖິງຄວາມປອດໄພ ແລະ ປະສິດທິຜົນຂອງຢາ.
- ກໍລະນີລາຍການຢາທີ່ບໍ່ຈຳເປັນກວດກາວິໄຈຄືນ. ກ່ອນການອະນຸຍາດຂຶ້ນທະບຽນນັ້ນ ຈະຖືກເກັບຕົວແບບໃນຂັ້ນຕອນການນຳເຂົ້າມາຈຳຫນ່າຍ. ໃນກໍລະນີຂາດສານມາດຕະຖານເພື່ອວິໄຈຄຸນນະພາບ, ບໍລິສັດກ່ຽວຂ້ອງຕ້ອງສະຫນອງສານມາດຕະຖານພ້ອມເອກະສານທີ່ຈຳເປັນອື່ນໆ;
ໝາຍເຫດ: ຄຳຮ້ອງຂໍຂື້ນທະບຽນຢາຈະຖືກປະຕິເສດໃນກໍລະນີດັ່ງນີ້:
- ເອກກະສານບໍ່ຄົບຖວ້ນ ຕາມທີ່ໄດ້ລະບຸໄວ້ໃນໃບຄຳຮອ້ງແບບ ຜຢ1, ຜຢ2 ນຂ1, ນຂ2;
- ໄດ້ແຈ້ງໃຫ້ດັດແກ້ບາງຢ່າງທີ່ບໍ່ຖືກຕອ້ງ ແຕ່ບໍ່ມີການປ່ຽນແປງ;
- ໄລຍະຍື່ນໃບຄຳຮອ້ງຂໍຂື້ນທະບຽນຕາມແບບ ຜຢ2 ຫຼື ນຂ 2 ກາຍ 12 ເດືອນ;
- ຢາທີ່ຖືກກຳນົດໃນບັນຊີຢາຕອ້ງຫ້າມຂອງ ສປປລາວ;
- ຢາທີ່ບໍລິສັດແມ່ຜູ້ຜະລິດລົບລ້າງ ຫຼື ຖອນທະບຽນ;
- ຢາໃຫ່ມ ຕາມຄຳນິຍາມທີ່ໄດ້ລະບຸໄວ້ໃນ ມາດຕາ 1.3;
- ຢາທີ່ປະກອບມີຕົວຢາ ກາຍ 3 ຕົວຢາຫຼັກ ( Active Ingredients). ຍົກເວັ້ນຈຳພວກວິຕາມິນລວມ ແລະ ສານຈຳເປັນປົກກະຕິຂອງຮ່າງກາຍ (ກົດອາມິນ, ແຮ່ທາດ, ຢາໃຊ້ພາຍນອກທີ່ເປັນຢາສາມັນປະຈຳບ້ານ, ຢາພື້ນເມືອງ);
- ຢາທີ່ມີລັກສະນະຮຽນແບບທາງດ້ານເຄື່ອງຫຸ້ມຫໍ່ ແລະ ຊື່ການຄ້າທີ່ໄດ້ມີການຮັບຮອງໃຫ້ຂຶ້ນທະບຽນກ່ອນແລ້ວ.
ຂັ້ນຕອນ 4 ເຊັນ ແລະ ປະທັບກາ ເພື່ອອອກໃບທະບຽນຢາ
ຄະນະກຳມະການຂຶ້ນທະບຽນຢາ ທີ່ຖືກແຕ່ງຕັ້ງຈາກລັດຖະມົນຕີວ່າການກະຊວງສາທາລະນະສຸກ ເປັນຜູ້ຕົກລົງການຂຶ້ນທະບຽນຢາ.
ສຳລັບລາຍການຢາທີ່ກົງກັບເງື່ອນໄຂ ຕາມນະໂຍບາຍແຫ່ງຊາດດ້ານຢາ, ບັນຊີຢາພື້ນຖານສະບັບທີ່ພວມປະກາດໃຊ້ ແລະ ຢາຈໍາເປັນສະເພາະໃຊ້ໃນຂະແໜງການ ທີ່ໄດ້ຮັບການຢັ້ງຢືນເຖິງຄວາມຈຳເປັນໃຊ້ຢ່າງເປັນທາງການຈາກຂະແຫນງການທີ່ກ່ຽວຂ້ອງ. ເຊິ່ງວ່າ ກົມອາຫານ ແລະ ຢາ ເປັນອົງການມີສິດອຳນາດອອກໃບທະບຽນຢາໄດ້ເລີຍ, ສ່ວນລາຍການຢາທີ່ບໍ່ກົງກັບເງື່ອນໄຂທີ່ໄດ້ກ່າວມານັ້ນ ຕ້ອງໄດ້ຮັບການພິຈາລະນາຈາກຄະນະກໍາມະການຂື້ນທະບຽນຢາ;
ຢາທີ່ໄດ້ຮັບອະນຸມັດຂື້ນທະບຽນແລ້ວ, ກົມອາຫານ ແລະ ຢາຈະໄດ້ອອກເລກທະບຽນ ແລະ ໃບຢັ້ງຢືນ. ຈາກນັ້ນຜູ້ໄດ້ຮັບອະນຸຍາດຈື່ງມີສິດຜະລິດ ຫຼື ນຳເຂົ້າໄດ້.
ໝາຍເຫດ: ຢາທີ່ບໍ່ເຄີຍນຳເຂົ້າ ສປປລາວ ມາກອ່ນ ຫຼື ຢາສູດໃຫ່ມຊື່ງຜະລິດເພື່ອຈຸດປະສົງປິ່ນປົວພະຍາດທີ່ຮ້າຍແຮງເຊັ່ນ: ເອດສ, ຕັບອັກເສບ, ມະເຮັງ, ຫົວໃຈ-ເສັ້ນເລືອດ....ອາດຈະພິຈາລະນາບົນເງື່ອນໄຂດັ່ງນີ້:
ກ. ເປັນຢາທີ່ໄດ້ຂື້ນທະບຽນໃນບາງປະເທດແລ້ວເຊັ່ນ: ໜຶ່ງໃນບັນດາປະເທດຂອງກຸ່ມ ສະຫະພາບຍູຣົບ ( EUROPEAN UNION ),ສະຫະລັດອະເມລິກາ, ອົດສະຕາລີ ແລະ ຢີ່ປຸ່ນ.
ຂ. ສາມາດຕອບສະຫນອງເອກະສານເພີ້ມຕື່ມດ້ານ: ພິດເບື່ອວິທະຍາ, ເພສັດວິທະຍາ, ກົນໄກການອອກລິດຂອງຢາ, ຊີວະຄົງທົນ ແລະ ການທົດລອງທາງດ້ານການປິ່ນປົວ ( Toxicology, Pharmacology, Pharmaco-kinetic, Bio-availability and Clinical trials ).
ຂັ້ນຕອນ 5 ຮັບຊຳລະຄ່າທຳນຽມ ແລະ ຮັບໃບທະບຽນຢາ
ທ່ານສາມາດ ຊໍາລະຄ່າທໍານຽມ ໃນເວລາ..... ແລະ ຮັບໃບຂື້ນທະບຽນຢາ ໄດ້ທີ ກົມອາຫານ ແລະ ຢາ, ກະຊວງສາທາລະນະສຸກ.
ການນໍາເຂົ້າຢາ ຢູ່ດ່ານ
ອີງຕາມ ກົດໝາຍ ວ່າດ້ວຍ ຢາ ແລະ ຜະລິດຕະພັນການແພດ ເລກທີ 07/ສພຊ, ວັນທີ 21/12/2011: ຢາ ແລະ/ຫລື ຜະລິດຕະພັນການແພດ ທີ່ຈະນໍາເຂົ້າມາຈໍາໜ່າຍ ຫຼື ດໍາເນີນການຜະລິດ ໃນ ສປປ ລາວ ຕ້ອງໄດ້ຈົດທະບຽນ ຫຼື ຈົດແຈ້ງ ຕາມລະບຽບການ ຢູ່ ກົມອາຫານ ແລະ ຢາ (ກົມ ອຢ), ກະຊວງສາທາລະນະສຸກ ເສຍກ່ອນ.
ພາຍຫຼັງໄດ້ຮັບໃບທະບຽນຢາແລ້ວ, ການນໍາເຂົ້າທຸກໆຄັ້ງຕ້ອງໄດ້ ສະເໜີຂໍນໍາເຂົ້າຢາ ທຸກຄັ້ງ ຕໍ່ ກົມ ອຢ ຕາມແບບຟອມນີ້ : ກົດ. ພາຍຫຼັງໄດ້ຮັບອະນຸຍາດການນໍາເຂົ້າແລ້ວ ເອກະສານທີ່ກ່ຽວຂ້ອງຈະຖືກສໍາເນົາເຮັດເປັນ 3 ຊຸດ ໃນນັ້ນ 1 ຊຸດໃຫ້ ກົມ ອຢ, 1 ຊຸດ ໃຫ້ເຈົ້າໜ້າທີ ອຢ ແລະ 1 ຊຸດ ໃຫ້ເຈົ້າໜ້າທີພາສີ ທີ່ປະຈໍາຢູ່ດ່ານ ກວດກາຄວາມຖືກຕ້ອງ ກ່ອນການປ່ອຍອອກຈາກດ່ານ.
ຕິດຕໍ່ສອບຖາມຂໍ້ມູນເພີ່ມເຕີມໄດ້ທີ່: ກົມອາຫານ ແລະ ຢາ, ກະຊວງສາທາລະນະສຸກ.
ບ້ານທາດຂາວ, ຖະໜົນສີເມືອງ, ນະຄອນຫຼວງວຽງຈັນ, ສປປລາວ
ໂທລະສັບ: +(856-21) 214013
ໂທລະສານ: +(856-21) 214015
ເວັບໄຊທ໌: www.fdd.gov.la
ອີເມວ: info@fdd.gov.la