ອາຊຽນຫາລືຮັບປະກັນຄວາມປອດໄພຂອງອາຫານ

ບົດຂ່າວໂດຍ: ດຣ. ສີວິໄລ ນະໄພວົງ

ອີງຕາມການຕົກລົງຂອງກອງປະຊຸມຊ່ຽວຊານດ້ານຄວາມປອດໄພອາຫານ ອາຊຽນ ຄັ້ງທີ່ 12 ທີ່  ໂຢກ ຈາກາຕາ ປະເທດ ອິນໂດເນເຊຍ 2015 ເຊິ່ງໄດ້ມອບໃຫ້ ສປປ ລາວ ເປັນເຈົ້າພາບກອງປະຊຸມໃນຫົວຂໍ້ “ ກອງປະຊຸມຄັ້ງທີ 1 ຂອງກຸ່ມທີ່ 4 ຮັບປະກັນດ້ານ ຄວາມປອດໄພອາຫານ ສໍາລັບແຜນພັດທະນາສາທາລະນະສຸກ ອາຊຽນ ຫລັງ ປີ 2015. ດັ່ງນັ້ນ, ໃນລະຫວ່າງ ວັນທີ 26-28 ເມສາ 2016 ກອງປະຊຸມພາຍໃຕ້ຫົວຂໍ້ດັ່ງກ່າວ ຈຶ່ງ ໄດ້ຈັດຂຶ້ນ ທີ່ໂຮງແຮງດອນຈັນພາເລດ ນະຄອນຫລວງວຽງຈັນ ໂດຍມີທ່ານ ດຣ. ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ, ທ່ານດຣ. ສົມທະວີ ຈາງວິສົມມິດ ຫົວໜ້າກົມອາຫານ ແລະ ຢາ ຄະນະປະທານຝ່າຍລາວ ແລະ ບັນດາປະເທດອາຊຽນເຂົ້າຮ່ວມ.

          ກອງປະຊຸມຄັ້ງນີ້ ໄດ້ພ້ອມກັນທວນຄືນ ແລະ ສົນທະນາທິດທາງໃນຕໍ່ໜ້າ ສໍາລັບແຜນປັງປຸງຄວາມປອດໄພຂອງອາຫານ ລະດັບ 2 ກິດຈະກໍາທີ່ກໍາລັງດໍາເນີນການສະເຫນີໃຫ້ມີການຮ່ວມມືໃນຫລາຍກິດຈະກໍາທີ່ກ່ຽວຂ້ອງກັບຄວາມປອດໄພຂອງອາຫານ ພ້ອມທັງສົນທະນາກ່ຽວກັບຍຸດທະສາດ, ຕົວຊີ້ວັດ ແລະ ເປົ້າໝາຍ ຂອງພາກພື້ນ ສໍາລັບກຸ່ມ 4 ທາງດ້ານສາທາລະນະສຸກ, ກິດຈະກໍາທີ່ສໍາຄັນ ທີ່ໄດ້ກໍານົດໃນຕໍ່ໜ້າ ແມ່ນເນັ້ນໃສ່ເຫດການ ກິດຈະກໍາພາຍໃນແຜນປັບປຸງຄວາມປອດໄພຂອງອາຫານ ລະດັບ 2 ໂດຍການປະສານງານກັບຄູ່ຮ່ວມພັດທະນາຕ່າງໆ ເຊັ່ນ: ອົງການອະນາໄມໂລກ, ອີຢູ ແລະ ອົງການອື່ນໆທີ່ກ່ຽວຂ້ອງ.

          ສໍາລັບ ສປປ ລາວ ແມ່ນສຸມໃສ່ການສົ່ງເສີມວຽກງານຄວາມປອດໄພຂອງອາຫານ ໂດຍສະເພາະການສ້າງນິຕິກໍາ ແລະ ລະບຽບການຕ່າງໆ ກ່ຽວກັບການຄຸ້ມຄອງຄວາມປອດໄພຂອງອາຫານ, ຜັນຂະຫຍາຍເນື້ອໃນກົດໝາຍອາຫານ ຊຶ່ງໄດ້ປັບປຸງ ແລະ ອະນຸມັດນໍາໃຊ້ໃນປີ 2013 ແລະ ນະໂຍບາຍແຫ່ງຊາດດ້ານຄວາມປອດໄພຂອງອາຫານ ໃຫ້ເປັນອັນລະອຽດ ເພື່ອອໍານວຍຄວາມສະດວກໃຫ້ແກ່ການຄຸ້ມຄອງວຽກງານວຽກງານຄວາມປອດໄພຂອງອາຫານ ແລະ ການດໍາເນີນທຸລະກິດຂອງຜູ້ປະກອບການ. ນອກຈາກນີ້ກໍ່ຍັງລິເລີ່ມໃນການສໍາຫລວດຂໍ້ມູນບໍລິໂພກອາຫານ ເພື່ອນໍາໃຊ້ເຂົ້າໃນການປະເມີນຄວາມສ່ຽງ, ສົ່ງເສີມວຽກງານວິໄຈຂອງ ອາຫານ ແລະ ສ້າງຄວາມເຂັ້ມແຂງໃນວຽກງານກວດກາ ແລະ ເຝົ້າລະວັງຄວາມປອດໄພຂອງອາຫານ ແນໃສ່ປົກປ້ອງສຸຂະພາບຂອງປະຊາຊົນໃຫ້ດີຂຶ້ນ.